މާލޭގައި ފެންބޮޑުވެ އާންމުންނަށް ދަތިތަކާ ކުރިމަތިވެއްޖެ

މާލޭގައި ވިއްސާރަވެ ފެންބޮޑުވުމުގެ ސަބަބުން އާންމުންނަށް ބޮޑެތި ދަތިތަކާ ކުރިމަތިވެއްޖެއެވެ. އިއްޔެއިން ފެށިގެން މެދުނުކެނޑި ވެހެމުންދާ ވާރޭގެ ސަބަބުން މުޅި މާލޭގައި ފެންބޮޑުވެ، އާންމުންގެ ދިރިއުޅުމަށާއި ދަތުރުފަތުރަށް ވަނީ ބޮޑެތި ހުރަސްތަކެއް ކުރިމަތިވެފައެވެ.

މާލޭގެ އެކި ސަރަޙައްދުތަކުގައި ފެންބޮޑުވެފައިވާ މިންވަރު އިންތިހާއަށް ގޮސް، ބައެއް ގޭބިސީތަކާއި ފިހާރަތަކަށް ފެންވަދެފައިވާކަން ފާހަގަކުރެވެއެވެ. މީގެ އިތުރުން، ފެންބޮޑުވުން ކޮންޓްރޯލްކުރުމަށްޓަކައި ބައެއް ސަރަޙައްދުތަކުގައި ވެލިބަސްތާ ޖަހާފައިވާކަންވެސް ފާހަގަކުރެވެއެވެ.

މި ޙާލަތާ ގުޅިގެން، އެމްއެންޑީއެފްގެ ފަޔަރ އެންޑް ރެސްކިޔު ސަރވިސްގެ ސިފައިން ވަނީ ފެން ހިންދުމުގެ މަސައްކަތުގައި ހަރަކާތްތެރިވެފައެވެ. އެމްއެންޑީއެފުން މަޢުލޫމާތު ދެއްވާފައިވާ ގޮތުގައި، މާލޭގެ ފަސް ސަރަޙައްދެއްގައި 16 ޕަންޕު ބަހައްޓައިގެން ފެން ހިންދުމުގެ މަސައްކަތް ކުރިއަށްދާކަމަށް ވިދާޅުވިއެވެ. މި ސަރަޙައްދުތަކުގެ ތެރޭގައި ވެސްޓްޕާކު، އައިޖީއެމްއެޗް، ވިލިނގިލީ ފެރީ ޓަރމިނަލް، ދިރާގު އަދި ޖެލީ ޕިއްޒާ ސަރަޙައްދު ހިމެނެއެވެ.

މޫސުމާބެހޭ ޤައުމީ އިދާރާއިން ވަނީ މި ހަފްތާ ބަންދުގައި މުޅި ރާއްޖެއަށް ވިއްސާރަވާނެކަމަށް ލަފާކޮށްފައެވެ. އެހެންކަމުން، އެ އިދާރާއިން ވަނީ މޫސުމަށް ސަމާލުވެ، ނެރޭ އެލާޓްތަކަށް ސަމާލުވުމަށް އާންމުންނަށް އިލްތިމާސްކޮށްފައެވެ.

ފެންބޮޑުވެފައިވާ ސަރަހައްދުތަކުގައި ވެލިބަސްތާ ޖެހުމުގެ މަސައްކަތް @MNDF_Official އަދި @MaleCitymv
އިން ވަނީ ފަށާފައި! pic.twitter.com/01wK6b86Ft

— NDMA Maldives (@NDMAmv) December 21, 2024