ދުނިޔެ
އެމެރިކާއިން އޮޅިގެން އަމިއްލަ އަސްކަރީ މަތިންދާބޯޓަކަށް ޙަމަލާދީ ވައްޓާލައިފި

އެފް/އޭ-18 ހޯނެޓް މަރުކައިގެ އުޅަނދެއް ފޮޓޯ: އިންޓަނެޓް
ރަތް ކަނޑުގެ މަތިން ދަތުރުކުރަމުން ދިޔަ އެމެރިކާގެ އަސްކަރީ މަތިންދާބޯޓަކަށް އޮޅިގެން ޙަމަލާއެއް ދެވި ވައްޓާލެވިފައިވާ ކަމަށް އެމެރިކާއިން ބުނެފިއެވެ. މި ހާދިސާ ހިނގާފައިވަނީ އެމެރިކާގެ މަތިންދާބޯޓު އުފުލާ މަނަވަރު ހެރީ އެސް ޓްރޫމަނުން އުދުއްސާލި އެފް/އޭ-18 ހޯނެޓް މަރުކައިގެ އުޅަނދަކަށެވެ.
ޔޫ އެސް ސެންޓްރަލް ކޮމާންޑުން ނެރުނު ބަޔާނެއްގައި ބުނެފައިވާ ގޮތުގައި، މި ހާދިސާ ހިނގާފައިވަނީ ކެރިއާގެ އެސްކޯޓް ޝިޕްތަކުގެ ތެރެއިން އެއް ބޯޓު ކަމަށްވާ މިސައިލް ކްރޫޒާ ގެޓިސްބަރގަށް އޮޅިގެން މަތިންދާބޯޓަށް ބަޑިޖެހުމުގެ ސަބަބުންނެވެ.
މި ޙަމަލާއާ ގުޅިގެން މަތިންދާބޯޓު ދުއްވަން ތިބި ދެ ޕައިލެޓުން ވެސް ވައިކުޑައިގައި ފުންމާލާފައިވެއެވެ. ކުޑަވަގުތު ކޮޅެއްގެ ތެރޭގައި އެ ދެ މީހުން ވެސް ވަނީ ސަލާމަތްކޮށްފައެވެ. ނަމަވެސް، އޭގެ ތެރެއިން އެއް ޕައިލެޓަށް އެކި ވަރުގެ އަނިޔާތައް ލިބިފައިވާ ކަމަށް އެމެރިކާގެ އަސްކަރިއްޔާއިން މަޢުލޫމާތު ދީފައިވެއެވެ.
މި ހާދިސާ ހިނގާފައިވަނީ ރަތް ކަނޑުން ދަތުރު ކުރާ އާގުބޯޓުފަހަރުގެ ހިމާޔަތުގައި އެމެރިކާގެ އަސްކަރީ އުޅަނދުތައް އެ ސަރަޙައްދުގައި ޙަރަކާތްތެރިވަމުންދާ ދަނޑިވަޅެއްގައެވެ. މި ޙަރަކާތްތައް ހިންގަމުންދަނީ ޔަމަންގެ ހަތިޔާރު އެޅި ޖަމާޢަތް، ޙޫޘީން ހިންގަމުންދާ އަސްކަރީ ޙަރަކާތްތަކާ ގުޅިގެންނެވެ.
ޙޫޘީންގެ މި ޙަރަކާތްތަކަކީ ފަލަސްޠީނުގެ ޣައްޒާގެ މުސްލިމުންނަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާ ދެކޮޅަށް ފަށާފައިވާ ޙަރަކާތްތަކެކެވެ. މި ޙަމަލާތަކުގައި ޙޫޘީން ދަނީ އެންމެ ފަހުގެ ޒަމާނީ އަސްކަރީ ޑްރޯންތަކާއި ބެލިސްޓިކް މިސައިލް ފަދަ ނުރައްކާތެރި ހަތިޔާރުތައް ބޭނުން ކުރަމުންނެވެ.
އެމެރިކާގެ އަސްކަރިއްޔާއިން ބުނެފައިވާ ގޮތުގައި ހޮނިހިރު ދުވަހު ވެސް ރަތް ކަނޑުގެ މަތީގައި ޙޫޘީންގެ ޑްރޯންތަކަކާއި މިސައިލްތަކެއް ވައްޓައިލުމުގެ އިތުރުން، ޔަމަނުގެ ވެރިރަށް ޞަންޢާގައި ހުންނަ އެ ޖަމާޢަތުގެ މަރުކަޒުތަކަށް ބޮން އަޅާފައިވެއެވެ. މި ހާދިސާއާ ގުޅިގެން އިތުރު ތަޙްޤީޤުތައް ކުރިއަށްދާ ކަމަށް އެމެރިކާގެ އަސްކަރިއްޔާއިން ބުނެފައިވެއެވެ.