ޗެމްޕިއަނުން ބަލިކޮށް އެސްޓަން ވިލާއިން ލީގުގެ ފަސްވަނައަށް ޖެހިލައިފި

އިންގްލިޝް ޕްރިމިއަރ ލީގުގެ ޗެމްޕިއަން މެންޗެސްޓަރ ސިޓީ 2-1 އިން ބަލިކުރުމަށްފަހު، އެސްޓަން ވިލާއިން ލީގުގެ ފަސްވަނައަށް ކުރިއަށް ޖެހިލައިފިއެވެ. މި މެޗުގައި ވިލާގެ ތަރިއަކީ، އެ ޓީމުގެ ވާތްފަރާތަށް ކުޅުނު މޯގަން ރޮޖާސްއެވެ. އޭނާވަނީ ފުރަތަމަ ގޯލަށް އެސިސްޓު ކޮށްދިނުމަށްފަހު، ދެވަނަ ގޯލު ކާމިޔާބު ކޮށްދީފައެވެ.

ވިލާއިން މެޗު ފެށީ ވަރުގަދަކޮށެވެ. އެގޮތުން މެޗުގެ ފުރަތަމަ ސިކުންތު ކޮޅުގެ ތެރޭގައި އެ ޓީމުން ވަނީ ފުރަތަމަ ހަމަލާ އުފައްދާފައެވެ. ޖޯން މެގިން ފަހިކޮށްދިން ފުރުސަތެއްގައި އެ ޓީމުގެ ފޯވާޑް ޖޯން ޑުރާން ގޯލަށް ފޮނުވާލި ހަމަލާ ސަލާމަތްކޮށްދިނީ ސިޓީގެ ގޯލްކީޕަރު ސްޓެފަން އޯޓެގާއެވެ. 

އެ ހަމަލާއާއި ގުޅިގެން ލިބުނު ކޯނަރުގައި ވިލާއިން ލީޑު ނެގިޔަ ނުދީ އަނެއްކާ ވެސް ހިފެހެއްޓީ އޯޓެގާއެވެ. އެ ކޯނަރު ގޯލަށް ފޮނުވާލުމަށް ޕައު ޓޮރޭޒް ޖައްސާލި ބޯޅަ ގޯލުގެ ހުރަސް ދަނޑީގައި ޖެހިފައި އެތެރެއަށް ވަންނަން ދަނިކޮށް، ގޯލުގެ ރޮނގުމަތިން އެ ބޯޅަ ދިފާއު ކުރީ އޯޓެގާއެވެ. 

ނަމަވެސް މެޗުގެ 16 ވަނަ މިނެޓުގައި ޑުރާން ވަނީ އޯޓެގާ ފޫއަޅުވާލުމަށްފަހު ވިލާއަށް ލީޑު ނަގައިދީފައެވެ. ވިލާގެ ހާފު ތެރެއިން ޔޫރީ ޓީލެމަންސް ބޯޅަ ހޯދުމަށްފަހު، ސިޓީގެ އެކަޑެމީއިން އެ ކްލަބާ ގުޅުނު މޯގަން ރޮޖާސްއަށް ސިޓީގެ ޑިފެންސް ލައިނުގެ ތެރެއިން ބޯޅަ ފޮނުވާލިއިރު، ގޯލުގެ ތެރެއަށް ބޯޅަ ފޮނުވާލުމަށްޓަކައި އޭނާ އެ ބޯޅަ ހަވާލުކުރީ ޑުރާންއާއެވެ. އަދި ޑުރާން އޭނާގެ ޒިންމާ އަދާކުރުމަށްފަހު ވިލާއަށް ލީޑު ނަގައިދިނެވެ. 

ފުރަތަމަ ހާފުގައި ސިޓީއިން ގިނަ ވަގުތު ބޯޅަ ގެންގުޅު ނަމަވެސް، ނަތީޖާ ހަމަހަމަ ކުރާނެ ރަގަޅު ހަމަލާއެއް ވިލާގެ ގޯލަށް ފޮނުވާލެވިފައެއް ނުވެއެވެ.

ދެވަނަ ހާފުގެ ކުރީކޮޅު ޑުރާން އިތުރު ގޯލެއް ކާމިޔާބު ކުރިއެވެ. ނަމަވެސް އެ ގޯލުން ސިޓީ ސަލާމަތްކޮށްދިނީ އޮފްސައިޑް ދިދައެވެ. 

ވިލާއިން އެ ޓީމުގެ ލީޑު ފުޅާކުރީ މެޗުގެ 65 ވަނަ މިނެޓުގައި ރޮގާސްގެ ގޯލަކުންނެވެ. 

ސިޓީއަށް ސުމެއް ކަނޑުވާލަ ދިނީ އިތުރު ވަގުތުގައި ފިލް ފޮޑެންއެވެ. ނަމަވެސް އޭރު މެޗުގެ އޮއިވަރަށް ބަދަލެއް ގެންނަ ވަރަށް ވުރެން މާ ބޮޑަށް ލަސްވެއްޖެއެވެ. 

މި ނަތީޖާއާއެކު ސިޓީ ވަނީ ވިލާގެ ފަހަތަށް، ލީގުގެ ހަވަނައަށް ވެއްޓިފައެވެ. އަދި އެއްވަނައިގައި އޮތް ލިވަޕޫލުން ދެ މެޗު މަދުން ކުޅެފައިވީ ނަމަވެސް، އެ ޓީމާ ދެމެދު 9 ޕޮއިންޓުގެ ފަރަގެއް އެބައޮތެވެ. އަދި ލީގުގައި ސިޓީ އެންމެ ފަހުން ކުޅުނު 8 މެޗުގެ ތެރެއިން އެ ޓީމު މިވަނީ 6 މެޗުން ބަލިވެފައެވެ.