ގެދޮރުވެރިޔާ ފްލެޓްތަކަށް އަލުން ހުށަހެޅުމުގެ ފުރުޞަތު ހުޅުވާލިކަމަށް ބުނާ މެސެޖުތަކަކީ ސްކޭމެއް: ފުލުހުން

ގެދޮރުވެރިކަމާއި ބިމާއި އުމްރާނީ ތަރައްޤީއާބެހޭ ވުޒާރާގެ ހުރިހާ ލިޔެކިޔުންތަކެއް އަނދައިގެން ދިޔުމާ ގުޅިގެން ގެދޮރުވެރިޔާ ފްލެޓްތަކަށް އަލުން ހުށަހެޅުމުގެ ފުރުޞަތު ހުޅުވާލާފައިވާ ކަމަށް ބުނެ ފޮނުވަމުންދާ މެސެޖުތަކަކީ ސައްޙަ ނޫން މެސެޖުތަކެއް ކަމަށް ފުލުހުން ވަނީ އިއުލާނުކޮށްފައެވެ.

މިކަން ހާމަކުރައްވާފައިވަނީ ދިވެހި ފުލުހުންގެ ޚިދުމަތުން ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައެވެ. މި ޕޯސްޓުގައި ފުލުހުން ވިދާޅުވެފައިވަނީ ހައުސިންގ މިނިސްޓްރީގެ ލިޔެކިޔުންތައް އަނދައިގެން ދިޔުމާ ގުޅިގެން ގެދޮރުވެރިޔާ ފްލެޓްތަކަށް އަލުން ފޯމު ލުމުގެ ފުރުޞަތު އެ ވުޒާރާއިން ހުޅުވާލާފައިވާ ކަމަށް ބުނެ، ލިންކަކާއެކު ފޮނުވަމުންދާ މެސެޖަކީ ސައްޙަ މެސެޖެއް ނޫން ކަމަށެވެ.

އަދި މި ފަދަ މެސެޖުތަކާމެދު ސަމާލުވުމަށް ފުލުހުން ވަނީ އާންމުންނަށް އިލްތިމާސްކުރައްވާފައެވެ.

މި މަހުގެ 12 ވަނަ ދުވަހު ހިނގި އަލިފާނުގެ ހާދިސާގައި ގެދޮރުވެރިކަމާއި ބިމާއި އުމްރާނީ ތަރައްޤީއާބެހޭ ވުޒާރާއާއި އިމާރާތްކުރުމާއި ބިނާވެށި ޕްލޭނިންގއާބެހޭ ވުޒާރާ ހިންގަމުންދިޔަ އިމާރާތް ބޭނުން ނުކުރެވޭ ވަރަށް އަނދައިގެން ގޮސްފައިވީ ނަމަވެސް، އެ ހާދިސާއާ ގުޅިގެން ގެދޮރުވެރިކަމާ ގުޅޭ އެއްވެސް ސްކީމެއްގެ ލިޔެކިއުމަކަށް އަސަރުނުކުރާ ކަމުގެ ޔަޤީންކަން ވުޒާރާއިން ވަނީ ކުރިން ދެއްވާފައެވެ.

ފުލުހުންގެ މި އިންޒާރާއެކު، ރައްޔިތުންނަށް އޮޅުވާލުމަށް ފެތުރޭ މިފަދަ ދޮގު މަޢުލޫމާތުތަކާމެދު ސަމާލުވުމަށް އާންމުންނަށް ގޮވާލެވިފައިވެއެވެ. އަދި ރަސްމީ މަޢުލޫމާތު ހޯދުމަށް ކަމާބެހޭ ރަސްމީ އިދާރާތަކާ ގުޅުމަށް ވެސް ބާރުއަޅާފައިވެއެވެ.

🚨ސްކޭމް އެލަރޓް:
ހައުސިންގ މިނިސްޓްރީގެ ލިޔެކިއުންތަކެއް އެނދުމާ ގުޅިގެން ގެދޮރުވެރިޔާ ފްލެޓްތަކަށް އަލުން ފޯމު ލުމުގެ ފުރުސަތު ހުޅުވާލައިފިކަމަށް ބުނެ ލިންކަކާއެކު ދައުރުވަމުންދާ މެސެޖަކީ ސައްހަ މެސެޖެއް ނޫން.
⚠️ސަމާލުވެލައްވާ ! pic.twitter.com/2oYze8GtJN

— Maldives Police (@PoliceMv) December 22, 2024