ދުނިޔެ / ވިޔަފާރި

ސައުދީ އަރަބިއްޔާއިން ކޮކާކޯލާއާ ވާދަކުރާނެ އައު ބުއިމެއް ތަޢާރަފުކޮށްފި

ސައުދީ އަރަބިއްޔާއިން ކޮކާކޯލާއާ ވާދަކުރާނެ އައު ބުއިމެއް ތަޢާރަފުކޮށްފި

މިލާފް ކޯލާ ފޮޓޯ: އިންޓަނެޓް

އާމިނަތު ޔުމްނާ

އާމިނަތު ޔުމްނާ

21 ޑިސެމްބަރު 2024، 10:45

21 ޑިސެމްބަރު 2024، 10:45

މިލާފް ކޯލާގެ ނަމުގައި ސައުދީ އަރަބިއްޔާއިން އައު ބުއިމެއް ތަޢާރަފުކޮށްފިއެވެ. މި ބުއިމަކީ ދުނިޔޭގެ ބާޒާރުގައި މަޝްހޫރު ކޯކާއާ ވާދަކުރާނެ ބުއިމެއް ކަމަށް ބެލެވެއެވެ.

ރިޔާދު ޑޭޓް ފެސްޓިވަލްގައި މިލާފް ކޯލާ ތަޢާރަފުކުރީ ސައުދީ އަރަބިއްޔާގެ ޕަބްލިކް އިންވެސްޓްމަންޓް ފަންޑުގެ ސަބްސިޑިއަރީއެއް ކަމަށްވާ ތުރާތު އަލް-މަދީނާގެ ސީއީއޯ ބަންދަރު އަލް-ޤަހްޠާނީ އާއި ސައުދީ އަރަބިއްޔާގެ ދަނޑުވެރިކަމާބެހޭ ވަޒީރު އަބްދުއްރަޙްމާން އަލް-ފަދްލީއެވެ.

އާންމު ސޮފްޓް ޑްރިންކްތަކާ ޚިލާފަށް މިލާފް ކޯލާ އުފައްދާފައިވަނީ ކަދުރުންނެވެ. މިއީ ދުނިޔޭގައި ކަދުރުން އުފައްދާފައިވާ ފުރަތަމަ ބުއިން ކަމަށް ބުނެވެއެވެ. މި ބުއިމުގައި އިތުރު ހަކުރެއް ނުހިމެނޭ ކަމަށާއި، އާންމު ފިޒީ ބުއިންތަކަށްވުރެ މިއީ ސިއްޙަތަށް ފައިދާ ހުރި ބުއިމެއް ކަމަށް އުފެއްދި ފަރާތުން ބުނެއެވެ.

މިލާފް ކޯލާ އުފެއްދުމަށް ބޭނުންކުރަނީ ސައުދީ އަރަބިއްޔާގައި އުފައްދާ ކަދުރެވެ. މިކަމުން ތިމާވެށްޓަށް ކުރާ އަސަރު ކުޑަވާނެ ކަމަށާއި، މިއީ ސައުދީ އަރަބިއްޔާގެ ވިޝަން 2030 ގެ ލަނޑުދަނޑިތަކާ އެއްގޮތްވާ ކަމެއް ކަމަށް ބުނެވެއެވެ.

ސައުދީ އަރަބިއްޔާއަކީ ދުނިޔޭގެ އެންމެ ބޮޑެތި ކަދުރު އެކްސްޕޯޓަރުންގެ ތެރޭގައި ހިމެނޭ ޤައުމެކެވެ. އަދި މެދުއިރުމަތީގައި ކަދުރަކީ ސިއްޙަތަށް ވަރަށް ފައިދާ ހުރި އެއްޗެއްގެ ގޮތުގައި ބެލެވެއެވެ.

ކަދުރުން އިތުރު ބުއިންތައް، އޭގެ ތެރޭގައި އެނަރޖީ ޑްރިންކްތައްވެސް އުފެއްދުމަށް ރޭވިފައިވާ ކަމަށް އަލް-މަދީނާއިން ބުނެފައިވެއެވެ. މިކަމުގެ މަޤްޞަދަކީ ކަދުރަކީ އާންމު ކެއުންތަކަށްވުރެ ބޭނުންކުރެވޭނެ ގޮތްތައް ގިނަ އެއްޗެއްކަން ބައިނަލްއަޤްވާމީ ބާޒާރަށް ދެއްކުމެވެ.

ޣައްޒާގައި އިޒްރޭލުން ހިންގަމުންދާ ހަނގުރާމައާ ގުޅިގެން، އެމެރިކާގެ ކުންފުނިތަކުގެ ތެރެއިން އިޒްރޭލާ ގާތް ގުޅުމެއް އޮތް ކަމަށް ބެލެވޭ ކުންފުނިތަކުގެ ބޮއިކޮޓް ފެށިފައިވާއިރު، ކޯލާއަކީ މި ބައިކޮޓްގެ ޝިކާރައަކަށްވެފައިވާ އެއް ކުންފުންޏެވެ. މިހެންވުމުން، މިލާފް ކޯލާއަކީ ކޯލާއަށް ބަދަލެއްގެ ގޮތުގައި ބޭނުންކުރެވިދާނެ ބުއިމެއްގެ ގޮތުގައި ބެލެވެއެވެ.
                    

މި ލިޔުން ކިޔާލުމުން

Ads by MSS