ބްރެޒިލް ފުޓުބޯޅަ ފެޑެރޭޝަނުގެ ރައީސަކަށް ރޮނާލްޑޯ ވާދަކުރަނީ

މިއަންނަ އަހަރު އޮންނަ ބްރެޒިލްގެ ފުޓުބޯޅަ ފެޑެރޭޝަނުގެ ރައީސަކު ހޮވަން ބާއްވާ އިންތިހާބުގައި ވާދަކުރުމަށް ނިންމާފައިވާކަމަށް އެ ގައުމުގެ ފުޓުބޯޅަ ތަރި، ރޮނާލްޑޯ އިއުލާންކޮށްފިއެވެ. ރޮނާލްޑޯ ބުނީ، އޭނާގެ އެންމެ ބޮޑު ޓާގެޓަކީ އެ ގައުމުގެ ފުޓުބޯޅަ ޓީމު އޮންނަންޖެހޭ ހިސާބަށް ގެންދިއުން ކަމަށެވެ.

އުމުރުން 48 އަހަރުގެ ރޮނާލްޑޯ ވަނީ ބްރެޒިލްގެ ގައުމީ ޖާޒީގައި 98 މެޗު ކުޅެފައެވެ. އަދި ރޮނާލްޑޯ ޓީމުގައި ހުރެ 2002 ވަނަ އަހަރު ވޯލްޑް ކަޕް ކާމިޔާބު ކުރި ފަހުން އެ ޓީމަށް އެ މުބާރާތް ކާމިޔާބު ކުރެވިފައި ނުވާތާގަ، ކުއާޓާ ފައިނަލަށް ވުރެން ދުރަށް ދަތުރުކޮށްފައެއް ވެސް ނުވެއެވެ.

މިކަން އިއުލާން ކުރުމަށްފަހު ރޮނާލްޑޯ ދިން އިންޓަވިއުއެއްގައި ބުނީ، މީގެ ކުރިން ގިނަ އަހަރުތަކެއް ވަންދެން ބްރެޒިލްގެ ފުޓުބޯޅައަކީ އެ ގައުމުގެ ރައްޔިތުންގެ ނުތަވަނަސް ދިރިއުޅުމުން ބޭރަށް ނިކުމެލަން އޮތް ފަރުވާލެއް ކަމަށާއި އެ ދުވަސް އަނބުރާ އެ ގައުމުގެ ރައްޔިތުންނަށް ހޮދައިދޭން ޖެހޭ ކަމަށެވެ.

އަދި ގައުމުގެ ފުޓުބޯޅަ މިހާރު އޮތް ހާލަތުން، ގިނަ ބަޔަކު އެކަމަށް އެހާ ޝައުގުވެރިކަމެއް ނުދޭ ކަމަށާއި، މި ހުރިހާ ކަމަކީ އޭނާ އެ މަގާމަށް ކުރިމަތިލުމަށް ބޭނުންވާ ސަބަބުތައް ކަމަށެވެ. 

އެ ފެޑެރޭޝަނުގެ ރައީސަކަށް މިހާރު ހުރީ އެޑްނާލްޑޯ ރޮޑްރިގޭޒްއެވެ. އަދި އޭނާގެ ދައުރު 2026 ވަނަ އަހަރުގެ މާޗު މަހަށް ހަމަވާއިރު، އޭގެ އެއް އަހަރު ކުރިން އިންތިހާބު ބާއްވަން ޖެހެއެވެ. 

ދެ ފަހަރެއްގެ މަތިން، 1994 ވަނަ އަހަރާއި 2002 ވަނަ އަހަރު، ވޯލްޑް ކަޕް ކާމިޔާބު ކޮށްފައިވާ ރޮނާލްޑޯއަކީ ވޯލްޑް ކަޕްގައި ދެވަނައަށް އެންމެ ގިނަ ގޯލު ޖަހާފައިވާ ކުޅުންތެރިޔާއެވެ. އޭނާ ވަނީ 19 މެޗުން 15 ގޯލު ކާމިޔާބުކޮށްފައެވެ. މި ލިސްޓުގެ ކުރީގައި އޮތީ ޖަރުމަނުގެ މިރޯސްލާވް ކްލޯޒާއެވެ.

ރެއާލް މެޑްރިޑަށް ވެސް ކުޅެފައިވާ ރޮނާލްޑޯ ވަނީ އޭނާގެ 17 އަހަރުގެ ކެރިއަރުގައި ދެ ވޯލްޑް ކަޕްގެ އިތުރުން ދެ ކޮޕާ އެމެރިކާ އާއި އޮލިމްޕިކް ބްރޯންޒް މެޑަލް ވެސް ގައުމީ ޓީމާއެކު ކާމިޔާބު ކޮށްފައެވެ. 

ސޯޝަލް މީޑިއާގައި ރޮނާލްޑޯ ކުރި ޕޯސްޓެއްގައި ބުނެފައިވަނީ، ބްރެޒިލްގެ ގައުމީ ޓީމުގައި ނޭމާ އާއި ރޮޑްރީގޯ އާއި އެސްޓެވިއޯ އަދި އެންޑްރިޗްގެ އިތުރުން، ހުނަރުވެރި ގިނަ ކުޅުންތެރިންތަކެއް ތިބި ކަމަށާއި، އެހެންކަމުން ކާމިޔާބަށް ވާސިލްވުމަކީ ނުވާނެ ކަމެއް ނޫން ކަމަށެވެ. އެގޮތުން ވޯލްޑް ކަޕާއި، ކޮޕާ އެމެރިކާ އަދި އޮލިމްޕިކްސްގައި ބްރެޒިލްގެ ނަން އަލުން ވިދުވާލެވޭނެ ކަމަށެވެ.

މީގެ އިތުރުން، ރައީސްގެ މަގާމަށް ކުރިމަތިލުމުގެ ގޮތުން ރިއާލް ވެލަޑޮއިޑްގައި އޮންނަ ރޮނާލްޑޯގެ ހިއްސާ ވިއްކާލުމުގެ މަސައްކަތްތައް ކުރިޔަށްދާ ކަމަށް އޭނާ ބުނެފައި ވެއެވެ.