ގެދޮރުވެރިޔާ އަދި ބިންވެރިޔާ ސްކީމްގެ ތަޙުޤީޤަށް މަޢުލޫމާތު ހުށަހެޅުމަށް ފުލުހުން ޚާއްޞަ ޕޯޓަލްއެއް ޤާއިމުކޮށްފި

ގެދޮރުވެރިޔާ އަދި ބިންވެރިޔާ ސްކީމާ ގުޅޭގޮތުން ކުރިއަށްގެންދާ ތަޙުޤީޤަށް އެހީތެރިވުމަށް ބޭނުންވާ ފަރާތްތަކަށް މަޢުލޫމާތު ހުށަހެޅުމަށް ޚާއްޞަ ޕޯޓަލްއެއް ދިވެހި ފުލުހުންގެ ޚިދުމަތުން މިއަދު ޤާއިމުކޮށްފިއެވެ. މި ޕޯޓަލްގެ އެޑްރެހަކީ evidence.police.gov.mv އެވެ.

 ފުލުހުންގެ ޚިދުމަތުން މަޢުލޫމާތު ދެއްވިގޮތުގައި، މި ސްކީމްތަކާ ގުޅޭގޮތުން ކުރިއަށްގެންދާ ތަޙުޤީޤަށް ބޭނުންވާކަމަށް ބެލެވޭ ނުވަތަ ހެކީގެ ގޮތުގައި ބޭނުންކުރެވިދާނެ އެއްވެސް މަޢުލޫމާތެއް އެނގޭ ފަރާތްތަކުން މި ޕޯޓަލް މެދުވެރިކޮށް އެ މަޢުލޫމާތު ޙިއްޞާކޮށްދެއްވުމަށް އެދިވަޑައިގެންފައިވެއެވެ. އަދި މި ޕޯޓަލް މެދުވެރިކޮށް މަޢުލޫމާތު ފޯރުކޮށްދޭ ފަރާތްތަކުގެ ސިއްރުވެރިކަން ކަށަވަރުކޮށްދެއްވާނެކަމަށް ފުލުހުން ވިދާޅުވިއެވެ.

 ފުލުހުން އިތުރަށް ވިދާޅުވީ، އަމިއްލަ މަޢުލޫމާތު ހާމަނުކޮށްވެސް މި ޕޯޓަލް މެދުވެރިކޮށް މަޢުލޫމާތު ހިއްސާކުރެއްވޭނެ ކަމަށެވެ. އަދި ތަޙުޤީޤުކުރައްވާ ފަރާތްތަކާ ގުޅަން ބޭނުންވާ ފަރާތްތަކަށް ގުޅައިގެން އެ މަޢުލޫމާތު ހިއްސާކުރެވޭނެ ކަމަށްވެސް ފުލުހުން ވިދާޅުވިއެވެ.

 މި މައްސަލައިގެ ތަޙުޤީޤު ކުރިއަށްދަނިކޮށް، ޕީސީބީން ވަނީ އެޗްޑީސީގެ ޗެއަރމަން ފިޔަވައި ހުރިހާ ޑިރެކްޓަރުން ސަސްޕެންޑްކޮށްފައެވެ. މީގެ އިތުރުން، އެޗްޑީސީގެ މެނޭޖިންގ ޑިރެކްޓަރުގެ މަޤާމުން އިބްރާހީމް ފަޒުލް ރަޝީދު ވަނީ އިސްތިއުފާ ދެއްވާފައެވެ. ފަޒުލް ވިދާޅުވީ، އިސްތިއުފާ ދެއްވީ ބިންވެރިޔާ ސްކީމާ ގުޅިގެން މިހާރު ކުރިއަށްދާ ތަޙުޤީޤަށް ފުރުޞަތު ދިނުމަށާއި، ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމަށް ފުރުޞަތު ދިނުމުގެ ގޮތުން ކަމަށެވެ.

 ގެދޮރުވެރިޔާ އަދި ބިންވެރިޔާ ސްކީމާ ގުޅިގެން ދިވެހި ފުލުހުންގެ ޚިދުމަތާއި ކަމާ ގުޅުންހުރި ހުރިހާ އިދާރާއަކުން މިހާރު ގެންދަވަނީ ތަޙުޤީޤުކުރައްވަމުންނެވެ. މި ތަޙުޤީޤަށް އެހީތެރިވެދޭން ބޭނުންވާ ފަރާތްތަކުން ފުލުހުންގެ އައު ޕޯޓަލް މެދުވެރިކޮށް މަޢުލޫމާތު ހިއްސާކުރެއްވުމަށް ފުލުހުން އެދިވަޑައިގެންފައިވެއެވެ.

ގެދޮރުވެރިޔާ އަދި ބިންވެރިޔާ ސްކީމާގުޅޭ މައްސަލައިގެ ތަހުގީގުގަށް ބޭނުންކުރެވިދާނެ ކަމަށް ބެލެވޭ އެއްވެސް މައުލޫމާތެއް ނުވަތަ ހެކީގެ ގޮތުގައި ބޭނުންކުރެވިދާނެ އެއްވެސް ލިޔުމެއް އޮތްނަމަ، https://t.co/ZO4hk7yBKy އަށް ވަޑައިގެން ހިއްސާކުރެއްވުން އެދެމެވެ.
1/2

— Maldives Police (@PoliceMv) December 21, 2024