ކުޅިވަރު
އިތުރު ވަގުތުގައި ބާސެލޯނާ ބަލިކޮށް، އެތުލެޓިކޯ މެޑްރިޑުން ލީގުގެ އެއްވަނައަށް އަރައިފި

މޮޅުވި ގޯލު ކާމިޔާބުކުރުމަށްފަހު އެތުލެޓިކޯގެ ސޯރލޮތު އިފާފާޅު ކުރަނީ--- ފޮޓޯ: ގެޓީއިމޭޖަސް
ހުލާސާ
ބާސެލޯނާއަށް އޮތް އިތުރު ހިތްދަތިކަމަކަށް ވާނީ، މިރޭ ރެއާލް މެޑްރިޑާއި ސެވިއްޔާ ބައްދަލުކުރާ މެޗުން، މެޑްރިޑް މޮޅުވެއްޖެނަމަ. އޭރުން ހެންސީ ފްލިކްގެ ބާސެލޯނާ ލީގުގެ ތިންވަނައަށް ވެއްޓޭނެ.
ބަދަލު ކުޅުންތެރިއެއްގެ ގޮތުގައި ކުޅެން ނިކުތް އެލެކްސެންޑަރ ސޯރލޮތު އިތުރު ވަގުތު ކާމިޔާބުކުރި ގޯލަކުން، ސްޕެނިޝް ލަ ލީގާގެ އެއްވަނައިގައި އޮތް ބާސެލޯނާ ބަލިކޮށް އެތުލެޓިކޯ މެޑްރިޑުން އެ މަގާމަށް ޖެހިލައިފިއެވެ.
ނޮވެންބަރު މަހުގެ ކުރީކޮޅު 10 ޕޮއިންޓުގެ ފަރަގެއް މި ދެ ޓީމުގެ މެދުގައި އޮތް ނަމަވެސް، ބާސެލޯނާއަށް ކުރިމަތިވި ގޮންޖެހުމަކީ އެ ޓީމުގެ ފޯމު ގެއްލި، މުހިންމު މެޗު ތަކަކުން ބަލިވުމެވެ. އަނެއްކޮޅުން އެތުލެޓިކޯ މެޑްރިޑުން އައީ ފުލުފުލުގައި މެޗުތައް ކާމިޔާބު ކުރަމުންނެވެ. އަދި އެންމެ ފަހުން ބާސެލޯނާ ފަހަތަށް ޖައްސާލުމަށްފަހު، އެތުލެޓިކޯއިން އާ އަހަރާއި ކުރިމަތިލާނީ ލީގުގެ އެއްވަނަ ޓީމުގެ ގޮތުގައެވެ.
ބާސެލޯނާގެ އެސްޓަޑި އޮލިމްޕިކް ލުއިޒް ސްޓޭޑިއަމުގައި ކުޅުނު މި މެޗަށް އެތުލެޓިކޯ އިން އައިއިރު، މި ދެ ޓީމު އޮތީ ޕޮއިންޓުގެ ގޮތުން ހަމަހަމަވެފައެވެ. ނަމަވެސް އެތުލެޓިކޯއަށް އޮތް ހިތްވަރަކީ، މި މެޗު ކާމިޔާބުކޮށް ލީގުގެ އެއްވަނައަށް އެރޭނެ ކަމުގެ ޔަގީންކަމެވެ. އަދި ބާސެލޯނާއިން އެ ޓީމަށް ވުރެން އިތުރަށް މެޗު ކުޅެފައިވުމުގެ ފައިދާ އެ ޓީމަށް އޮތްކަން އެނގުމެވެ.
މި މެޗު ފަށައިގެން މޮޅަށް ކުޅެމުން ދިޔައީ ބާސެލޯނާއެވެ. އެގޮތުން މެޗުގެ 25 ވަނަ މިނެޓުގައި ގަވީ ބޮލުން ގޯލަށް ފޮނުވާލަން މަސައްކަތްކުރި ހަމަލާ ވަނީ ތިން ދަނޑިއަށް އަމާޒުނުވެ، ނާކާމިޔާބުވެފައެވެ. ނަމަވެސް އޭގެ ފަސް މިނެޓު ފަހުން، އޭނާ ވަނީ ބާސެލޯނާއިން ލީޑު ނެގުމަށް އެހީތެރިވެދީފައެވެ. ޕެޑްރީ ބޯޅަ ހިފައިގެން ދެ ކުޅުންތެރިން ކައިރިން ނައްޓާލުމަށްފަހު ޕެނަލްޓީ އޭރިއާގެ ރޮނގުމަތީގައި ހުރި ގަވީއަށް ޖައްސާލުމުން، އޭނާ ވަނީ އަލުން އަނބުރާ އެ ބޯޅަ ޕެޑްރީއަށް އެއް ޓަޗުން ކުޅެފައެވެ. އަދި އެ ބޯޅަ ދުރުކަނަށް ފޮނުވާލާ، އޭނާ ވަނީ ބާސެލޯނާއަށް ލީޑު ނަގައިދީފައެވެ.
ބާސެލޯނާއިން އެ ޓީމުގެ ލީޑު ފުޅާ ކުރުމަށް ދެވަނަ ހާފުގައި އަނެއްކާ ވެސް ގިނަ ފުރުސަތުތަކެއް ތަނަވަސް ކުރިއެވެ. އެގޮތުން ފާމިން ލޮޕޭޒް ފޮނުވާލި ހަމަލާ ޔާން އޮބްލަކް މަތަކުރިއިރު، ޕެޑްރީ ފޮނުވާލި ހަމަލާ ދިޔައީ ގޯލަށް އަމާޒު ނުވެއެވެ. އަދި ރަފީނިއާ ކީޕަރުގެ ބޯމަތިން ހިއްލާލި ބޯޅަ ހުރަސް ދަނޑީގައި ޖެހުނުއިރު، އޮބްލަކްއާއެކު ލިބުނު 'ވަން-އޮން-ވަން' ފުރުސަތު ވެސް ވަނީ ބޭކާރުވެފައެވެ.
މުޅި މެޗު ބާސެލޯނާ ޑޮމިނޭޓު ކުރަމުން ދަނިކޮށް، އެތުލެޓިކޯއަށް މެޗުގެ ނަތީޖާ ހަމަހަމަކޮށްދިނީ ރޮގްރީގޯ ޑި ޕައުލްއެވެ. ޑިފެންސް ކުރުމުގައި ބާސެލޯނާގެ މެދަށް ކުޅެމުންދިޔަ މާކް ކަސާޑޯއަށް ބޯޅަ ބައިންދާލެވުނީ އެޓޭކުގައި ބައިވެރިވުމަށް ބާސެލޯނާގެ ޕެނަލްޓީ އޭރިއާއާ ދިމާލަށް ދިޔަ ޑި ޕައުލްގެ ކުރިމަތީގައެވެ. އޭނާ އެ ބޯޅަ ގޯލަށް ފޮނުވާލީ ސެމީ-ސާރކަލް ރޮނގުމަތިން ކަހަލަ ގޮތަކަށެވެ.
އަނިޔާގެ ސަބަބުން ލެމިން ޔަމާލްއާ ނުލައި ކުޅެމުންދިޔަ ބާސެލޯނާއަށް ލިބުނު ފުރުސަތުތަކުގެ ބޭނުން ނުހިފުމުގެ ނަތީޖާއަކަށްވީ، އިތުރު ވަގުތުގައި އެތުލެޓިކޯ އިން ނަތީޖާ ބަދަލުކޮށްލުމެވެ. އެ ޓީމުގެ ކައުންޓަރ އެޓޭކެއްގައި ނެހުއެލް މޮލީނާ ބާސެލޯނާގެ ގޯލު ކުރިމައްޗަށް ހުރަސްކޮށްދިން ބޯޅަ ގޯލުގެ ތެރެއަށް ފޮނުވާލީ ސޯރލޮތުއެވެ.
ބާސެލޯނާއަށް އޮތް އިތުރު ހިތްދަތިކަމަކަށް ވާނީ، މިރޭ ރެއާލް މެޑްރިޑާއި ސެވިއްޔާ ބައްދަލުކުރާ މެޗުން، މެޑްރިޑް މޮޅުވެއްޖެނަމައެވެ. އޭރުން ހެންސީ ފްލިކްގެ ބާސެލޯނާ ލީގުގެ ތިންވަނައަށް ވެއްޓޭނެއެވެ.