ޚަބަރު
ޖަމިއްޔަތުއް ސަލަފުން އަލީ ރަމީޒު އިސްތިއުފާދީފި

އަލީ ރަމީޒް ފޮޓޯ: ރަސް އޮންލައިން
ދީނީ ޢިލްމު ކުރިއެރުވުމަށް މަސައްކަތް ކުރައްވާ އަލީ ރަމީޒު ޖަމިއްޔަތުއް ސަލަފުން އިސްތިއުފާދީފިއެވެ. އޭނާ މި ކަން ހާމަކުރީ ސޯޝަލް މީޑިއާގައި ހިއްސާ ކުރި މެސެޖެއްގައެވެ. ނަމަވެސް، މިކަމާ ގުޅޭ އިތުރު ތަފުސީލު އޭނާ ހިއްސާކޮށްފައެއް ނުވެއެވެ.
އަލީ ރަމީޒަކީ ޖަމިއްޔަތުއް ސަލަފްގެ ހިންގުމުގައި އިސްކޮށް ހަރަކާތްތެރިވާ އެ ޖަމިއްޔާގެ މުއައްސިސެކެވެ. އޭނާގެ މި ނިންމުމާ ގުޅިގެން ބައެއް މީހުން ޚިޔާލު ފާޅުކޮށްފައި ވާއިރު، ޖަމިއްޔަތުއްސަލަފަށް ސިޔާސީ ފިކުރު ވަންނަކަމަށް ތުހުމަތު ކޮށްފައި ވެއެވެ. އަދި އެންމެ ރަނގަޅު ގޮތަކީ އެ ފިކުރުގައި ނުޖެހި މިނިވަންކަން މަތީ ދީނީ ހޭލުންތެރިކަން އިތުރުކުރުން ކަމަށް ވެސް ބައެއް މީހުން ބުނެފައި ވެއެވެ.
އަލީ ރަމީޒު ދިވެހިންގެ ތެރޭގައި ފުރަތަމަ މަޝްހޫރުވީ ކުޅަދާނަ ލަވަކިޔުންތެރިއެއްގެ ގޮތުގައެވެ. ނަމަވެސް، ފަހުން ލަވަކިޔުން ހުއްޓާލައި އޭނާ ވަނީ ދީނީ ހޭލުންތެރިކަން އިތުރުކުރުމަށް މަސައްކަތް ކޮށްފައެވެ.
ޖަމިއްޔަތުއް ސަލަފަކީ ރާއްޖޭގައި ދީނީ ހޭލުންތެރިކަން އިތުރު ކުރުމަށް މަސައްކަތް ކުރަމުން އަންނަ ޖަމިއްޔާ އެކެވެ. އެ ޖަމިއްޔާގައި ގިނަ އަދަދެއްގެ ދީނީ ޢިލްމުވެރިން ހަރަކާތްތެރި ވާއިރު، ފާއިތުވި އަހަރުތަކުގައި ސަލަފްއިން ދީނީ އެކި ހަރަކާތްތައް ބާއްވައި އިންތިޒާމް ކޮށްފައިވެއެވެ.
އަލީ ރަމީޒުގެ މި ނިންމުމުގެ ސަބަބުން ޖަމިއްޔަތުއް ސަލަފްގެ މަސައްކަތްތަކަށް އަންނާނެ ބަދަލުތަކާ މެދު ގިނަ ބަޔަކު ސުވާލު އުފައްދަމުންދާއިރު، މި ކަމާ ގުޅޭގޮތުން ޖަމިއްޔާއިން އަދި އެއްވެސް ބަޔާނެއް ނެރެފައެއް ނުވެއެވެ.