ވަނުއާޓޫގެ ޚާރިޖީ ވަޒީރަށް ޚާރިޖީ ވަޒީރު ޙަލީލް ތައުޒިޔާގެ މެސެޖެއް ފޮނުއްވައިފި

ވަނުއާޓޫގެ ޚާރިޖީ ވަޒީރަށް ޚާރިޖީ ވަޒީރު ޑރ ޢަބްދުﷲ ޙަލީލް ތައުޒިޔާގެ މެސެޖެއް ފޮނުއްވަވައިފިއެވެ.

ވަނުއާޓޫއަށް އައި ބާރުގަދަ ބިންހެލުމުގައި އެޤައުމުގެ 14 މީހަކު މަރުވެފައިވާއިރު ގިނަ ބަޔަކަށް އެކިވަރުގެ އަނިޔާތައް ވަނީ ލިބިފައެވެ. އަދި ބިންހެލުމާއި ގުޅިގެން ޢިމާރާތްތައް ވެއްޓި ގިނަ ޢިމާރާތްތަކަކަށް ބޮޑެތި ގެއްލުންތަކެއް ވަނީ ލިބިފައެވެ. 

ޚާރިޖީ ވަޒީރު ޙަލީލް ފޮނުއްވެވި މެސެޖްގައި ދިވެހި ސަރުކާރާއި ދިވެހި ރައްޔިތުންގެ ނަމުގައި އެޤައުމުގެ ރައްޔިތުންނަށް ވަނީ ތައުޒިޔާ ވިދާޅުވެފައެވެ. 

އަދި ވަނުއާޓޫއަކީވެސް ރާއްޖެފަދަ ޖަޒީރާ ޤައުމެއްކަން ފާހަގަކުރައްވައި، ޚާރިޖީ ވަޒީރު ވިދާޅުވީ މި ހިތާމަވެރި ދަނޑިވަޅުގައި ދިވެހި ރައްޔިތުން ތިބީ ވަނުއާޓޫގެ ރައްޔިތުންނާއެކުކަމަށެވެ. އަދި ބިންހެލުމުގައި މަރުވި މީހުންނާއި ގެއްލުން ލިބުނު މީހުންނަށް ވަޒީރުގެ މެސެޖުގައި ވަނީ ހަމްދަރުދީ ފާޅުކުރައްވާފައެވެ.ޚާރިޖީ ވަޒީރުގެ ތައުޒިޔާގެ މެސެޖުގައި ބިން ހެލުމުން ލިބުނު ގެއްލުމުން އަރައިގަތުމަށް ކުރާ މަސައްކަތަށް ކާމިޔާބަށް އެދިވަޑައިގަންނަވާކަމަށްވެސް ވިދާޅުވެފައިވެއެެެވެ.

އަންގާރަދުވަހު ވަނުއާޓޫ އަށް އައިސްފައިވަނީ ރެކްޓަރ މިންގަނޑުން 7.3 މެގްނިޓިއުޑްގެ ބާރުމިނުގައި ބިންހެލުމެކެވެ.