ސެގާއިން ވީޑިއޯ ގޭމް ސްޓްރީމިންގ ޚިދުމަތެއް ތަޢާރަފުކުރަނީ

ދުނިޔޭގެ މަޝްހޫރު ވީޑިއޯ ގޭމް އުފައްދާ ކުންފުނި ސެގާއިން ނެޓްފްލިކްސްގެ ފަދަ ސަބްސްކްރިޕްޝަން ޚިދުމަތެއް ތަޢާރަފުކުރުމަށް ވިސްނަމުންދާ ކަމަށް އެ ކުންފުނީގެ ރައީސް ޝޫޖީ އުޓްސުމީ ވަނީ ހާމަކޮށްފައެވެ. މިއީ ވީޑިއޯ ގޭމް ސިނާޢަތުގައި ސްޓްރީމިންގއަށް ބަދަލުވަމުންދާ ދަތުރު އަވަސްކުރުވާނެ ކަމެއް ކަމަށް ބެލެވެއެވެ.

ބީބީސީއަށް ދެއްވި ޚާއްޞަ އިންޓަވިއުއެއްގައި އުޓްސުމީ ވިދާޅުވީ މިފަދަ ސަބްސްކްރިޕްޝަން ޚިދުމަތްތަކަކީ "ވަރަށް ޝައުޤުވެރިވާ" ކަމެއް ކަމަށާއި، އެ ކުންފުނިން މިހާރު ވެސް ބައެއް ފުރުޞަތުތައް ދިރާސާކުރަމުންދާ ކަމަށެވެ. "އަޅުގަނޑުމެން މިވަގުތު ވިސްނަމުންދާގޮތް ހާމަނުކުރެވޭނެ  - އަދި މިދަނީ މަޝްވަރާކުރަމުން،" އޭނާ ވިދާޅުވިއެވެ.

މިހާރުވެސް އެކްސްބޮކްސް ގޭމް ޕާސް އަދި ޕްލޭސްޓޭޝަން ޕްލަސް ފަދަ ގިނަ ޚިދުމަތްތަކެއް ބާޒާރުގައި ވާކަން ފާހަގަކުރެވެއެވެ. މި ޚިދުމަތްތަކުގައި ކުޅޭ މީހުން މަހަކު ވަކި ފީއެއް ދައްކައިގެން ގިނަ އަދަދެއްގެ ގޭމްތަކަށް ވާސިލުވުމުގެ ފުރުޞަތު ލިބެއެވެ.

 ނަމަވެސް، މި ދާއިރާގެ ބައެއް ފަރާތްތަކުން ކަންބޮޑުވުން ފާޅުކޮށްފައިވެއެވެ. އެގޮތުން، މިކަމުގެ ސަބަބުން ގޭމް ކުޅޭ މީހުން "އިތުރު ފައިސާ ޚަރަދުކުރަން ޖެހިދާނެ" ކަމަށް ބައެއް  ފަރާތްތަކުން ބީބީސީއަށް ބުނެފައިވެއެވެ.

 މިހާރު ވެސް ސެގާގެ ގިނަ ގޭމްތަކެއް އެކި ސްޓްރީމިންގ ޚިދުމަތްތަކުގައި ލިބެން ހުރެއެވެ. ނަމަވެސް، ސެގާއިން އަމިއްލަ ޚިދުމަތެއް ތަޢާރަފުކޮށްފިނަމަ، އެ ކުންފުނީގެ ގޭމްތައް ކުޅޭ މީހުން ސެގާއަށް ސީދާ ސަބްސްކްރިޕްޝަން ފީ ދެއްކުމަކީ އެ ކުންފުންޏަށް މާލީ ގޮތުން ފައިދާހުރި ކަމަކަށް ވެދާނެއެވެ.

 ގޭމް ކުޅުމުގެ ދާއިރާގެ ތަޖުރިބާކާރުންގެ ތެރެއިން ގިނަ ބަޔަކު ދެކޭ ގޮތުގައި، މި ބަދަލަކީ ސެގާގެ ގޭމްތަކަށް ޝައުޤުވެރިވާ މީހުންނަށް ފައިދާހުރި ކަމަކަށް ވެދާނެއެވެ. ނަމަވެސް، އެހެން ހުރިހާ މީހުންނަށް މީގެ ސަބަބުން އިތުރު ޚަރަދުތަކެއް ކުރަން ޖެހިދާނެ ކަމަށް ވެސް ބެލެވެއެވެ.