ސީރިއާގެ އާ ވެރިކަމުން "ކެޕްޓަގޮން" މަސްތުވާތަކެތީގެ ވިޔަފާރި ނައްތާލަން އަޒުމު ކަނޑައަޅައިފި

 ސީރިއާގެ އާ ވެރިކަމުގެ އިސްވެރިޔާ އަހުމަދު އަލް-ޝަރާ ވަނީ ސީރިއާއިން ކެޕްޓަގޮން މަސްތުވާތަކެތީގެ ވިޔަފާރި ނައްތާލުމަށް އަޒުމު ކަނޑައަޅާފައެވެ. މިކަން އޭނާ ހާމަކުރީ ދާދިފަހުން ދިމަޝްޤުގައި ދެއްކި ވާހަކައެއްގައެވެ.

 ކެޕްޓަގޮންއަކީ މެދުއިރުމަތީގައި ފުޅާ ދާއިރާއެއްގައި ބޭނުންކުރާ، އެމްފެޓަމިން ބާވަތުގެ މަސްތުވާތަކެއްޗެކެވެ. މި ތަކެތި އުފެއްދުމާއި ވިޔަފާރިކުރުމުގައި ސީރިއާއަކީ މައި މަރުކަޒުކަމަށް ވޯލްޑް ބޭންކުން ވަނީ ފާހަގަކޮށްފައެވެ. މި ވިޔަފާރީގެ އަހަރީ އަގު 5.6 ބިލިއަން ޑޮލަރު ކަމަށް ވެއެވެ.

 އަލް-ޝަރާގެ ވާހަކައަށްފަހު، ސީރިއާގެ ކުރީގެ ވެރިކަމާ ގުޅުންހުރި ތަންތަނުން ގިނަ އަދަދެއްގެ ކެޕްޓަގޮން ފެނިފައިވާ މަންޒަރުތައް ވަނީ ހާމަވެފައެވެ. މީގެ ތެރޭގައި އަސަދުގެ ގާތްތިމާގެ މީހުންގެ ކަމަށް ބެލެވޭ ތަންތަނުން ފެނުނު ކެޕްޓަގޮން އުފައްދާ ތަކެއްޗާއި، ސިފައިންގެ އެއަރބޭސްއަކުން ފެނުނު ގިނަ އަދަދެއްގެ ކެޕްޓަގޮން ހިމެނެއެވެ.

 ނަމަވެސް، މި ވިޔަފާރި ހުއްޓާލުމުން ސީރިއާގެ އިޤްތިޞާދަށް ކުރާނެ އަސަރާ މެދު ސުވާލު އުފެދެއެވެ. އަދި މިހާރު ކެޕްޓަގޮންއަށް ދެވިހިފާފައިވާ މީހުންނަށް ލިބޭނެ އަސަރާ މެދުވެސް ކަންބޮޑުވުން ފާޅުކުރެވެއެވެ. ނިއު ލައިންސް އިންސްޓިޓިއުޓްގެ ކެރޮލައިން ރޯސް ވިދާޅުވި ގޮތުގައި، އެޗްޓީއެސްއިން ކެޕްޓަގޮންގެ ސަޕްލައި ހުއްޓުވުމަށް މަސައްކަތްކުރުމުގެ ބަދަލުގައި، މި ތަކެއްޗަށް ޑިމާންޑް ކުޑަކުރުމަށް މަސައްކަތްކުރުން މުހިންމެވެ.