ތަހުޤީޤުގެ ކަންކަމަށް ފަހިކުރުމަށް އެޗްޑީސީގެ 15 މުވައްޒަފަކު ވަޒީފާއިން ވަކިކޮށްފި

މިހާރު ހިންގަމުންދާ ގެދޮރުވެރިޔާ/ބިންވެރިޔާ ސްކީމާ ގުޅޭ މައްސަލައާއި ގުޅޭ ތަހުޤީޤުގެ ކަންކަމަށް ފަހިކުރުމަށް ހައުސިންގ ޑިވަލޮޕްމެންޓް ކޯޕަރޭޝަންގެ 15 މުވައްޒަފަކު ވަޒީފާއިން ވަކިކޮށްފިއެވެ. 

އެޗްޑީސީގެ 15 މުވައްޒަފަކު ވަޒީފާއިން ވަކިކޮށްފައިވަނީ ޕްރޮސެކިއުޓާ ޖެނެރަލް ޢައްބާސް ޝަރީފްގެ އަމުރަކަށް ފުލުހުންނާއި އޭސީސީ ގުޅިގެން ހިންގާ ޖިނާއީ ތަހުޤީޤަކަށް މަގުފަހިކުރުމަށެވެ. 

ބިންވެރިޔާ ސްކީމްގައި އޮޅުވާލުމާއި މަކަރު ހެދުމުގެ މައްސަލަތަކެއް ހުރިކަން ފާހަގަވެ އެމައްސަލަ ފުލުހުން ބަލަން ފަށައިފައިވަނީ މިދިޔަ ހަފްތާގެ ބުރާސްފަތި ދުވަހުއެވެ. ބުދަދުވަހު ފެންމަތިވެ މިމައްސަލައާއި ގުޅިގެން ފުލުހުން ވަނީ އެރޭގެ ވަގުތެއްގައި އެޗްޑީސީ އަށް ވަދެ ހެކިހޯދުމުގެ މަސައްކަތް ކޮށްފައިވެއެވެ. 

މިމައްސަލައާއި ގުޅިގެން އެޗްޑީސީގެ މެނޭޖިންގެ ޑިރެކްޓަރ ފަޟުލް ރަޝީދު މަޤާމުގެ މަސްޢޫލިއްޔަތު ތަކުން ދުރުކުރިއިރު އޭނާގެ ބޭބެ އެމްޑަބްލިޔުއެސްސީގެ ޑެޕިޔުޓީ އެމްޑީ އަަކަށް ހުރި ފަޒީލް ރަޝީދު ވެސް ވަނީ މަޤާމުން މަސްޢޫލިއްޔަތު ތަކުން ދުރުކޮށްފައެވެ. 

މިމައްސަލައާއި ގުޅިގެން ފަޟުލް އަށް ތުހުމަތުތައް ކުރެވެން ފެށުމުން އޭނާ ވަނީ އެޗްޑީސީގެ އެމްޑީގެ މަޤާމުން ރޭ އިސްތިޢުފާ ދީފައެވެ. އެމަޤާމުން ފަޟުލް އިސްތިޢުފާ ދިނުމުން އެޗްޑީސީޫގެ އެމްޑީގެ މަޤާމަށް ވަނީ ކުރީގެ ޢިމާރާތްކުރުމާ ބެހޭ ވަޒީރު މަޢުރޫފް ޖަމީލް ވަނީ އައްޔަނުކުރައްވައިފައެވެ.

ބިންވެރިޔާ ސްކީމްގެ މައްސަލާގެ ތަހުޤީޤަށް ފަޟުލް އާއި ފަޒީލް ހިމެނޭގޮތައް 20 މީހެއް ފުރުން މަނާކުރުމުގެ އަމުރަކަށް ފުލުހުން އެދިފައިވެއެވެ. އޭގެ ތެރޭގައި މިދިޔަ ސަރުކާރުގެ ގެދޮރުވެރިކަމާ ބެހޭ ވުޒާރާގެ ނައިބު ވަޒީރު އަކްރަމް ކަމާލުއްދީންވެސް ހިމެނެއެވެ.