ގޯލްޑް ކަޕާއެކު ގަލޮޅު ދަނޑަށް ދިރުން ލިބިއްޖެ: މަރޭ

މިހާރު މާލޭގައި ކުރިޔަށްދާ ގޯލްޑް ކަޕާއެކު ގަލޮޅު ދަނޑަށް ދިރުން ލިބިއްޖެކަމަށް، ދިވެހިރާއްޖޭގެ ކުޅިވަރަށް ގިނަ ހިދުމަތްތަކެއް ކޮށްދެމުން އަންނަ އަހުމަދު މަރުޒޫގު (މަރޭ) ބުނެފިއެވެ.

އިންޓަނޭޝަނަލް އޮލިމްޕިކް އެކަޑެމީ އާއި މޯލްޑިވްސް އޮލިމްޕިކް ކޮމެޓީ އާއި އޮލިމްޕިކް ކައުންސިލް އޮފް އޭޝިއާގެ އިތުރުން، ވިކްޓްރީ ސްޕޯޓްސް ކަލްބުގައި ހިދުމަތްކޮށްފައިވާ މަރޭ، ސޯޝަލް މީޑިއާގައި ކުރި ޕޯސްޓެއްގައި ބުނީ، ގޯލްޑް ކަޕަކީ ފަހުގެ ތާރީހެއްގައި ރާއްޖޭގެ ފުޓުބޯޅައަށް އައި އެންމެ ބޮޑު ދިރުން ކަމަށެވެ. އެކަމުގެ ހެއްކަކީ މުބާރާތުގައި ކުޅޭ ކުޅުންތެރިން ދަނޑުމަތީގައި ދައްކަމުން އަންނަ މޮޅު ހުނަރުގެ އިތުރުން، މެޗުތައް ކުޅޭ ވަގުތު ދަނޑު ބޭރުން ފެންނަ ޖޯޝާ ފޯރި ކަމަށެވެ.

ގޯލްޑް ކަޕަކީ މުޅި ރާއްޖެއަށް ހުޅުވާލައިގެން، މަޝްހޫރު ފުޓްބޯޅަ ކޯޗު، މުހައްމަދު ޝާޒްލީ (ޝާޒް)ގެ އިސްނެގުމާ އެކު، އޭނާ ހިމެނޭހެން ހިންގާ 90 ޕްލަސް އާއި ސްޕޯޓްސް މިނިސްޓްރީން ގުޅިގެން ބާއްވާ މުބާރާތެކެވެ. މި ފަހަރުގެ މުބާރާތުގައި 22  ޓީމު ބައިވެރިވާން ނަން ހުށަހެޅި ނަމަވެސް، ފަހުން ފަސް ޓީމެއް ނަން ނެގުމުން، މުބާރާތް ކުރިޔަށް ދަނީ 17 ޓީމާއެކުއެވެ. 

އަދި މުބާރާތުގެ ޗެމްޕިއަން ޓީމަށް އެއް ލައްކަ ރުފިޔާގެ ފައިސާގެ އިނާމެއް ހުށަހަޅާފައިވާއިރު، ރަނަރަޕް ޓީމަށް ވަނީ ބައި ލައްކަ ރުފިޔާ ހުށަހަޅާފައެވެ.

މި މުބާރާތުގައި ވާދަކުރާ ކޮންމެ ޓީމެއް ވެސް ވަކި ރަށަކަށް ނިސްބަތްވާއިރު، ރަށުން ބޭރު ދެ ކުޅުންތެރިން ޓީމުގައި ހިމެނުމުގެ ފުރުސަތު އޮވެއެވެ. އެހެންކަމުން، މެޗުތައް ކުޅެމުންދާއިރު ފެންނަނީ، އެ ރަށަކަށް ނިސްބަތްވާ ބަޔަކު ނިކުމެ، އެ ރަށު ޓީމު މޮޅުކޮށްދޭން 12 ވަނަ ކުޅުންތެރިޔާގެ ގޮތުގައި ބުރަ މަސައްކަތްތަކެއް ކުރަމުންދާ މަންޒަރެވެ.

މަރޭގެ ސޯޝަލް މިޑިއާ ޕޯސްޓުގައި ބުނެފައިވާ ފަދައިން، ކުދިބޮޑު އެންމެން ހިމެނޭހެން، މި މުބާރާތުގެ މެޗުތަކުގައި އާއިލާތައް ވެސް ދަނޑަށް ގޮސް، ވަރަށް ގަދަޔަށް ފޯރިމަރާތަން ފެނެއެވެ. އަދި ޓީމުތައް ރަމްޒުކޮށްދޭ ކުލަތައް އެކި ސިފަސިފައިގައި ބޭނުންކޮށް، ފުޓުބޯޅައިގެ ބޮޑު އީދެއް އައިސްގެން އުޅޭފަދަ ފޯރިއެއް ދައްކުވައިދެއެވެ. އެންމެންވެސް ބޭނުންވަނީ ރަށު ޓީމު މޮޅުވާށެވެ. އެ ރަށަކީ ފުޓުބޯޅައިގެ ބްރޭންޑަކަށް ހަދާށެވެ. 

އެހެންކަމުން، މި މުބާރާތް ވެގެން ގޮސްފައި މިވަނީ، އެކުވެރިކަމާއި އެއްބައިވަންތަކަން ދައްކުވައިދޭ މުބާރާތަކަށެވެ. ދިވެހި ފުޓުބޯޅައަށާއި ގަލޮޅު ދަނޑަށް ދިރުން ގެނުވި މުބާރާތަކަށެވެ. މަރޭ ބުނެފައިވަނީ ފުޓުބޯޅައިގެ ރީތި ކަމަކީ މިއީ ކަމަށެވެ. އެންމެންގެ ބައިވެރިވުމާއެކު، އެކުވެރިކަމާ އެއް ބައެއްވަންތަކަން ފެނުމެވެ. އަދި ސަޕޯޓަރުންނާއި ނުލާ، ފުޓުބޯޅައިގައި ދިރުމެއް ނޯންނާނެ ކަމަށާއި، ދިވެހި ފުޓުބޯޅައިން މިފަހަކުން ފެންނަމުން މި ދިޔައީ، ސަޕޯޓަރުންނާއި ނުލައި ކުޅިވަރުގެ ރޫހު ގެއްލި، ގަލޮޅު ދަނޑު ފަޅުވެގެން ދިޔަތަން ކަމަށެވެ. 

ކުޅިވަރަށް ކޮށްފައިވާ ހިދުމަތުގެ އަގުވަޒަން ކުރުމުގެ ގޮތުން މި އަހަރުގެ ސްޕޯޓްސް އެވޯޑު ވެސް ހާސިލްކޮށްފައިވާ މަރޭ އިތުރަށް ބުނެފައިވަނީ، މި މުބާރާތް ބޮޑަށް ފުރިހަމަވެ، ރަގަޅު ނިޒާމެއްގެ ތެރެއިން މެދުނުކެނޑި ކުރިޔަށްދާ މަންޒަރު ފެންނަން އެދޭކަމަށެވެ. 

ގޯލްޑް ކަޕްގައި މި ފަހަރު ކުޅެނީ މާލެ ސިޓީ، ބ. އޭދަފުށި، ތ. ތިމަރަފުށި، ބ. ތުޅާދޫ ، ފުވައްމުލައް ސިޓީ، ދ. ކުޑަހުވަދޫ، ގދ. ފަރެސްމާތޮޑާ، ދ. މީދޫ، ހއ. ދިއްދޫ، އައްޑޫ ސިޓީ، ޅ. ކުރެންދޫ، ކ. ހުރާ، ކ. ގުރައިދޫ، ޅ. ކުރެންދޫ، ކ. މާފުށި، ބ. ކެންދޫ އަދި ރ. އަލިފުށްޓެވެ.

ބުރާސްފަތި ދުވަހުގެ ނިޔަލަށް މުބާރާތުގެ ކުއާޓާ ފައިނަލުގެ ހުރިހާ މެޗެއް ވަނީ ނިމިފައެވެ. އަދި ސެމީ ފައިނަލަށް ދަތުރުކޮށްފައިވަނީ ބ. އޭދަފުށި، އައްޑޫ ސިޓީ، މާލޭ ސިޓީ އަދި ރ. އަލިފުށްޓެވެ.