ހަށިވިއްކުމުގެ ވިޔަފާރީގައި އުޅުނު 3 ބިދޭސީއަކު ޑީޕޯޓުކޮށްލައިފި

ރާއްޖޭގައި ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރަމުންދިޔަ ބިދޭސީންތަކެއް އަތުލައިގަނެ، އޭގެ ތެރެއިން 3 ބިދޭސީއަކު މޯލްޑިވްސް އިމިގްރޭޝަނުން ޑީޕޯޓުކޮށްލައިފިއެވެ.

 ރާއްޖޭގައި ގަވާއިދާ ޚިލާފަށް އުޅެމުންދާ ބިދޭސީން ހޯދުމަށް ސަރުކާރުގެ ކަމާގުޅުންހުރި އިދާރާތައް ގުޅިގެން ހިންގަމުންދާ ބޮޑު އޮޕަރޭޝަނެއްގެ ދަށުން ކުރިއަށްގެންދިޔަ އިންސްޕެކްޝަނެއްގައި 7 ބިދޭސީ އަންހެނުންނާއި، އޭޖެންޓުންގެ ގޮތުގައި މަސައްކަތް ކުރަމުންދިޔަ 2 ފިރިހެނަކު މޯލްޑިވްސް އިމިގްރޭޝަނުގެ ބެލުމުގެ ދަށަށް ގެންގޮސްފައިވެއެވެ.

 އިމިގްރޭޝަނުން މައުލޫމާތު ދެއްވާފައިވާ ގޮތުގައި، މިމައްސަލަ ތަހުގީގުކުރުމަށްފަހު މިހާރު މީގެތެރެއިން 3 އަންހެނަކު އަނބުރާ ރާއްޖެ ނާދެވޭގޮތަށް ޑީޕޯޓުކޮށްލާފައިވެއެވެ. އަދި ދެންތިބި 6 ބިދޭސީން ޑީޕޯޓުކުރުމުގެ މަސައްކަތް ކުރަމުންދާކަމަށްވެސް އިމިގްރޭޝަނުން ވިދާޅުވެފައިވެއެވެ.

 މިބިދޭސީންގެ ތެރޭގައި ހިމެނެނީ ބަންގްލަދޭޝް، ވިއެޓްނާމް، އަދި ޔުގާންޑާއަށް ނިސްބަތްވާ ބިދޭސީންނެވެ. މިމީހުން އަތުލައިގަނެފައިވަނީ މާލޭގައި ކުރިއަށްގެންދިޔަ އިންސްޕެކްޝަނެއްގައިކަމަށް އިމިގްރޭޝަނުން ހާމަކުރައްވާފައިވެއެވެ.

 ދާޚިލީ ސަލާމަތާއި ފަންނިއްޔަތާއި ބެހޭ ވުޒާރާއާއި، މޯލްޑިވްސް އިމިގްރޭޝަނާއި ދިވެހި ފުލުހުންގެ ޚިދުމަތް ގުޅިގެން ގަވާއިދާ ޚިލާފަށް އުޅެމުންދާ އަދި ވިޔަފާރިކުރަމުންދާ ބިދޭސީން ދެނެގަތުމުގެ މަސައްކަތް ދަނީ ކުރަމުންނެވެ. މިހާތަނަށް 5000 އަށްވުރެ ގިނަ ބިދޭސީން ވަނީ އަނބުރާ އެމީހުން ނިސްބަތްވާ ޤައުމުތަކަށް ފޮނުވާލާފައެވެ.

 ރާއްޖޭގައި ޤަވާއިދާ ޚިލާފަށް އުޅޭ ބިދޭސީންނާ ގުޅޭ މައްސަލަތައް ހުށައެޅުމަށް "އިމިގްރޭޝަން ވޮޗް" ގެ ނަމުގައި އޮންލައިން ޕްލެޓްފޯމެއްވެސް ވަނީ ޤާއިމްކޮށްފައެވެ. މިހާތަނަށް އިމިގްރޭޝަން ވޮޗަށް 1000 އަށްވުރެ ގިނަ މައްސަލަ ހުށަހަޅާފައިވާކަމަށް އިމިގްރޭޝަނުން ވަނީ ހާމަކުރައްވާފައެވެ.

 މީގެއިތުރުން، ބިދޭސީންގެ މަޢުލޫމާތު އެއްކުރުމަށް "އޮޕަރޭޝަން ކުރަނގި" ގެ ނަމުގައި ހަރަކާތެއްވެސް ދަނީ ހިންގަމުންނެވެ. މިހާތަނަށް 50 ރަށެއްގައި މިމަސައްކަތް ވަނީ ކުރިއަށް ގެންގޮސްފައެވެ. ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވިދާޅުވެފައިވާ ގޮތުގައި، މިހާތަނަށް 18،919 ބިދޭސީންގެ ބަޔޯމެޓްރިކް މައުލޫމާތު އެއްކޮށްފައިވެއެވެ. އަދި މިމަސައްކަތް ރާއްޖޭގެ 194 ރަށެއްގައި ފަށާފައިވާ ކަމަށްވެސް އެވުޒާރާއިން ވަނީ ހާމަކުރައްވާފައެވެ.

 ރާއްޖޭގައި ޤާނޫނާ ޚިލާފަށް ދިރިއުޅެމުންދާ ބިދޭސީންގެ މައްސަލައަކީ ދިވެހި ސަރުކާރުން ޚާއްޞަ އަހައްމިއްޔަތުކަމެއް ދެއްވާ މައްސަލައެކެވެ. މިކަމަށް ދާއިމީ ހައްލެއް ހޯދުމަށްޓަކައި ސަރުކާރުގެ އެކި މުއައްސަސާތައް ގުޅިގެން މަސައްކަތްތަކެއް ކުރަމުންދާކަން ފާހަގަކުރެވެއެވެ.

ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދިއަ ބިދޭސީން ހޯދުމަށް އިމިގްރޭޝަނާއި ފުލުހުން ގުޅިގެން ހިންގި ހާއްސަ އިންސްޕެކްޝަންތަކެއްގައި ބިދޭސީ 07 އަންހެނަކާއި އެޖެންޓުންގެ ގޮތުގައި މަސައްކަތް ކުރަމުންދިއަ ބިދޭސީ 02 ފިރިހެނަކު ވަނީ އިމިގްރޭޝަންގެ ބެލުމުގެ… pic.twitter.com/cjZOti9mKK

— Maldives Immigration (@ImmigrationMV) December 21, 2024