މާލޭގައި ފެންބޮޑުވުމުން ގެއްލުން ލިބުނު 5 ގެއަކުން މީހުން ބަދަލުކުރަން ޖެހިއްޖެ

މާލޭގައި ވިއްސާރަވެ ބޯކޮށް ވާރޭވެހުމުގެ ސަބަބުން މަގުތަކުގައި ފެންބޮޑުވެ، ގޭތެރެއަށް ފެންވަނުމުގެ ސަބަބުން ފަސް ގެއަކުން މީހުން ބަދަލުކުރަން ޖެހިފައިވާކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުދަ ދުވަހު ހާމަކޮށްފިއެވެ.

އެންޑީއެމްއޭގެ ޗީފް އެގްޒެކެޓިވް ޙިސާން ޙަސަން ޕީއެސްއެމް ނިއުސްއަށް މަޢުލޫމާތު ދެއްވަމުން ވިދާޅުވީ، މިހާރު ކުރަމުންދާ ވިއްސާރާގައި މާލޭގެ މަގުތަކުގައި ވަރަށް ބޮޑަށް ފެން ބޮޑުވުމުގެ ސަބަބުން ގިނަ އަދަދެއްގެ ގޭބިސީތަކުން ވެލިބަސްތާ ޖަހައިދިނުމަށް އެދިފައިވާ ކަމަށެވެ. މިކަމަށް އެހީތެރިވުމުގެ ގޮތުން އެންޑީއެމްއޭއިން 5،000 ވެލިބަސްތާ ސިޓީ ކައުންސިލަށް ދޫކޮށްފައިވާކަމަށްވެސް އޭނާ ވިދާޅުވިއެވެ.

ޙިސާން އިތުރަށް ވިދާޅުވީ، ފެންބޮޑުވުމުގެ ސަބަބުން ގެތަކަށް ފެން ވަނުމާ ގުޅިގެން ފަސް ގެއަކުން މީހުން ބަދަލުކުރަން ޖެހިފައިވާ ކަމަށާއި، އޭގެ ތެރެއިން އެއް ގެއެއްގައި ދިރިއުޅެމުންދިޔަ މީހުން ބަދަލުކުރުމުގެ މަސައްކަތް އެންޑީއެމްއޭއާއި މޯލްޑިވްސް ރެޑް ކްރެސެންޓާ ގުޅިގެން ކުރަމުން އަންނަ ކަމަށެވެ.

މޫސުމާބެހޭ ޤައުމީ އިދާރާއިން ހާމަކުރި ގޮތުގައި މިދިޔަ 24 ގަޑިއިރު ތެރޭގައި އެންމެ ގިނައިން ވާރޭ ވެހިފައިވަނީ މާލެއަށެވެ. މިހާރު ރާއްޖެއާ ކައިރި ދެ ސަރަހައްދެއްގައި އުފެދިފައިވާ ކޮޅިގަނޑެއްގެ ސަބަބުން ރާއްޖޭގެ އެކި ހިސާބުތަކަށް ވަނީ ވަރަށް ބޮޑަށް މޫސުން ގޯސްވެފައެވެ. އެ އިދާރާއިން އިންޒާރު ދެމުން ވިދާޅުވެފައިވަނީ ބޯކޮށް ވިއްސާރަކޮށް، ވައިގަދަވެ، އެކި ހިސާބުތަކުގެ ކަނޑުތައް ގަދަވާނެ ކަމަށެވެ.

އަތޮޅުތަކުގެ ރަށްރަށަށް ލިބިފައިވާ ގެއްލުންތައް ދެނެގަތުމަށް ރަށު ކައުންސިލްތަކާ ގުޅުމުގެ މަސައްކަތް ކުރަމުންދާ ކަމަށް ޙިސާން ވިދާޅުވިއެވެ. ނަމަވެސް މިހާތަނަށް މީހުން ބަދަލުކުރަންޖެހޭ ވަރުގެ ގެއްލުމެއް ލިބިގެން އެއްވެސް ރަށަކުން ރިޕޯޓުކޮށްފައިނުވާ ކަމަށް އޭނާ ފާހަގަކުރެއްވިއެވެ.

މޫސުން ގޯސްވުމުގެ ސަބަބުން ލިބިދާނެ ގެއްލުންތަކަށް ދުރާލާ ރައްކާތެރިކަމުގެ ފިޔަވަޅު އެޅުމަށް މޫސުމާބެހޭ ޤައުމީ އިދާރާއިން ވަނީ އާންމުންނަށް އިލްތިމާސްކޮށްފައެވެ.