ގޯލްޑް ކަޕް: އަލިފުށިން ފުވައްމުލަކު ކަޓުވާލައި ސެމީއިން ޖާގަ ހޯދައިފި

ނައިންޓީ ޕްލަސް ގޯލްޑް ކަޕްގެ ތިން ވަނަ ކުއާޓާ ފައިނަލު މެޗުގައި ބުރާސްފަތި ދުވަހު ހަވީރު ކުޅުނު މެޗުގައި އަލިފުށިން ފުވައްމުލަކު ސިޓީ ކަޓުވާލައި، މުބާރާތުގެ ސެމީ ފައިނަލަށް ދަތުރު ކޮށްފިއެވެ. 

ސައްތައިން ސައްތަ ރެކޯޑަކާއިއެކު، ގްރޫޕް ސްޓޭޖުގެ ހަތަރު މެޗުން މޮޅުވެގެން މުބާރާތުގެ ފުރަތަމަ ބުރުން ދެވަނަ ބުރަށް ދަތުރުކުރި ފުވައްމުލަކު ސިޓީގެ ނަތީޖާތަކަށް ވަނީ ދެވަނަ ބުރުގައި ވަރަށް ބޮޑު ބަދަލުތަކެއް އައިސްފައެވެ. އެގޮތުން، ދެވަނަ ބުރުގެ ފުރަތަމަ މެޗުން އެއްވަރުވިއިރު، ދެވަނަ މެޗުގައި އެ ޓީމު ވަނީ ގުރައިދޫ އަތުން ބަލިވެފައެވެ. އެއަށްފަހު ޖެހިޖެހިގެން ދެވަނަ ބައްޔާއެކު އެ ޓީމަށް މި ޖެހުނީ މުބާރާތުން އަލްވަދާއު ކިޔާށެވެ.

ކުއާޓާ ފައިނަލުގައި، މެޗުގެ ފުރިހަމަ ވަގުތު ހަމަވިއިރު 2-2 އިން އެއްވަރުވެފައި ވުމުން، މެޗުގެ ނަތީޖާ ނެރެން ޖެހުނީ ޕެނަލްޓީ ޖަހައިގެންނެވެ. އަދި އަލިފުށިން ފުވައްމުލަކު ސިޓީގެ މައްޗަށް ކުރި ހޯދީ 6-5 ގެ ނަތީޖާއަކުންނެވެ.

މި މެޗުގައި ފުރަތަމަ ލީޑު ނެގީ އަލިފުށިންނެވެ. އެ ޓީމަށް ގޯލު ކާމިޔާބު ކޮށްދިނީ ހުސެއިން ނިހާނެވެ. ނަމަވެސް، އެ ގޯލަށްފަހު މާގިނަ ވަގުތުތަކެއް ނުހިނގަނީސް، ފުވައްމުލަކުން މެޗުގެ ނަތީޖާ ހަމަހަމަކުރިއެވެ. އަދި އެއަށްފަހު ފުވައްމުލަކު ސިޓީއިން މެޗުގައި ލީޑު ނެގިއެވެ. އެއީ  އެ ޓީމުގެ ބިދޭސީ މިޑްފީލްޑަރު، އަހުމަދު މަހުމޫދު ފައްތާހު ހިލޭޖެހުމަކުން އަލިފުށީގެ ގޯލު ކުރިމައްޗަށް ނެގި ބޯޅައެއް ހުސެއިން ނިހާންގެ ބޮލުގައި ޖެހިފައި ބައިކޮޅަށް ވަތް ގޯލެކެވެ. 

އަލިފުށިން މެޗުގެ ނަތީޖާ ހަމަހަމަކުރީ އަހުމަދު ޝަމީޒްގެ ގޯލަކުން، މެޗުގެ ދެވަނަ ހާފުގައެވެ.   

ޕެނަލްޓީ ޝޫޓް-އައުޓްގައި ފުވައްމުލަކު ސިޓީއަށް ނާކާމިޔާބުވެފައި ވަނީ އެ ޓީމުގެ ދެވަނަ ޕެނަލްޓީ އާއި ތިން ވަނަ ޕެނަލްޓީއެވެ. އެ ޕެނަލްޓީތައް ޖެހުމަށް މަސައްކަތްކުރީ ސާދު ނިޒާރު އާއި ފައްތާހު އެވެ.  އެ ޓީމުން ޕެނަލްޓީ ކާމިޔާބު ކޮށްފައިވަނީ މުހައްމަދު ހަފީޒް އާއި އަބްދުﷲ ރަޝީދު އާއި އަލީ ޝަމާލް އަބްދުﷲއެވެ. 

އަލިފުށި ޓީމަށް ކާމިޔާބު ނުކުރެވުނީ އަހުމަދު ވިޖުދާން ޖެހި ޕެނަލްޓީ އެކަންޏެވެ. އެ ޓީމުގެ ކާމިޔާބުކޮށްފައި ވަނީ އިބްރާހިމް ސަލާމް، މުހައްމަދު ރަޝީދު (ހޮކޭ)، ނިހާޓް އަދި އަހުމަދު ހުސާމް ވަނީ ޕެނަލްޓީ ކާމިޔާބު ކޮށްފައެވެ.

ފައިނަލް މެޗުގައި އަލިފުށިން ނިކުންނާނީ އައްޑޫ ސިޓީއާ ދެކޮޅަށެވެ.