އަންހެނުންގެ ވޯލްޑް ކަޕް ދެއްކުމުގެ ހައްޤު ނެޓްފްލިކްސްއަށް

ފީފާއިން ހުކުރު ދުވަހު އިޢުލާން ކުރި ގޮތުގައި، 2027 އަދި 2031 ވަނަ އަހަރު ބޭއްވޭ އަންހެނުންގެ ވޯލްޑް ކަޕް އެމެރިކާގައި ދެއްކުމުގެ ހައްޤު ނެޓްފްލިކްސްއަށް ލިބިއްޖެއެވެ. މިއީ ނެޓްފްލިކްސްއިން ކުޅިވަރެއް ސީދާ ދެއްކުމުގެ ހައްޤު ހޯދި ފުރަތަމަ ފަހަރެވެ.

ފީފާގެ ރައީސް ޖިއާނީ އިންފަންޓީނޯ ވިދާޅުވި ގޮތުގައި، ނެޓްފްލިކްސްއަކީ ފީފާގެ އައު ދިގު މުއްދަތުގެ ޕާޓްނަރެއްގެ ގޮތުގައި، އަންހެނުންގެ ފުޓްބޯޅަ ކުރިއެރުވުމަށް ވަރަށް ބޮޑު އިލްތިޒާމެއް ދައްކާފައިވާ ކުންފުންޏެކެވެ.

2027 ވަނަ އަހަރުގެ ވޯލްޑް ކަޕް ބޭއްވޭނީ ބްރެޒިލްގައެވެ. 2031 ވަނަ އަހަރުގެ މުބާރާތް ބާއްވާނެ ތަނެއް އަދި ކަނޑައެޅިފައެއް ނުވެއެވެ. ނަމަވެސް އިނގިރޭސިވިލާތާއި، އެހެން ބްރިޓިޝް ފެޑެރޭޝަންތަކާއި އެމެރިކާ ގުޅިގެން ހުށަހަޅާ ބިޑެއް އަދި އެމެރިކާ ވަކިން ހުށަހަޅާ ބިޑެއް އަންނާނެ ކަމަށް ލަފާކުރެވެއެވެ.

ނެޓްފްލިކްސްއިން ކުޅިވަރު ދެއްކުމުގެ ފުރަތަމަ ފިޔަވަޅުތައް އަޅަން ފަށާފައިވެއެވެ. މީގެ ތެރޭގައި ފާއިތުވި ދުވަސްތަކުގައި މައިކް ޓައިސަންއާއި ޖޭކް ޕޯލް ދެމެދު ބޭއްވުނު ބޮކްސިންގ މެޗު ހިމެނެއެވެ. މި މެޗު 60 މިލިއަން ގޭބިސީއިން ބެލިކަމަށް ނެޓްފްލިކްސްއިން ބުނެއެވެ. ނަމަވެސް ޓެކްނިކަލް މައްސަލަތަކެއް ދިމާވި ކަމަށް ބައެއް ފަރާތްތަކުން ޝަކުވާ ކޮށްފައިވެއެވެ.

މީގެ އިތުރުން، އަންނަ ހަފްތާގެ ޑިސެމްބަރު 25 ގައި ދެ އެން.އެފް.އެލް މެޗެއް ދެއްކުމަށް ނެޓްފްލިކްސްއިން ހަމަޖައްސާފައިވެއެވެ. 

އިނގިރޭސިވިލާތުގައި އަންހެނުންގެ ވޯލްޑް ކަޕަކީ ހިލޭ ޗެނަލްތަކުން ދެއްކުމަށް ހުޅުވާލަންޖެހޭ މުހިންމު ކުޅިވަރު ހަރަކާތްތަކުގެ ތެރޭގައި ހިމެނޭ ކަމެކެވެ. 2023 ވަނަ އަހަރުގެ ވޯލްޑް ކަޕް ދެއްކީ ބީ.ބީ.ސީ އާއި އައި.ޓީ.ވީ އިންނެވެ. ފައިނަލް މެޗުގައި ސްޕެއިން އިނގިރޭސިވިލާތާ ކުޅުނު މެޗު ބެލި އެންމެ ގިނަ މީހުންގެ އަދަދު 12 މިލިއަނަށް އަރާފައިވެއެވެ.