ކުޅިވަރު

ދެވަނަ ހާފުގައި ތަފާތު ދައްކައި އައްޑޫ އިން އަލިފުށި ބަލިކޮށްފި

ދެވަނަ ހާފުގައި ތަފާތު ދައްކައި އައްޑޫ އިން އަލިފުށި ބަލިކޮށްފި

އައްޑޫ ސިޓީގެ ދެވަނަ ގޯލު ކާމިޔާބު ކޮށްފައިވަނީ އިބްރާހިމް މަހުދީ--- ފޮޓޯ: ސިޑިބަރި

farudhun logo

ފަރުދުން

22 ޑިސެމްބަރު 2024، 07:27

22 ޑިސެމްބަރު 2024، 07:27

ހުލާސާ

ސެމީފައިނަލާ ހިސާބަށް އައިއިރު، މިހާތަނަށް މުބާރާތުގައި އެއްވެސް މެޗަކުން އައްޑޫ ބަލިވެފައެއް ނުވޭ. އަދި ފުރަތަމަ ބުރުގައި އަލިފުށި އެއް މެޗުން ބަލިވެފައިވި ނަމަވެސް، އެ ޓީމު އައީ މޮޅު ކުޅުމެއް ދައްކައި، ރަގަޅު ނަތީޖާތައް ނެރެމުން.

ނައިންޓީ ޕްލަސް ގޯލްޑް ކަޕްގެ ސެމީފައިނަލުގެ ދެވަނަ މެޗުގައި އައްޑޫ ސިޓީއިން އަލިފުށި ބަލިކުރުމަށްފަހު ފައިނަލުން ޖާގަ ހޯދައިފިއެވެ. އައްޑޫއިން ނަތީޖާ ބަދަލުކޮށްފައި ވަނީ ދެވަނަ ހާފުގައެވެ. 

ސެމީފައިނަލާ ހިސާބަށް އައިއިރު، މިހާތަނަށް މުބާރާތުގައި އެއްވެސް މެޗަކުން އައްޑޫ ބަލިވެފައެއް ނުވެއެވެ. އަދި ފުރަތަމަ ބުރުގައި އަލިފުށި އެއް މެޗުން ބަލިވެފައިވި ނަމަވެސް، އެ ޓީމު އައީ މޮޅު ކުޅުމެއް ދައްކައި، ރަގަޅު ނަތީޖާތައް ނެރެމުންނެވެ. 

މި މެޗުގެ ފުރަތަމަ ހާފުގައި ދެ ޓީމަށް ވެސް ދެއްކުނީ ހަމަހަމަ ކުޅުމެކެވެ. އަދި ގޯލު ޖަހާނެ ރަގަޅު ފުރުސަތުތައް ވެސް ދެ ޓީމުން ފަހިކޮށްފައިވެއެވެ.

އައްޑޫއިން ފައިނަލާ ކައިރިއަށް ޖެހިލީ ދެވަނަ ހާފުގައި ނެގި ލީޑާ އެކުއެވެ. އެ ޓީމަށް ލީޑު ނަގައިދިނީ، އަހަރުތަކެއް ކުރިން ޕްރޮފެޝަނަލް ފުޓުބޯޅައިން ރިޓަޔާ ކުރުމަށްފަހު، މި މުބާރާތުގައި އަމިއްލަ ރަށް ތަމްސީލުކުރުމަށް ގަލޮޅު ދަނޑަށް ނިކުތް، އުމުރުން 42 އަހަރުގެ ޝަމްވީލް ގާސިމް (ބޮންޑާ)އެވެ. 

އެ ގޯލަކުން އަދި ނުނިމުނެވެ. ބޮންޑާގެ ބަދަލުވީ އުމުރެވެ، ކޮލެޓީ ހަމަ އަދިވެސް އެއްވަނައެވެ. އެގޮތުން އައްޑޫގެ ކެޕްޓަނެއްގެ ޒިންމާ ނަގަމުން އަންނަ ބޮންޑާ ވަނީ އެ ޓީމުން ޖެހި ދެވަނަ ގޯލުގައި ވެސް މުހިންމު ދައުރެއް އަދާކޮށްފައެވެ. 

ދެވަނަ ގޯލު ޖެހި ބޯޅަ އަލިފުށީގެ ގޯލު ކުރިމައްޗަށް ހުރަސްކޮށްދިނީ ބޮންޑާއެވެ. އެ ބޯޅައިން ފުރަތަމަ އުފެއްދި ހަމަލާ ރީބައުންސަށް ނިކުތުމުން، ބޯޅަ ގޯލަށް ފޮނުވާލައި އައްޑޫއަށް ލީޑު ފުޅާކޮށްދިނީ އިބްރާހިމް މަހްދީ ހުސައިން (ފޭދޫ އިއްބެ) އެވެ. 

މެޗު ނިމެން ވަގުތު ކުޑަތަންވަމުން ދިޔައިރު، އަލިފުށިން ވަނީ މެޗުގެ ތެރެއަށް ވަނުމަށް ގިނަ މަސައްކަތްތަކެއް ކޮށްފައެވެ. ނަމަވެސް އެ ޓީމަށް މި މެޗުގައި ގޯލެއް ކާމިޔާބެއް ނުކުރެވި، މުބާރާތާއި އަލްވަދާއު ކިޔާފައިވަނީ ގިނަ ހަނދާންތަކެއް ހިފައިގެންނެވެ.

މި މުބާރާތުގެ ފައިނަލް މެޗު ކުޅެން ހަމަޖެހިފައިވަނީ އަންގާރަ ދުވަހުގެ ރެއެވެ. އެ މެޗުގައި ބައްދަލު ކުރާނީ އައްޑޫ ސިޓީ އާއި އޭދަފުށްޓެވެ. އޭދަފުށި ފައިނަލުން ޖާގަ ހޯދީ ސެމީގައި 3-2 އިން މާލޭ ސިޓީ ބަލިކުރުމަށްފަހުއެވެ. 

މި ލިޔުން ކިޔާލުމުން

Ads by MSS