އެންމެ ބޮޑަށް ވާރޭ ވެހިފައިވަނީ މާލެއަށް: 24 ގަޑިއިރުގައި 136 މިލިމީޓަރު

ފާއިތުވި 24 ގަޑިއިރުގެ ތެރޭގައި ރާއްޖޭގެ އެންމެ ގިނަ އަދަދަކަށް ވާރޭވެހިފައިވަނީ މާލެއަށް ކަމަށް މޫސުމާބެހޭ ޤައުމީ އިދާރާގެ ތަފާސްހިސާބުތަކުން ދައްކައިފިއެވެ. މިގޮތުން ހުކުރު ދުވަހުގެ ހެނދުނު 8:00 އިން ފެށިގެން ހޮނިހިރު ދުވަހުގެ ހެނދުނު 8:00 އާ ހަމައަށް މާލެއަށް ވެހިފައިވަނީ 136.5 މިލިމީޓަރުގެ ވާރޭއެވެ.

މޫސުމާބެހޭ ޤައުމީ އިދާރާއިން ހާމަކުރި މަޢުލޫމާތުގައިވާ ގޮތުން، މި މުއްދަތުގައި ދެވަނައަށް އެންމެ ގިނައިން ވާރޭވެހިފައިވަނީ ހުޅުލެއަށެވެ. އެއީ 117.4 މިލިމީޓަރުގެ ވާރޭއެވެ. އަދި ތިންވަނައަށް އެންމެ ގިނައިން ވާރޭވެހުނީ ބ. ދަރަވަންދޫއަށް ކަމަށާއި، އެރަށަށް 111.5 މިލިމީޓަރުގެ ވާރޭވެހިފައިވާ ކަމަށް އިދާރާއިން ބުނެފައިވެއެވެ.

މި ވިއްސާރައަކީ ރާއްޖެއާ ކައިރި ދެ ސަރަހައްދެއްގައި އުފެދިފައިވާ ކޮޅިގަނޑެއްގެ ސަބަބުން ކުރަމުންދާ ވިއްސާރައެކެވެ. މިހާރު ރާއްޖޭގެ ހުރިހާ ސަރަހައްދަކަށްވެސް ވާރޭވެހެމުންދާ ކަމަށް އިދާރާއިން ފާހަގަކޮށްފައިވެއެވެ.

މޫސުން ގޯސްވެފައިވާތީ، ކަނޑު ދަތުރުފަތުރުކުރާ ފަރާތްތަކުން މޫސުމަށް ސަމާލުކަން ދިނުމަށް ކަމާބެހޭ ފަރާތްތަކުން އިލްތިމާސްކޮށްފައިވެއެވެ. އަދި މިހާރު ކުރަމުންދާ ވިއްސާރަ އަލިވާނެ ކަމަށް މޫސުމާބެހޭ ޤައުމީ އިދާރާއިން ލަފާކޮށްފައިވަނީ އަންނަ ހޯމަ ދުވަހު ކަމަށްވެސް މަޢުލޫމާތު ދީފައިވެއެވެ.

Automatic weather station in Male' recorded 136.5mm of rainfall during the past 24hrs.

Visit our viber group for daily rainfall information, weather forecast and alerts: https://t.co/xWbPDxfjYi pic.twitter.com/dPvpKFot4A

— Maldives Meteorology (@MetMaldives) December 21, 2024