ފެންބޮޑުވުމާއި ގުޅިގެން ސިފައިން ވެލިބަސްތާ ޖަހަން ފަށައިފި

ބޯކޮށް ވާރޭވެހި، މާލޭގެ މަގުތަކުގައި ފެން ބޮޑުވުމުގެ ސަބަބުން ވެލި ބަސްތާޖެހުމުގެ މަސައްކަތް ޤައުމީ ދިފާޢީ ބާރުން މިއަދު ފަށައިފިއެވެ.

ޤައުމީ ދިފާޢީ ބާރުން މަޢުލޫމާތު ދެއްވާފައިވާ ގޮތުގައި، ބޯކޮށް ވާރޭވެހި މާލޭގެ މަގުތަކުގައި ފެންބޮޑުވެ، ގޭބިސީތަކަށް ފެންވަންނަމުންދާތީ އެހީތެރިކަން ފޯރުކޮށްދިނުމުގެ މަސައްކަތް ފަށާފައިވެއެވެ. މިގޮތުން ގޭބިސީތަކަށް ފެން ނުވަންނާނެހެން ވެލިބަސްތާ ޖެހުމުގެ މަސައްކަތް ވަނީ ފަށާފައެވެ.

މޫސުމާބެހޭ ޤައުމީ އިދާރާއިން ހާމަކުރައްވާފައިވާ ގޮތުގައި ވޭތުވެދިޔަ 24 ގަޑިއިރު ތެރޭގައި އެންމެ ގިނައިން ވާރޭވެހިފައިވަނީ މާލެއަށެވެ. ވެލިބަސްތާ ޖެހުމުގެ އިތުރުން ސިފައިން ދަނީ ފެން ހިންދުމުގެ މަސައްކަތްވެސް ކުރަމުންނެވެ. މިގޮތުން މާލޭގެ 5 ސަރަހައްދެއްގައި 16 ޕަންޕު ބަހައްޓައިގެން ފެން ހިންދުމުގެ މަސައްކަތް ކުރިއަށްދާކަމަށް ޤައުމީ ދިފާޢީ ބާރުން ވިދާޅުވެފައިވެއެވެ.

ރާއްޖެއާ ކައިރި ދެ ސަރަހައްދެއްގައި ކޮޅިގަނޑެއް އުފެދުމުގެ ސަބަބުން ރާއްޖޭގެ ހުރިހާ ހިސާބަކަށްވެސް ވަނީ މޫސުން ގޯސްވެފައެވެ. މޫސުމާބެހޭ ޤައުމީ އިދާރާއިން ވިދާޅުވާ ގޮތުގައި ހުޅަނގު މޫސުން ނިމި، އިރުވައި މޫސުން ފަށަން ގާތްވެފައިވާތީ ދެ މޫސުން ބައްދަލުވާ ދުވަސްވަރު ކޮޅިގަނޑުތައް އުފެދުމުގެ ފުރުޞަތު ބޮޑެވެ.

އަދި މިހާރު އުފެދިފައިވާ ދެ ކޮޅިގަނޑާއެކު އަންނަ ހޯމަ ދުވަހާ ހިސާބަށް ރާއްޖޭގެ އެކި ހިސާބުތަކަށް މޫސުން ގޯސްވާނެކަމަށް މޫސުމާބެހޭ ޤައުމީ އިދާރާއިން އަންދާޒާކުރައްވައެވެ.