އެޗްޑީސީން ވިއްކާފައިވާ ބިންތަކާ ގުޅޭ ދޮގު ވާހަކަތައް ނުފަތުރުމަށް އިލްތިމާސްކޮށްފި

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އާންމުކޮށް އިޢުލާންކޮށްގެން ވިއްކާފައިވާ ބިންތަކާ ގުޅޭގޮތުން ހަޤީޤަތާ ޚިލާފު ވާހަކަތައް ނުދެއްކުމަށް އިލްތިމާސްކޮށްފިއެވެ. މި އިލްތިމާސް ކުރައްވާފައިވަނީ "ބިންވެރިޔާ" ސްކީމާ ގުޅިގެން އެޗްޑީސީއަށް ބައެއް ތުހުމަތުތައް އަމާޒުވެފައިވާ ދަނޑިވަޅެއްގައެވެ.

 އެޗްޑީސީން ނެރުއްވާފައިވާ ބަޔާނެއްގައި ވިދާޅުވެފައިވަނީ، ދިރިއުޅުމުގެ ބޭނުމަށް ހުޅުމާލެއިން ވިއްކުމަށް އިޢުލާންކޮށްފައިވާ ބައެއް ބިންތައް ބީލަމުގެ އުސޫލާ ޚިލާފަށް ވިއްކާފައިވާކަމަށް ތުހުމަތުކޮށް، އެ ކޯޕަރޭޝަންގެ އިތުބާރު ގެއްލޭ ގޮތަށް ބައެއް ފަރާތްތަކުން ޚަބަރު ފަތުރަމުންދާ ކަމަށެވެ.

 އެޗްޑީސީން އިތުރަށް ވިދާޅުވެފައިވަނީ، ދިރިއުޅުމުގެ ބޭނުމަށް ހުޅުމާލެއިން ބިން ވިއްކާފައިވަނީ އާންމުކޮށް އިޢުލާނުކުރުމާއެކު ހުޅުވާލެވިފައިވާ ބިޑިންގ ޕްރޮސެސްއެއްގެ ތެރެއިން ކަމަށެވެ. މި ޕްރޮސެސްގައި، ފުރަތަމަ މަރުޙަލާގައި ކަނޑައެޅޭ ބިމަކަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމަށްފަހު، އީއޯއައި ހުށަހެޅި ފަރާތްތަކަށް ބިޑް ކުރުމަށް ހުޅުވާލެވޭނެ ކަމަށް ބަޔާންކޮށްފައިވެއެވެ.

އަދި ބިން ގަތުމުގެ ފުރުޞަތު ދެވިފައިވަނީ ބިޑް ކުރުމަށް ކަނޑައެޅިފައިވާ ވަގުތު ނިމޭއިރު އެންމެ މަތީ އަގު ހުށަހަޅާ ފަރާތްތަކަށް ކަމަށްވެސް އެޗްޑީސީން ފާހަގަކޮށްފައިވެއެވެ. އީއޯއައި ހުށަހެޅޭނީ އިޢުލާންކޮށްފައިވާ ބިމުގެ ބޭސް ރޭޓަށްވުރެ ދަށް ނޫން އަގެއްގައި ކަމަށާއި، ބޭސް ރޭށާއި، ބޭސް ރޭޓުގެ ގޮތުގައި ކަނޑައަޅާފައިވަނީ އެ ކޯޕަރޭޝަންގެ ބޯޑް އޮފް ޑައިރެކްޓަރުން އެންޑޯޒްކޮށްފައިވާ ރޭޓް ކަމަށްވެސް އެޗްޑީސީން ހާމަކޮށްފައިވެއެވެ.

މި ހުރިހާ ކަމަކަށް ރިޢާޔަތްކޮށް، އެޗްޑީސީން އާންމުކޮށް އިޢުލާންކޮށްގެން ވިއްކާފައިވާ ބިންތަކާ ގުޅޭގޮތުން ހަޤީޤަތާ ޚިލާފު ވާހަކަތައް ނުދެއްކުމަށް އެޗްޑީސީން ވަނީ އިލްތިމާސްކޮށްފައެވެ.