ޤައުމީ ކެޑޭޓް ކޭމްޕް ފެށިއްޖެ: 120 ކެޑޭޓުން ބައިވެރިވި

ގިރިފުށީ ޓްރެއިނިންގ ސެންޓަރުގައި މިއަދު ހެނދުނު 24 ވަނަ ޤައުމީ ކެޑޭޓް ކޭމްޕް އިފްތިތާޙު ކުރެވިއްޖެއެވެ. މި ރަސްމިއްޔާތު ޝަރަފުވެރިކޮށްދެއްވީ އެމްއެންޑީއެފް ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީޒްގެ ކޮމާންޑިންގ އޮފިސަރ އަދި މޯލްޑިވްސް ނޭޝަނަލް ކެޑޭޓް ކޯރ (އެމްއެންސީސީ)ގެ ކޮމާންޑިންގ އޮފިސަރ، ބްރިގޭޑިއަރ ޖެނެރަލް ޢަބްދުﷲ އިބްރާހީމްއެވެ.

 މި ކޭމްޕްގައި ރާއްޖޭގެ އެކި ކަންކޮޅުތަކުގެ 44 ސްކޫލަކުން ޖުމްލަ 120 ކެޑޭޓުން ބައިވެރިވެފައިވެއެވެ. މީގެ ތެރޭގައި 66 ފިރިހެން ކެޑޭޓުންނާއި 54 އަންހެން ކެޑޭޓުން ހިމެނެއެވެ. މި ކޭމްޕް ކުރިއަށްދާނީ އަންނަ އަހަރުގެ ޖަނަވަރީ މަހުގެ 1 ވަނަ ދުވަހުގެ ނިޔަލަށެވެ.

 ރަސްމިއްޔާތުގައި ވާހަކަފުޅު ދައްކަވަމުން ބްރިގޭޑިއަރ ޖެނެރަލް ޢަބްދުﷲ އިބްރާހީމް، ކެޑޭޓުންނަށް ވާދަވެރި ރޫޙެއްގައި ކޯހުން ވަނަ ހާސިލުކުރުމަށް ހިތްވަރުދެއްވިއެވެ. އަދި ކޭމްޕްގައި އުނގަންނައިދޭ ޢިލްމާއި ހުނަރުގެ ބޭނުން ޢަމަލީ މައިދާނުގައި ހިފުމަށް ނަސޭހަތްތެރިވެވަޑައިގެންނެވިއެވެ.

 މި ކޭމްޕްގެ މައިގަނޑު މަޤްޞަދަކީ ކެޑޭޓުންނަކީ މުޖުތަމަޢަށް ފައިދާހުރި، ޒިންމާދާރު ރައްޔިތުންގެ ގޮތުގައި ބިނާކުރުމާއި، ހަރުދަނާ އަޚްލާޤާއި ރިވެތި ސުލޫކެއްގެ ވެރިންގެ ގޮތުގައި އުފެއްދުމެވެ. މީގެ އިތުރުން ދީނީ އަދި ޤައުމީ ރޫޙު އާލާކޮށް، އަސްކަރީ ހުނަރުތައް ދަސްކޮށްދިނުމަކީވެސް މި ކޭމްޕްގެ މުހިންމު މަޤްޞަދުތަކެވެ.

 ކޭމްޕްގައި ކިޔަވައިދެއްވަނީ ދިވެހިރާއްޖޭގެ ޤައުމީ ދިފާޢީ ބާރުގެ މުދައްރިބުންނެވެ. އަދި ކޭމްޕްގެ އެންމެހާ އިދާރީ އަދި ލޮޖިސްޓިކް ކަންކަން ބަލަހައްޓަނީވެސް ދިވެހިރާއްޖޭގެ ޤައުމީ ދިފާޢީ ބާރުންނެވެ. ސްކޫލުތަކާ ގުޅޭ ކަންކަން ހަމަޖައްސަނީ ތަޢުލީމީ ވުޒާރާގެ ލަފަޔާއި އިރުޝާދުގެ މަތިން މޯލްޑިވްސް ނޭޝަނަލް ކެޑޭޓް ކޯރއިންނެވެ.

 މި ރަސްމިއްޔާތުގައި އެމްއެންޑީއެފްގެ އިސް އޮފިސަރުންނާއި، އެމްއެންސީސީގެ އިސް ވެރިން ބައިވެރިވެވަޑައިގެންނެވިއެވެ.