ހއ. އިހަވަންދޫގައި ޑޮކްޔާޑެއް ތަރައްޤީކުރުމަށް އެމްޕީއެލާއި ކައުންސިލް ސޮއިކޮށްފި

ހއ. އިހަވަންދޫގައި ޑޮކްޔާޑެއް ތަރައްޤީކުރުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި އެ ރަށު ކައުންސިލާ ދެމެދު އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ ކުންފުނީގެ ސީއީއޯ މުޙައްމަދު ވަޖީހް އިބްރާހީމެވެ. އަދި އިހަވަންދޫ ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އަޙްމަދު ޞަބާޙްއެވެ.

އެމްޕީއެލްގެ ސީއީއޯ ވަޖީހް ވިދާޅުވިގޮތުގައި، މި ޑޮކްޔާޑްގެ މަސައްކަތް ފެށުމަށް އަމާޒު ހިފާފައިވަނީ އަންނަ އަހަރުގެ ކުރީކޮޅުގައެވެ. މި މަޝްރޫޢަށް އިހަވަންދޫއިން 1 ލައްކަ އަކަފޫޓުގެ ބިމެއް ވަނީ ކަނޑައަޅާފައެވެ.

ވަޖީހް އިތުރަށް ވިދާޅުވީ، ރާއްޖޭގައި ބަންކަރިންގެ ޚިދުމަތް ފެށުމާއެކު، މި ސަރަހައްދުން ދަތުރުކުރާ ބޭރުގެ އުޅަނދުތަކުގެ ފަރާތުން ޓެކްނިކަލް އެކިއެކި ކަންކަމަށް އެދޭ މިންވަރު އިތުރުވެފައިވާ ކަމަށެވެ. އެހެންކަމުން މި ޑޮކްޔާޑުން އެ އުޅަނދުތަކަށް ޓެކްނިކަލް ސަޕޯޓް ލިބިގެންދާނެ ކަމަށާއި، އޭގެތެރޭގައި ރިޕެއަރ އެންޑް މެއިންޓަނަންސްގެ ޚިދުމަތްތައް ހިމެނޭ ކަމަށް އޭނާ ފާހަގަކުރެއްވިއެވެ.

މީގެއިތުރުން، އެ ސަރަހައްދަކީ މަސްވެރި އުޅަނދުތައް ގިނަ ސަރަހައްދަކަށްވުމުން، ޑޮކިންގެ ޚިދުމަތް ލިބޭނެ އިންތިޒާމް ހަމަޖައްސައިދިނުމަށް ގިނަ އަދަދެއްގެ މަސްވެރިން އެދެމުންދާކަމަށްވެސް ވަޖީހު ވިދާޅުވިއެވެ. އެހެންކަމުން މި ޑޮކްޔާޑާއެކު މަސްވެރިންނަށްވެސް ފަސޭހަތަކެއް ލިބިގެންދާނެކަން އޭނާ ފާހަގަކުރެއްވިއެވެ.

އެމްޕީއެލް އިން ހއ.އިހަވަންދޫގައި ޑޮކްޔާޑެއް ތަރައްޤީކުރަމަށް އެ ރަށު ކައުންސިލްއާއެކު މިއަދު ވަނީ އެއްބަސްވުމެއްގައި ސޮއިކޮށްފައި. #MPL #portmv #MaldivesPortsLimited pic.twitter.com/OiGMjSLzu9

— Maldives Ports Limited (@Portmv) December 20, 2024

އެމްޕީއެލްއިން ބުނީ، މި މަޝްރޫޢުގެ އަމާޒަކީ 6 މަސްދުވަހުގެ ތެރޭގައި ޑޮކްޔާޑް ނިންމައި ޚިދުމަތްދޭން ފެށުން ކަމަށެވެ. މި ޑޮކްޔާޑް ތަރައްޤީކުރުމުން، އުތުރުގެ ސަރަހައްދުގައި ކަނޑު ދަތުރުފަތުރުގެ ޚިދުމަތްތައް އިތުރަށް ފުޅާވެ، އެ ސަރަހައްދުގެ އިޤްތިޞާދަށް ފައިދާތަކެއް ކުރާނެ ކަމަށް ބެލެވެއެވެ.