ކައިވެނީގެ އުފާވެރިކަން ހަފުތާ ބަންދުގައިވެސް: ފެމިލީ ކޯޓުން އަންނަ އަހަރު ކޮންމެ ދުވަހަކު ކައިވެނިކޮށްދޭން ނިންމައިފި

ފެމިލީ ކޯޓުން އަންނަ އަހަރު ހަފުތާ ބަންދު ދުވަސްތައްވެސް ހިމެނޭހެން ހުރިހާ ދުވަހެއްގައި ކައިވެނިކޮށްދޭން ނިންމައިފިއެވެ. މިއީ ގިނަ މީހުންގެ އެދުމުގެ މަތިން ނިންމާފައިވާ ނިންމުމެކެވެ.

ފެމިލީ ކޯޓުން މިކަން އިޢުލާންކުރެއްވީ އިއްޔެއެވެ. މި ނިންމުމާއެކު، ކުރީގެ އަހަރުތަކާ ޚިލާފަށް، އަންނަ އަހަރު ހަފުތާ ބަންދު ދުވަސްތަކުގައިވެސް ކޯޓުގައި ކައިވެނިކޮށްދެވޭނެއެވެ.

ހުކުރު ދުވަހު ކައިވެނިކޮށްދޭނީ މެންދުރުފަހު 3 އިން ފެށިގެން ރޭގަނޑު 9:30 އާ ހަމައަށެވެ. ހޮނިހިރު ދުވަހު ކައިވެނިކޮށްދޭނީ ހެނދުނު 10 އިން ފެށިގެން ރޭގަނޑު 9:30 އާ ހަމައަށެވެ. ރަސްމީ ދުވަސްތަކުގައި ހެނދުނު 9 އިން ރޭގަނޑު 9:30 އާ ހަމައަށް ކޯޓުގައި ކައިވެނިކޮށްދެވޭނެއެވެ.

ކޯޓުން ބޭރުގައި ކައިވެނިކޮށްދޭނީ މެންދުރުފަހު 3 އިން ފެށިގެން ރޭގަނޑު 9:30 އާ ހަމައަށެވެ. ރިސޯޓްތަކާއި ސަފާރީތަކުގައި ކައިވެނިކޮށްދޭނެ ވަގުތުތައް ކަނޑައަޅާނީ އެކަމަށް އެދި ހުށަހެޅުމުންނެވެ.

ފެމިލީ ކޯޓުން އިތުރަށް ވިދާޅުވެފައިވަނީ އަންނަ ރަމަޟާން މަހު ކައިވެނިކޮށްދޭނެ ގަޑިތައް ފަހުން އިޢުލާންކުރާނެ ކަމަށެވެ.