ކުޅިވަރު

ގޯލްޑް ކަޕްގެ ސެމީ ފައިނަލު މެޗުތަކުގެ ކުރިން، ތަފާތު އިހުސާސްތަކެއް

ގޯލްޑް ކަޕްގެ ސެމީ ފައިނަލު މެޗުތަކުގެ ކުރިން، ތަފާތު އިހުސާސްތަކެއް

ގޯލްޑް ކަޕްގައި ސަޕޯޓަރުން ފޯރިމަރަނީ--- ފޮޓޯ: މިހާރު ސްޕޯޓްސް

މިފްތާޙް މުޙައްމަދު

މިފްތާޙް މުޙައްމަދު

21 ޑިސެމްބަރު 2024، 03:12

21 ޑިސެމްބަރު 2024، 03:12

ހުލާސާ

ސެމީ ފައިނަލަށް ދަތުރުކޮށްފައިވާ ޓީމުތަކުން އުއްމީދުތައް އާކޮށް، ގަލޮޅު ދަނޑުގައި އައިޑެންޓިޓީއެއް އުފެއްދުމުގެ މަސައްކަތް ކުރަމުންދާއިރު، އެ ޓީމުތަކުގެ ސަޕޯޓަރުންގެ އުއްމީދުތަކާއި ހުވަފެންތަކުގައި ހަގީގީ ކުލަޖައްސާ ދިނުމުގެ ބުރަ އުފުލަން ތިބީ ކުޅުންތެރިން.

ގިނަ އަހަރުތަކަކަށްފަހު ގަލޮޅު ދަނޑަށް ދިރުން ގެނުވާފައިވާ ގޯލްޑް ކަޕުގެ ސެމީ ފައިނަލުގެ މެޗުތައް މިއަދަށް ތާވަލުކޮށްފައިވާއިރު، މިއީ ފުޓުބޯޅައަށް ލޯބިކުރާ ގިނަ ބަޔަކަށް ތަފާތު އިހުސާސްތަކެއް ކުރުވާނެ ދުވަސްތަކެކެވެ. 

ސެމީ ފައިނަލަށް ދަތުރުކޮށްފައިވާ ޓީމުތަކުން އުއްމީދުތައް އާކޮށް، ގަލޮޅު ދަނޑުގައި އައިޑެންޓިޓީއެއް އުފެއްދުމުގެ މަސައްކަތް ކުރަމުންދާއިރު، އެ ޓީމުތަކުގެ ސަޕޯޓަރުންގެ އުއްމީދުތަކާއި ހުވަފެންތަކުގައި ހަގީގީ ކުލަޖައްސާ ދިނުމުގެ ބުރަ އުފުލަން ތިބީ ކުޅުންތެރިންނެވެ. އެ ކުޅުންތެރިން ރޭގެ ނިދިން އަރާމު ހޯދުމަށްފަހު މިހާރު ތިބޭނީ ރެފްރީގެ ކަށިގަނޑުގެ އިންތިޒާރުގައިކަން ޔަގީނެވެ. މިއަދުގެ ހުރިހާ ކަމެއް ހާއްސަކޮށްފައިވާނީ ސެމީފައިނަލު ކާމިޔާބުކޮށް، ފައިނަލުން ޖާގައެއް ކަށަވަރު ކުރުމަށެވެ. 

ގޯލްޑް ކަޕްގެ ސެމީ ފައިނަލުގައި ބައްދަލުކުރާ ހަތަރު ރަށަށް ނިސްބަތްނުވާ ގިނަ މީހުންނަށް މި ވަގުތަކީ ފަހަރުގާ މާޔޫސް ކަމުގެ އިހުސާސް ވެސް ގެނުވާ ވަގުތަކަށް ވުން އެކަށީގެންވެއެވެ. ސަބަބަކީ، އަހަރުތަކަކަށްފަހު އައިސްފައިވާ ފުޓުބޯޅަ އީދަށް ނިމުން އައުމާ ގާތްވުމެވެ. 

ރާއްޖޭގެ ކުޅިވަރު ކުރިއެރުވުމަށް ގިނަ ހިދުމަތްތަކެއް ކޮށްދެއްވަމުން އަންނަ އަހުމަދު މަރުޒޫގު (މަރޭ) ސޯޝަލް މީޑިއާ މެދުވެރިކޮށް ހިއްސާކޮށްފައިވާ ފަދައިން، މި މުބާރާތް ވެގެން ގޮސްފައި ވަނީ ގިނަ އަހަރު ތަކަކަށްފަހު ކުޅިވަރުގެ މާހައުލަކުން އެކުވެރިކަމާއި އެއްބައިވަންތަކަން ދައްކުވައިދޭ މުބާރާތަކަށެވެ. ދިވެހި ފުޓުބޯޅައަށާއި ގަލޮޅު ދަނޑަށް ދިރުން ގެނުވި މުބާރާތަކަށެވެ. 

ކުދިބޮޑު އެންމެން ހިމެނޭހެން، މި މުބާރާތުގެ މެޗުތަކުގައި އާއިލާތައް ވެސް ދަނޑަށް ގޮސް، ވަރަށް ގަދަޔަށް ފޯރިމަރާތަން ފެނެއެވެ. އަދި ޓީމުތައް ރަމްޒުކޮށްދޭ ކުލަތައް އެކި ސިފަސިފައިގައި ބޭނުންކޮށް، ފުޓުބޯޅައިގެ ބޮޑު އީދެއް އައިސްގެން އުޅޭފަދަ ފޯރިއެއް ދައްކުވައިދެއެވެ. މިކަމަށް ނިމުމެއް އަންނާކަށް، ފުޓުބޯޅައަށް ލޯބިކުރާ ފަރާތްތަކުން ބޭނުމެއް ނުވާނެއެވެ. ހާއްސަކޮށް ނުވަދިހައިގެ އަހަރުތަކުގައި ދިވެހި ފުޓުބޯޅައަށް އޮތް ފޯރި ދުށް މީހުންނެވެ.

ގޯލްޑް ކަޕާއެކު ރާއްޖޭގެ ފުޓުބޯޅައަށް އައިސްފައިމިވާ ފޯރި، އޭދަފުށީގެ ސަޕޯޓަރުން މިވަނީ މިއަދު އެ ޓީމު ކުޅޭ ސެމީ ފައިނަލުގެ ކުރިން ވެސް ހާމަކޮށްދީފައެވެ. އެ ޓީމުގެ ގިނަ ބަޔަކު ވަނީ މޫސުން ގޯސް ނަމަވެސް، މިއަދުގެ މެޗުގައި ދަނޑަށް ގޮސް، ޓީމަށް ހިތްވަރު ދިނުމުގެ ގޮތުން މާލެ އައިސްފައެވެ. 

މިއަދު ކުޅޭ ސެމީ ފައިނަލުގެ ފުރަތަމަ މެޗުގައި ބައްދަލުކުރާނީ އޭދަފުއްޓާއި މާލޭ ސިޓީއެވެ. މި ދެ ޓީމަށް ބަލާލާއިރު އޭދަފުށިން ނެރެފައިވާ ނަތީޖާތައް ރަގަޅެވެ. އަދި ފުރަތަމަ ބުރުގައި މި ދެ ޓީމު އެއް ގްރޫޕެއްގައި ހިމެނުނުއިރު، އެ މެޗު 2-0 އިން ކާމިޔާބުކޮށްފައިވަނީ ވެސް އޭދަފުއްޓެވެ.

އޭދަފުށިން މުބާރާތުގައި މިހާތަނަށް ބަލިވެފައިވަނީ ދެވަނަ ބުރުގައި މާފުށި އަތުން އެކަންޏެވެ. އަދި ކުއާޓާ ފައިނަލު ހިމެނޭހެން ފަސް މެޗުން މޮޅުވެފައިވެއެވެ. އެ ޓީމުން މިހާތަނަށް ހަ މެޗުން 20 ގޯލު ކާމިޔާބުކޮށްފައިވާއިރު، އެއް މެޗެއްގައި އެންމެ ބޮޑު ތަފާތެއް ނެރެފައިވަނީ ކުއާޓާ ފައިނަލުގައި ނައިފަރާ ދެކޮޅަށެވެ. އޭދަފުށިން އެ މެޗު ކާމިޔާބުކުރީ 5-0 އިންނެވެ.

އަނެއްކޮޅުން މާލޭ ސިޓީ ވަނީ މި މުބާރާތުގައި އޭދަފުށި އަތުންނާއި މާފުށި އަތުން ބަލިވެފައެވެ. އަދި ކުޅުނު ހަ މެޗުން ކާމިޔާބު ކުރެވިފައިވަނީ ޖުމްލަ 14 ގޯލެވެ. ކުއާޓާ ފައިނަލުގައި އެ ޓީމަށް ގުރައިދޫ ބަލިކުރެވުނީ ޕެނަލްޓީ ޖަހައިގެންނެވެ. އެ މެޗުގައި މާލޭ ސިޓީގެ ގޯލްކީޕަރު، ތޮލާލް ހަސަން (ޓޮޕްލަކް) ވަނީ ދެ ޕެނަލްޓީ މަތަކޮށްފައެވެ.

މުބާރާތުގެ ދެވަނަ ސެމީގައި މިރޭ ބައްދަލު ކުރާނީ އަލިފުއްޓާއި އައްޑޫ ސީޓީއެވެ. 

އައްޑޫ ސިޓީ ކުޅުނު 6 މެޗުގެ ތެރެއިން އެ ޓީމަށް ކާމިޔާބު ކުރެވުނީ ކުއާޓާ ފައިނަލާއެކު ތިން މެޗެވެ. އަދި އެ ޓީމު ތިން މެޗުން ވަނީ އެއްވަރުވެފައެވެ. މި މުބާރާތުގައި މިހާތަނަށް އެއްވެސް މެޗަކުން ބަލިވެފައިނުވާ ހަމައެކަނި ޓީމަކީ އައްޑޫ ސިޓީއެވެ. އެ ޓީމު ސެމީ ފައިނަލުން ޖާގަ ހޯދީ ކުއާޓާ ފައިނަލުގައި މާފުށި 3-0 އިން ބަލިކުރުމަށްފަހުއެވެ. 

އަނެއްކޮޅުން އަލިފުއްޓަކީ މުބާރާތުގައި ކުޅުނު ފުރަތަމަ ދެ މެޗުން ތަފާތު ދެއްކުމަށްފަހު، ދެވަނަ ބުރުން ޖާގަ ހޯދި ފުރަތަމަ ޓީމެވެ. ނަމަވެސް ފުރަތަމަ ބުރުގެ ފަހު މެޗުން އެ ޓީމު ވަނީ ބަލިވެފައެވެ. ކުއާޓާ ފައިނަލުގައި ފުވައްމުލަކު ސިޓީ ބަލިކުރިއިރު، އެ މެޗުން ކާމިޔާބު ލިބުނީ ޕެނަލްޓީ ޖަހައިގެންނެވެ.

ގޯލްޑް ކަޕްގެ ސެމީ ފައިނަލުގައި މިއަދު ހަވީރު ކެޅޭ މެޗު ފަށާނީ 15:50 ގައެވެ. އަދި މިރޭގެ މެޗު 9 ޖަހާއިރު ފެށުމަށް ހަމަޖެހިފައިވާއިރު، ދެ މެޗު ވެސް ޔެސް ޓީވީ އިން ލައިވް ކުރާނެއެވެ.

މި ލިޔުން ކިޔާލުމުން

Ads by MSS