ޚަބަރު
ތަހުޤީޤު ކުރަމުންދާ ބިންވެރިޔާ ސްކީމްގެ މައްސަލައާއި ގުޅިގެން 20 މީހުން ފުރުން މަނާކުރުމުގެ އަމުރަށް އެދިއްޖެ
ފުރުން މަނާކުރުމުގެ އަމުރަށް އެދުނު މީހުންގެ ތެރޭގައި ފަޟުލް އަދި ފަޒީލްވެސް ހިމެނޭ.
ދިވެހި ފުލުހުންގެ ޚިދުމަތުން މިހާރު ތަހުޤީޤު ކުރަމުންދާ ބިންވެރިޔާ ސްކީމްގެ މައްސަލާގައި 20 މީހަކު ފުރުން މަނާ ކުރުމުގެ އަމުރަށް އެދިފައިވާ ކަމަށް ފުލުހުން ބުނެފިއެވެ.
ދިވެހި ފުލުހުންގެ ޚިދުމަތުން ބުނެފައިވަނީ ފުލުހުން ތަހުޤީޤު ކުރަމުންދާ ބިންވެރިޔާ ހައުސިންގ ސްކީމްއާ ގުޅުންހުރި މައްސަލައާ ގުޅިގެން ޖުމްލަ 20 މީހަކު ފުރުން މަނާކުރުމުގެ އަމުރަކަށް އެދިފައިވާނެ ކަމަށެވެ.
އެމީހުންގެ ތެރޭގައި އިބްރާހިމް ފަޟުލް ރަޝީދާއި އޭނާގެ ބޭބެ މުޙައްމަދު ފަޒީލް ރަޝީދުވެސް ހިމެނޭކަމަށް ފުލުހުން ވަނީ ބުނެފައެވެ.
ފުލުހުން ތަހުޤީޤު ކުރަމުންދަނީ ބިންވެރިޔާ ސްކީމްގެ ދަށުން ގޯތި ލިބިފައިނުވާ ބަޔަކަށް ގޯތި ދީފައިވަ މައްސަލައެކެވެ.
މިމައްސަލާގައި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން މިހާރު ވަނީ އެޗްޑީސީގެ ބޯޑު މެންބަރުންގެ ތެރެއިން ޗެއަރމަން ފިޔަވައި ހުރިހާ މެންބަރުން ސަސްޕެންޑްކޮށްފައެވެ. އޭގެ ތެރޭގައި އެކުންފުނީގެ މެނޭޖިންގ ޑިރެކްޓަރ ފަޟުލް ރަޝީދުވެސް ހިމެނެއެވެ.
މީގެ އިތުރުން އެމްޑަބްލިއުއެސްސީންވަނީ އެކުންފުނީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދުވެސް ސަސްޕެންޑްކޮށްފައެވެ. ފަޒީލް އަކީ ފަޟުލްގެ އެއްބަނޑު އެއްބަފާ ބޭފުޅެކެވެ.ފުލުހުން ތަހުޤީޤުކުރަމުންދަނީ ޑޮކިއުމަންޓުތަކެއް ފޯޖުކޮށްފައިވާ ކަމަށް ތުހުމަތު ކުރެވޭ މައްސަލައެކެވެ. މިއީ ފުލުހުންނަށް ލިބިފައިވާ މަޢުލޫމާތަކާ ގުޅިގެން ފުލުހުން އިސްވެ ފެށި ތަހުޤީޤެއް ކަމަށް ފުލުހުން ވަނީ ބުނެފައެވެ.
މިކަމުގެ މަޢުލޫމާތު ހިއްސާކުރުމަށް ފުލުހުން ވަނީ ރޭ ނޫސްވެރިންގެ ބައްދަލުވުމެއްވެސް ބާއްވަވައިފައެވެ.
މިބައްދަލުވުމުގައި މައްސަލައާއި ގުޅުންހުރި 6 ފަރާތަކާއި އެހާތަނަށް ސުވާލު ކުރެވުނު ކަމަށާއި ތަހުޤީޤަށް ބޭނުންވާ ޑިޖިޓަލް ހެއްކާއި ލިޔެކިޔުންތައް ހޯދައި އެލިޔެކިޔުންތައް ތަހުލީލު ކުރަމުންދާ ކަމަށް ފުލުހުން ވަނީ ވިދާޅުވެފައެވެ.
ރޭގެ ނޫސްވެރިންގެ ބައްދަލުވުމާއި ހަމައަށް އެއްވެސް މީހެއް ފުރުން މަނާކުރުމަށް އަމުރަކަށް އެދިފައި ނުވާއިރު މިއަދުގެ މިހާތަނަށް 20 މީހެއް ފުރުން މަނާކުރުމުގެ އަމުރަށް ފުލުހުން އެދިފައިވުމަކީ މިތަހުޤީޤަށް ލިބިގެން ދިޔަ ވަރަށް ބޮޑު ކުރިއެރުމެއްކަމަށް ބެލެވެއެވެ.
އަދި މިފަދަ ކޮރަޕްޝަނަށް މަގުފަހިފައިވާ ޢަމަލުތައް ހުއްޓުވުމަށް މިއަދުގެ ސަރުކާރާއި ފުލުހުން ދެއްވާ އަހަންމިއްޔަތުކަން މިކަމުން ވަރަށް ބޮޑަށް ދޭހަވެގެންދެއެވެ.
