އެޗްޑީސީގެ އެމްޑީގެ މަޤާމުން ފަޒުލް އިސްތިއުފާ ދެއްވައިފި

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު އޭނާގެ މަޤާމުން އިސްތިއުފާ ދެއްވައިފިއެވެ. ފަޒުލް އިސްތިއުފާ ދެއްވާފައިވަނީ ބިންވެރިޔާ ސްކީމާ ގުޅިގެން މިހާރު ކުރިއަށްދާ ތަޙުޤީޤަށް ފުރުޞަތު ދިނުމަށްޓަކައި ކަމަށް އޭނާ ވިދާޅުވެފައިވެއެވެ.

ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ގޯތިތަކެއް ދީފައިވާކަމަށް ތުހުމަތުކުރެވޭ މައްސަލަ ފުލުހުންނާއި ކަމާގުޅުންހުރި ފަރާތްތަކުން ތަޙުޤީޤުކުރަމުންދާ ދަނޑިވަޅެއްގައި މި އިސްތިއުފާ ދެއްވާފައިވާކަން ފާހަގަކުރެވެއެވެ.

ރައީސުލްޖުމްހޫރިއްޔާއަށް ފޮނުއްވި އިސްތިއުފާގެ ސިޓީގައި ފަޒުލް ވިދާޅުވެފައިވަނީ،  މަޤާމުގައި ހޭދަކުރެއްވި މުއްދަތުގައި ކުރެވިފައިވާ އަދި މިހާރު ކުރެވެމުންދާ ތުހުމަތުތަކަށް އިންކާރުކުރައްވާ ކަމަށެވެ. އަދި އެޗްޑީސީގެ ފަރާތުން މިހާތަނަށް ކޮށްފައިވާ އެންމެހާ މުއާމަލާތްތަކަކީ ކުންފުނީގެ ބޯޑުގެ ނިންމުންތަކާއި ޕޮލިސީތަކުގެ އިމުގެ ތެރެއިން ކުންފުނީގެ މަޞްލަޙަތު އިސްކޮށް ކޮށްފައިވާ މުއާމަލާތްތަކެއްކަމަށްވެސް އޭނާ ވިދާޅުވެފައިވެއެވެ.

ބިންވެރިޔާ ސްކީމާ ގުޅިގެން އެޗްޑީސީއަށް އަމާޒުވެފައިވާ ތުހުމަތުތަކަކީ އެ ކުންފުންޏާ އެއްވެސް ގުޅުމެއް ހުރި ކަންތައްތަކެއް ނޫންކަމަށް ފަޒުލް ވިދާޅުވެފައިވެއެވެ. އަދި މި ތުހުމަތުތަކުގެ ޙަޤީޤަތް ވީއެންމެ އަވަސް ފުރުޞަތެއްގައި ރައްޔިތުންނަށް ހާމަވުމަށް އެދިވަޑައިގަންނަވާ ކަމަށްވެސް އޭނާ ވިދާޅުވެފައިވެއެވެ.

ފަޒުލް އިސްތިއުފާ ދެއްވާފައިވަނީ އޭނާވެސް ހިމެނޭގޮތަށް އެޗްޑީސީގެ ޑިރެކްޓަރުންގެ ބޯޑު އެއްކޮށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން (ޕީސީބީ) ސަސްޕެންޑުކޮށްފައިވަނިކޮށެވެ. މި އިސްތިއުފާއާއެކު، ކުންފުންޏާއި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމަށް ފުރުޞަތު ލިބިގެންދާނެކަމަށް ފަޒުލް އުންމީދުކުރައްވާކަމަށް ވިދާޅުވެފައިވެއެވެ.