އަކްރަމާއެކު ހައުސިން މިނިސްޓްރީގެ ކުރީގެ ބައެއް ވެރިންގެ ޕާސްޕޯޓު ހިފަހައްޓައިފި

ބިންވެރިޔާ ސްކީމްގެ މައްސަލައާ ގުޅިގެން، ހައުސިން މިނިސްޓްރީގެ ކުރީގެ ސްޓޭޓް މިނިސްޓަރ އަކްރަމް ކަމާލުއްދީން ހިމެނޭހެން، އެ މިނިސްޓްރީގެ ބައެއް އިސްބޭފުޅުންގެ ޕާސްޕޯޓް ހިފަހައްޓައިފިއެވެ. އެ ބޭފުޅުންގެ ޕާސްޕޯޓު ހިފެހެއްޓީ، އެ މައްސަލައާ ގުޅިގެން ދިވެހި ފުލުހުންގެ ޚިދުމަތުން މިހާރު ކުރިޔަށްގެންދާ ތަހުގީގުގެ ތެރެއިންނެވެ.

މީގެ އިތުރުން، މި މައްސަލައާ ގުޅިގެން ޖުމްލަ 20 މީހަކު ފުރުން މަނާކުރުމުގެ އަމުރަކަށް ފުލުހުން އެދިފައިވެއެވެ. އެމީހުންގެ ތެރޭގައި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރ އިބްރާހިމް ފަޟުލް ރަޝީދާއި އޭނާގެ ބޭބެ މުޙައްމަދު ފަޒީލް ރަޝީދު ވެސް ހިމެނޭކަމަށް ފުލުހުން ވަނީ ބުނެފައެވެ.

މި މައްސަލާގައި އެންމެ ފަހުން ޕާސްޕޯޓު ހިފެހެއްޓީ އަކްރަމް ކަމާލުއްދީނާ، ކުރިން އެ މިނިސްޓްރީގައި މަސައްކަތްކުރި ހަތަރު ބޭފުޅެއްގެ ޕާސްޕޯޓެވެ. އޭގެ ތެރޭގައި ހިމެނެނީ:

• އަކްރަމް ކަމާލުއްދީން (ކުރީގެ ސްޓޭޓް މިނިސްޓަރު)
• މުހައްމަދު އާރިފް (ކުރީގެ ސީނިއާ އެގްޒެކެޓިވް ޑިރެކްޓަރު)
• ލިރުގާމް ވަހީދު (ކުރީގެ ސީނިއާ އެގްޒެކެޓިވް ޑިރެކްޓަރު)
• އަހްމަދު ވިޝާން ނަސީމް (ޑިރެކްޓާ ޖެނެރަލް)

މި ލިސްޓުގައި ހިމެނެނީ ބިންވެރިޔާ އަދި ގެދޮރުވެރިޔާ ސްކީމުން ގޯއްޗާއި ފްލެޓް ދޫކުރުމުގެ ކަންކަމުގައި ކުރިން އިސްކޮށް އުޅުއްވި ބޭފުޅުންނެވެ. އަދި މި ބޭފުޅުންގެ ތެރޭގައި ހިމެނޭ އަހުމަދު ވިޝާންއަކީ ހައުސިން މިނިސްޓްރީގެ މިހާރުގެ ޑިރެކްޓާ ޖެނެރަލްގެ މަގާމުގައި ހުންނެވި ބޭފުޅާއެވެ. 

މި މައްސަލައާ ގުޅިގެން ބުރާސްފަތި ދުވަހުގެރޭ ފުލުހުން ބޭއްވި ނޫސްވެރިންގެ ބައްދަލުވުމުގައި ބުނީ، އެ ވަގުތާ ހިސާބަށް ތަހުގީގަށް ފާހަގަވެފައިއޮތް ގޮތުން، ފްލެޓް ކޮމެޓީއިން ދޫކޮށްފައިވާ ޑޮކިޔުމެންޓްތައް ކަމަށްބުނާ ޑޮކިޔުމެންޓުތަކަކީ ކުރީސަރުކާރުން ދޫކޮށްފައިވާ ޑޮކިޔުމެންޓްތަކެކެވެ. 

މި ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ސްޕްރިޑެންޓް ރަޖުނީ ޝުޢައިބް ވިދާޅުވީ، ފޯޖުކޮށްފައިވާ ލިޔުންތަކަކީ ކޮންބަޔަކު ދޫކޮށްފައިވާ ލިޔުންތަކެއް ކަން އަދި "ރޫލްއައުޓް" ނުކުރައްވާ ކަމަށެވެ. ނުވަތަ ލިޔުންތަކަކީ ފޯޖު ކޮށްފައިވާ ލިޔުންތަކެއްކަންވެސް އަދި ނުނިންމަވާ ކަމަށާއި މިހާރު ކުރަމުންދަނީ އެކަންކަން ދެނެގަތުމުގެ މަސައްކަތް ކަމަށެވެ. 

މި މައްސަލައާ ގުޅިގެން އެޗްޑީސީގެ ޗެއާމަން އަހްމަދު ނާސިފް (ޑީޑީ) ފިޔަވައި، ބޯޑުގެ ހުރިހާ ބޭފުޅުން ވަނީ ސަސްޕެންޑުކޮށްފަ އެވެ. އަދި، އެ ބޭފުޅުންގެ އިތުރުން މި މައްސަލައާ ގުޅުންހުރި ހައުސިން މިނިސްޓްރީގެ 10 ބޭފުޅެއް ވެސް ވަނީ ސަސްޕެންޑުކޮށްފައެވެ.