އަފްޣާނިސްޠާނުގައި ބަސްތަކެެއް ފައްތަރުވެ ހިނގި އެކްސިޑެންޓްތަކެއްގައި ގިނަ ބަޔަކު މަރުވެއްޖެ

އަފްޣާނިސްޠާނުގައި ބަސްތަކެއް ފައްތަރުވެ ހިނގި އެކްސިޑެންޓްތަކެއްގައި ގިނަ ބަޔަކު މަރުވެއްޖެއެވެ. 

އަފްޣާނިސްޠާނުގެ އޮފިޝަލުންނާއި ހަވާލާދީ އަލްޖަޒީރާގައި ބުނެފައިވަނީ މިބަސް މިއެކްސިޑެންޓުތަކުގައި 50 މީހުން މަރުވެ ގިނަ ބަޔަކު ޒަޚަމްވެފައިވަ ކަމަށެވެ. 

އެ އެކްސިޑެންޓްތައް ހިނގާފައި ވަނީ ބުދަ ދުވަހުގެ ރޭ ދަންވަރު ވެރިރަށް ކާބުލް އާއި ދެކުނު ކަންދަހާރާއި ދެމެދު އޮންނަ ޣަޒްނީ ޕްރޮވިންސްގެ ހައިވޭއެއްގައި ކަމަށް ޕްރޮވިންސްގެ އިންފޮމޭޝަން އެންޑް ކަލްޗަރ ހެޑް ހަމީދުﷲ ނިސާރު ބުރާސްފަތި ދުވަހު އެކްސްގައި ވިދާޅުވެފައިވެއެވެ.

ފުރަތަމަ އެކްސިޑެންޓުގައި ފަސިންޖަރުން އުފުލާ ބަހެއް ފިއުލް ޓޭންކަރަކާ ޖެހި، މެދުތެރޭ ޣަޒްނީގެ ޝަހުބާޒް އަވަށު ކައިރިން ވަނީ ޖެހިފަ އެވެ. އަނެއް އެކްސިޑެންޓް ހިނގާފައިވަނީ ބަހެއް ޓްރަކެއްގައި ޖެހި އިރުމަތީ އަންދާރް ސިޓީގައެވެ.  

 އަފްޣާނިސްޠާނުގެ ސަރުކާރުގެ އިސް ތަރުޖަމާނު ޒަބީހުﷲ މުޖާހިދު ވަނީ މަރުވި މީހުންގެ އަދަދަކީ 52 ކަމަށް ވިދާޅުވެފައެވެ. އަދި ޒަޚަމްވެފައިވަނީ 65 މީހުން ކަމަށް އޭނާ ވިދާޅުވެފައިވެއެވެ.

ޒަބީހުﷲ ވިދާޅުވެފައިވަނީ މި އެކްސިޑެންޓްތަކުގެ އަވަސް ތަހުޤީޤއއް ހިންގައި، އެކްސިޑެންޓް ހިނގުމަށް ދިމާވި ސަބަބު ދެނެގަނެ ކުރިއަށް އޮތްތަނުގައި މިފަދަ ހިތާމަވެރި ހާދިސާތައް ހުއްޓުވުމަށް އަޅަންޖެހޭ ފިޔަވަޅުތައް އެޅުމަށް ކަމާބެހޭ ފަރާތްތަކަށް އިލްތިމާސް ކުރައްވާ ކަމަށެވެ.

އެކްސިޑެންޓްގައި އަނިޔާވި މީހަކަށް ހޮސްޕިޓަލުގައި ފަރުވާދެނީ

 ޣަޒްނީ ޕްރޮވިންސްގެ ގަވަރުނަރުގެ ސްޕޯކްސްޕާސަން ޢުމަރު ވިދާޅުވީ، ޒަޚަމްވި މީހުން ޣަޒްނީގެ ހޮސްޕިޓަލްތަކަށް ގެންގޮސްފައިވާ ކަމަށާއި ކަމާބެހޭ ފަރާތްތަކުން ދަނީ މަރުވިމީހުންގެ ހަށިގަނޑުތައް އާއިލާތަކާ ހަވާލުކުރުމުގެ މަސައްކަތް ކުރަމުން ކަމަށެވެ. އަދި ސީރިއަސް ހާލަތެއްގައި ތިބި ބަލިމީހުން ކާބުލަށް ބަދަލުކޮށްފައިވާ ކަމަށް ވެސް އޭނާ ވިދާޅުވި އެވެ. ޒަޚަމްވިމީހުންގެ ތެރޭގައި އަންހެނުންނާއި ކުޑަކުދިން ވެސް ހިމެނެ އެވެ.

އަފްޣާނިސްޠާނުގައި ޓްރެފިކް އެކްސިޑެންޓްތައް ހިނގުމަކީ އާންމުކަމެކެވެ. ހަނގުރާމައިގެ ސަބަބުން ހަލާކުވެފައިވާ މަގުތަކާއި ބާރުސްޕީޑްގައި އެއްޗެހި ދުއްވުން މީގެ ސަބަބެއް ކަމުގައި ހިމެނެއެވެ.

މާޗް މަހު ހެލްމަންޑް ޕްރޮވިންސްގެ ދެކުނުގައި ބަހެއް ފިއުލް ޓޭންކަރަކާ ޖެހި އަލިފާން ރޯވެ 20 އަށް ވުރެ ގިނަ މީހުން މަރުވެ 38 މީހުން ޒަޚަމްވެފައިވެ އެވެ.