ގްރީން ފަންޑުގައި 1.6 ބިލިޔަން ރުފިޔާ: ސެޕްޓެމްބަރުގައި 88 މިލިޔަން ލިބިއްޖެ

މިއަހަރުގެ ސެޕްޓެމްބަރު މަހުގެ ނިޔަލަށް ގްރީން ފަންޑުގައި 1.6 ބިލިޔަން ރުފިޔާ ހުރިކަމަށް މާލީ ވުޒާރާގެ ތަފާސް ހިސާބުތަކުން ދައްކައިފިއެވެ. އަދި ސެޕްޓެމްބަރު މަހު އެކަނި ގްރީން ޓެކުހުގެ ގޮތުގައި ދައުލަތަށް 88 މިލިޔަން ރުފިޔާ ލިބިފައިވާކަމަށްވެސް އެ ތަފާސް ހިސާބުތަކުން ހާމަވެއެވެ.

މާލީ ވުޒާރާގެ "ގްރީން ފަންޑް" ރިޕޯޓުގައިވާ ގޮތުން، ގްރީން ޓެކުހުގެ ގޮތުގައި އެންމެ ބޮޑު އަދަދެއް ލިބިފައިވަނީ ރިސޯޓުތަކުންނެވެ. ސެޕްޓެމްބަރު މަހު ރިސޯޓުތަކުން 80.7 މިލިޔަން ރުފިޔާ ލިބިފައިވާއިރު، ގެސްޓްހައުސްތަކުން 4.8 މިލިޔަން ރުފިޔާ، ޓޫރިސްޓު ހޮޓާތަކުން 2.1 މިލިޔަން ރުފިޔާ އަދި ސަފާރީތަކުން 1.3 މިލިޔަން ރުފިޔާ ލިބިފައިވެއެވެ.

ގްރީން ޓެކުހުގެ ގޮތުގައި އެންމެ ގިނަ އަދަދެއް ލިބިފައިވަނީ ކ. އަތޮޅުންނެވެ. އެއަތޮޅުން 31.4 މިލިޔަން ރުފިޔާ ލިބިފައިވާއިރު، ރ. އަތޮޅުން 10.3 މިލިޔަން ރުފިޔާ އަދި އދ. އަތޮޅުން 7 މިލިޔަން ރުފިޔާ ލިބިފައިވެއެވެ.

ގްރީން ޓެކުހަކީ ތިމާވެށްޓާ ގުޅުންހުރި މަސައްކަތްތައް ކުރުމަށް މާލީ އެހީ ހޯދުމަށް، ރާއްޖެ އަންނަ ފަތުރުވެރިންގެ އަތުން ނަގަމުން އަންނަ ޓެކުހެކެވެ. މިހާރު މި ޓެކްސް ނަގަމުންދަނީ ދެ ރޭޓެއްގައެވެ. އެއީ ދުވާލަކަށް 6 އެމެރިކާ ޑޮލަރު އަދި 3 އެމެރިކާ ޑޮލަރެވެ.

އަންނަ އަހަރުގެ ޖަނަވަރީ 1 އިން ފެށިގެން މި ރޭޓުތަކަށް ބަދަލު ގެނައުމަށް ސަރުކާރުން ވަނީ ނިންމާފައެވެ. އެގޮތުން 6 ޑޮލަރުގެ ރޭޓު 12 ޑޮލަރަށް، އަދި 3 ޑޮލަރުގެ ރޭޓު 6 ޑޮލަރަށް މަތިކުރުމަށް ވަނީ ނިންމާފައެވެ. މީގެ އިތުރުން، އުމުރުން 2 އަހަރު ނުވާ ކުޑަކުދިންގެ އަތުން ގްރީން ޓެކްސް ނެގުން އިސްތިސްނާކުރުމަށްވެސް ވަނީ ނިންމާފައެވެ.

މި ބަދަލުތަކާ ގުޅިގެން އަންނަ އަހަރު ގްރީން ޓެކުހުގެ ގޮތުގައި ލިބޭ އާމްދަނީ 95.2 އިންސައްތަ އިތުރުވެ، 963.6 މިލިޔަން ރުފިޔާއަށް އަރާނެކަމަށް ސަރުކާރުގެ "ބަޖެޓް ޕޮޒިޝަން ރިޕޯޓް" ގައި ލަފާކޮށްފައިވެއެވެ.