ކުޅިވަރު

ފުރަތަމަ 30 މިނެޓުން ތިން ގޯލު ކާމިޔާބުކޮށް، މާލެ ކަޓުވާލައި އޭދަފުށިން ފައިނަލަށް

ފުރަތަމަ 30 މިނެޓުން ތިން ގޯލު ކާމިޔާބުކޮށް، މާލެ ކަޓުވާލައި އޭދަފުށިން ފައިނަލަށް

އޭދަފުށީގެ ތިންވަނަ ގޯލު ކާމިޔާބު ކުރުމަށްފަހު އެ ޓީމުގެ އިޝާން އިބްރާހިމް އުފާފާޅު ކުރަނީ--- ފޮޓޯ: ސިޑިބަރި

މިފްތާޙް މުޙައްމަދު

މިފްތާޙް މުޙައްމަދު

21 ޑިސެމްބަރު 2024، 07:41

21 ޑިސެމްބަރު 2024، 07:41

ހުލާސާ

ފުޓުބޯޅައިގައި އޭދަފުއްޓަކީ ބްރޭންޑެއްކަން ސާބިތުކޮށްދިނުމަށް އެ ޓީމަށް ބޭނުންވީ މެޗުގެ ފުރަތަމަ 30 މިނެޓު އެކަންޏޭ ވެސް ބުނެވިދާނެ. އެ ވަގުތުގައި އެ ޓީމުން މާލޭ ސިޓީ ކޮޅަށް ތިން ގޯލު ކާމިޔާބުކޮށް، މެޗުގެ ބާކީބައި އެ ތިން ގޯލަށް ބިނާކުރި.

ނައިންޓީ ޕްލަސް ގޯލްޑް ކަޕްގެ ސެމީފައިނަލުގެ ފުރަތަމަ މެޗުގައި އޭދަފުށިން މާލޭ ސިޓީ ބަލިކޮށް، ފައިނަލުގެ ފުރަތަމަ ޖާގަ ކަށަވަރުކޮށްފިއެވެ.

ފުޓުބޯޅައިގައި އޭދަފުއްޓަކީ ބްރޭންޑެއްކަން ސާބިތުކޮށްދިނުމަށް އެ ޓީމަށް ބޭނުންވީ މެޗުގެ ފުރަތަމަ 30 މިނެޓު އެކަންޏޭ ވެސް ބުނެވިދާނެއެވެ. އެ ވަގުތުގައި އެ ޓީމުން މާލޭ ސިޓީ ކޮޅަށް ތިން ގޯލު ކާމިޔާބުކޮށް، މެޗުގެ ބާކީބައި އެ ތިން ގޯލަށް ބިނާކުރިއެވެ. ނަމަވެސް ފަހު ހާފުގައި މާލޭ ސިޓީއިން ކާމިޔާބުކުރި ދެ ގޯލާއެކު، މެޗުގެ ފުރިހަމަ ވަގުތު ހަމަވީ އޭދަފުށި 3-2 އިން ކުރީގައި އޮވެއެވެ.

ގަލޮޅު ދަނޑުގައި އޭދަފުށީގެ ގިނަ ސަޕޯޓަރުން ތަކެއްގެ ކުރިމަތީގައި ކުޅުނު މި މެޗު އޭދަފުށިން ފެށީ ވަރަށް ވަރުގަދަ ކޮށެވެ. އަދި މެޗުގެ ކުރީ ކޮޅުން ފެށިގެން އެ ޓީމުން ދިޔައީ ގިނަ ހަމަލާތަކެއް އުފައްދަމުންނެވެ. 

އޭދަފުށިން ފުރަތަމަ ގޯލު ކާމިޔާބުކުރީ، މާލޭ ސިޓީގެ މެދުތެރެއަށް ކުޅެމުން ދިޔަ ކުޅުންތެރިޔާ ހަމަޖެހިލާފައި ބޯޅަ ހިފައިގެން ދަނިކޮށް، އޭދަފުށީ ޓީމުގެ ކުރިޔަށް ކުޅޭ ކުޅުންތެރިޔާ ފަހަތުން އައިސް ބޯޅަ ހޯދުމަށްފަހު އުފެއްދި ހަމަލާއަކުންނެވެ. އެ ޓީމުގެ މުހައްމަދު ފާސިރު މި ބޯޅަ ހޯދުމަށްފަހު ފޮނުވާލީ ވާތް ފަރާތުން ކުރިޔަށް ދުވަމުން ދިޔަ އިޝާން އިބްރާހިމްއަށެވެ. އިޝާން އެ ބޯޅަ ހިފައިގެން ޕެނަލްޓީ އޭރިއާއަށް ނުވަދެ، ރީއްޗަށް ބަލާލުމަށްފަހު ފޮނުވާލީ ހަމްޒާ މުހައްމަދު (ހަމްޕު) އަށެވެ. އަދި ހަމްޒާ އެ ބޯޅަ ކޮންޓްރޯލް ކޮށްލުމަށްފަހު ހަމަޖެހިލާފައި މެޗުގެ 20 ވަނަ މިނެޓުގައި އޭދަފުއްޓަށް ލީޑު ނަގައިދިނެވެ.

އޭގެ ތިން މިނެޓު ފަހުން، މާލޭ ސިޓީގެ ހާފުތެރެއިން ވާތް ފަރާތުން ލިބުނު ހިލޭ ޖެހުން އަހުމަދު އައިހަމް ފޮނުވާލީ ގޯލު އޭރިޔާގެ ތެރެއަށެވެ. އެ ބޯޅައިގެ އިންތިޒާރުގައި ހުރި ހަމްޕު ބޮލުން ގޯލުގެ ދުރު ކަނަށް ފޮނުވާލައި، މެޗުގައި އޭނާގެ ދެވަނަ ގޯލު ކާމިޔާބު ކުރިއެވެ.

އޭދަފުށިން ކައިރި ކައިރީގައި ކާމިޔާބުކުރި ގޯލުތަކާއެކު މާލޭ ސިޓީއަށް ހަމަޖެހި ނުލެވި އުޅެނިކޮށް، އޭދަފުށިން އެމީހުންގެ ތިން ވަނަ ގޯލު ކާމިޔާބުކުރިއެވެ. 

އޭދަފުށީގެ ފަހަތުން ކަނާތް ފަރާތުން ފަހަތަށް ކުޅެމުން ދިޔަ އައިހަމް ދެ ކުޅުންތެރިން ކައިރިން ނައްޓާލުމަށްފަހު، މާލޭ ސިޓީގެ ޕެނަލްޓީ އޭރިއާ ތެރެއަށް ވަދެ ގޯލު ކުރިމައްޗަށް ހުރަސްކޮށްލިއިރު، އެ ބޯޅަ ގޯލަށް ފޮނުވާލަން ފުރަތަމަ މަސައްކަތްކުރި އަލީ ފާސިރުއަށް ބޯޅައިގައި ލައްވާނުލުމުން، އޭނާގެ ފަހަތުގައި ހުރި އިޝާން އެ ބޯޅަ ފޮނުވާލީ ގޯލުގެ މަތީ ދާގަނޑަށެވެ. އިޝާން މި ގޯލު ކާމިޔާބުކުރީ މެޗުގެ 30 ވަނަ މިނެޓުގައެވެ.

ދެވަނަ ހާފުގައި މާލޭ ސިޓީއިން އެ ޓީމުގެ ކުޅުން ރަގަޅު ކުރިއެވެ. އެގޮތުން ދެވަނަ ހާފުގެ ދެވަނަ މިނެޓުގައި އެ ޓީމުން ވަނީ ގޯލެއް ކާމިޔާބު ކޮށްފައެވެ. އެ ޓީމުގެ ވާތް ފަރާތުން އޭދަފުށި ޓީމުގެ ގޯލު ކުރިމައްޗަށް ހުރަސްކޮށްލުމަށް އަލީ ޝިޔާހް ފޮނުވާލި ބޯޅަ ގޮސް އޮއްސުނީ އޭދަފުށި ގޯލުގެ ދުރު ކަނަށެވެ. 

މި ގޯލާއެކު އާ ހިތްވަރަކާއެކު މަސައްކަތް ކުރަމުން ދިޔަ މާލޭ ސިޓީގެ ޓީމަށް ދެވަނަ ގޯލެއް ކާމިޔާބު ކުރެވުނެވެ. އެ ޓީމަށް ލިބުނު ޕެނަލްޓީއަކުން މި ގޯލު ކާމިޔާބުކުރީ މެޗުގެ 65 ވަނަ މިނެޓުގައި ރިލްވާން ވަހީދެވެ. 

އަދި އެއަށްފަހު މާލޭ ސިޓީއިން އިތުރު ގޯލެއް ކާމިޔާބު ކުރުމަށް ކުރަމުން ދިޔަ މަސައްކަތްތައް ވަރުގަދަ ކުރިއެވެ. އަނެއްކޮޅުން އޭދަފުށިން ވެސް ދިޔައީ ނުރައްކާތެރި ހަމަލާތައް އުފައްދަމުންނެވެ. ނަމަވެސް ދެ ޓީމުން ކުރެ އެއްވެސް ޓީމަކަށް އިތުރު ގޯލެއް ކާމިޔާބު ނުކުރެވި، މި މެޗު ނިމުނީ 3-2 އިން އޭދަފުށި މޮޅުވެގެނެވެ. 

މި މުބާރާތުގެ ދެވަނަ ސެމީފައިނަލް އޮންނާނީ މިރެއެވެ. އެ މެޗުގައި ބައްދަލު ކުރާނީ އަލިފުށްޓާއި އައްޑޫ ސިޓީއެވެ.

މި ލިޔުން ކިޔާލުމުން

Ads by MSS