ޚަބަރު
ހެކިނައްތާލަން އެޗްޑީސީއިން މަސައްކަތް ކުރި ކަމުގެ އެއްވެސް ހެއްކެއް މިހާހިސާބަކަށް އަދި ނެތް: ފުލުހުން
ހައުސިންގް ޑިވަލޮޕްމެންޓް ކޯޕަރޭޝަން.
ހުލާސާ
މިހާރު ތަހުޤީޤު ކުރެވެމުންދާ މައްސަލައާއި ގުޅޭ ހެކި ނައްތާލަން އެޗްޑީސީއިން މަސައްކަތް ކުރި ކުރި ކަމުގެ އެއްވެސް ހެއްކެއް މިހާހިސާބަކަށް އަދި ނެތް ކަމަށް ދިވެހި ފުލުހުންގެ ޚިދުމަތުން ބުނެފިއެވެ.
މިރޭ އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަަމުން އެސިސްޓެންޓް ޕޮލިސް ކޮމިޝަނަރު ޢަބްދުﷲ ޝަރީފް ވިދާޅުވީ މިހާތަނަށް އެޗްޑީސީ އިން ހެކި ނައްތާލުމުގެ މަސައްކަތް ކޮށްފައިވާ ކަމުގެ އެއްވެސް ހެއްކެއް ނެތްކަމަށާއި، މިހާހިސާބަށް ބޭނުންވި ހުރިހާ މައުލޫމާތެއް ލިބިފައިވާ ކަމަށް އޭސީޕީ ޝަރީފް ވިދާޅުވިއެވެ.
ހަފަރާތަކާ ސުވާލު ކުރެވުނު އިރު އެއީ އެޗްޑީސީގެ ހަފަރާތްތޯ ނޫސްވެރިޔަކު ސުވާލުކުރެއްވުމުން އޭސީޕީ ޝަރީފް ވިދާޅުވީ ސުވާލުކުރެވުނު ހަފަރާތުގެ ތެރޭގައި އެޗްޑީސީގެ އެއްވެސް މުވައްޒަފަކު ނުހިމެނޭކަމަށެވެ. އަދި އޭގެ ތެރޭގައި ހިމެނެނީ އާންމު ރައްޔިތުން ތެރެއިން ބަޔަކާއި ސަރުކާރުގެ އެހެން ކުންފުނިތަކުގެ މުވައްޒިފުންކަމަށެވެ.
އަލިފާނުގެ ހާދިސާ އާއި މިމައްސަލައާއި ގުޅުން އެބައޮތްތޯ ސުވާލުކުރެވުމުން އޭސީޕީ ޝަރީފް ވިދާޅުވީ އަލިފާނުގެ ހާދިސާއާއި މިމައްސަލައާއި އަދި މިހާހިސާބުން ގުޅުވޭކަށްނެތް ކަމަށާއި، ޑޮކިޔުމެންޓްތައް ހޯދުމަށްޓަކައި ކުރެވޭ މަސައްކަތުގެ ތެރެއިން މިކަމާ ގުޅުންހުރި ޑޮކިޔުމެންޓެއް ނުލިބޭނެ ކަމަށްވެސް ބެލެވިފައެއް އަދިއެއް ނެތްކަމަށެވެ.
ގެދޮރުވެރިކަމާ ބެހޭ ވުޒާރާއަށް އެކަން އެޗްޑީސީގެ ފަރާތުން އެންގިއިރު ފުލުހުންނަށް އަންގާފައިނުވާ ކަމަށާއި، މިކަމުގައި މިހާރު ބަލަމުން މިދަނީ އެއްވެސް ފަރާތެއްގެ އެއްވެސް އިހުމާލެއް ވޭތޯކަމަށްވެސް ޝަރީފް ވިދާޅުވިއެވެ.
މީގެއިތުރުން ޝަރީފް ވިދާޅުވީ މިމައްސަލައާއި ގުޅުން ހުރި ފަރާތްތައް ތަހުޤީޤަށް ޕާސްޕޯޓު ހިފަހައްޓަން ޖެހިއްޖެ ހާލަތެއް އައިސްފިނަމަ އެކަންވެސް ކުރައްވާނެކަމަށެވެ. އަދި ފުރުން މަނާކުރުމަށްޓަކައި ކުރަން ޖެހޭ ކަމެއް އޮވެއްޖެނެމަ އެކަމެއްވެސް ކުރާނެ ކަމަށް ޝަރީފް ވިދާޅުވިއެވެ.
އެހެންނަމަވެސް މިމައްސަލާގައި އަދި އެއްވެސް ފަރާތެއްގެ ޕާސްޕޯޓު ހިފަހައްޓައިފައިނުވާނެ ކަމަށްވެސް ޝަރީފް ވިދާޅުވިއެވެ.
