Ads by Exprox

ޚަބަރު

ޓްރާންސްޕޯޓް ސެކްޓަރުގެ ޑޭޓާ މެނޭޖްމަންޓް ސިސްޓަމް ހަރުދަނާކުރުމަށް އެއްބަސްވުމެއްގައި ސޮއިކޮށްފި

ޓްރާންސްޕޯޓް ސެކްޓަރުގެ ޑޭޓާ މެނޭޖްމަންޓް ސިސްޓަމް ހަރުދަނާކުރުމަށް އެއްބަސްވުމެއްގައި ސޮއިކޮށްފި

ތިމާވެއްޓާއި ބެހޭ ވުޒާރާއާ ރިޓާރިވަރކްސް އާއެކު ވެވުނު އެއްބަސްވުން

ޙަސްނާ އަޙްމަދް

ޙަސްނާ އަޙްމަދް

22 ޑިސެމްބަރު 2024، 08:23

22 ޑިސެމްބަރު 2024، 08:23

ޓްރާންސްޕޯޓް ސެކްޓަރުގެ ޑޭޓާ މެނޭޖްމަންޓް ސިސްޓަމް ހަރުދަނާކުރުމަށް ރިޓާރިވަރކްސް އާއެކު އެއްބަސްވުމުގައި ސޮއިކޮށްފިއެވެ.

މިއެއްބަސްވުމުގައި ސޮއިކޮށްފައިވަނީ މޫސުމީ ބަދަލުތަކާއި ތިމާވެއްޓާ ހަކަތައާ ބެހޭ ވުޒާރާއާއި ރިތަރިވަރކްސް ޕްރައިވެޓް ލިމިޓެޑާއެކުއެވެ. މިއެއްބަސްވުމަކީ “ޓްރާންސްޕޯޓް ސެކްޓަރުގެ ޑޭޓާ މެނޭޖްމަންޓް ސިސްޓަމް ހަރުދަނާކުރުމަށް ކޮންސަލްޓަންސީ ޚިދުމަތް" ފޯރުކޮށްދިނުމަށް ވެވުނު އެއްބަސްވުމެކެވެ. 

މި އެއްބަސްވުމުގައި ސޮއިކުރުމުގެ ރަސްމިއްޔާތު ބޭއްވުނީ މޫސުމީ ބަދަލުތަކާއި ތިމާވެއްޓާއި ބެހޭ ވުޒާރާގައެވެ. ވުޒާރާގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ އަޖުވަދު މުޞްޠަފާ އެވެ. އަދި ރިތަރިވަރކްސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަޙްމަދު ޝަރީފެވެ.

މި މަސައްކަތަކީ 2024 އޯގަސްޓް 12 ވަނަ ދުވަހު އެމްސީސީއީއީ އާއި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން (އެމްއޯޓީސީއޭ) އާ ދެމެދު ސޮއިކުރެވުނު އެމްއޯޔޫގެ ދަށުން "ކެޕޭސިޓީ ބިލްޑިންގ ފޮރ އިމްޕްރޫވްޑް ޓްރާންސްޕޭރަންސީ އޮފް ކްލައިމެޓް ޗޭންޖް މިޓިގޭޝަން އެންޑް އެޑަޕްޓޭޝަން އެކްޝަންސް އިން ދަ މޯލްޑިވްސް" (ސީބިޓް މޯލްޑިވްސް) ޕްރޮޖެކްޓްގެ ދަށުން ކުރެވޭ މަސައްކަތެއް ކަމަށް ތިމާވެއްޓާ ބެހޭ ވުޒާރާއިން ބުނެފައިވެއެވެ.

 މި ޕްރޮޖެކްޓަކީ ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) ގެ ފަންޑިންގ އާއެކު މިނިސްޓްރީން ހިންގާ، އަދި ޔުނައިޓެޑް ނޭޝަންސް އެންވަޔަރަންމަންޓް ޕްރޮގްރާމް (ޔޫއެން އެންވަޔަރަންމަންޓް) ގެ އެހީތެރިކަމާއެކު ތަންފީޒުކުރެވޭ ޕްރޮޖެކްޓެއް ކަމަށްވެސް އެވުޒާރައިން ބުނެއެވެ. 

މި ކޮންސަލްޓަންސީގެ މަޤްޞަދަކީ ގްރީންހައުސް ގޭސް (ޖީއެޗްޖީ) އިންވެންޓްރީ އެކުލަވާލުމަށް ބޭނުންވާ ޓްރާންސްޕޯޓާ ގުޅޭ މަޢުލޫމާތު ހޯދުމަށް ރައްކާތެރި އަދި ހަރުދަނާ ނިޒާމެއް ޤާއިމުކުރުން ކަމަށް ތިމާވެއްޓާއި ބެހޭ ވުޒާރާއިން ބުނެފައިވެއެވެ.

 މި މަސައްކަތުގެ މުހިންމު އެއް ނަތީޖާއަކީ އެމްއޯޓީސީއޭގެ އައު ސީއެމްއެސް އަސާސްކޮށްފައިވާ ވެބްސައިޓަކާ އެކުލެވިގެންވާ ރައްކާތެރި ޑޭޓާ ހިއްސާކުރުމުގެ އިންޓަރފޭސްއެއް ތައްޔާރުކުރުމެވެ. މީގެ އިތުރުން، އޮޑޮމީޓަރ ޑޭޓާ އެއްކުރުމަށް ރޯޑްވާދިނަސް ސިސްޓަމެއް ތަޢާރަފުކުރެވި، އޭގެ ސަބަބުން ޖީއެޗްޖީ އިންވެންޓްރީތަކުގެ ޞައްޙަކަމާއި އިތުބާރު އިތުރުވެގެންދާނެ ކަަމަށްވެސް އެވުޒާރައިން ބުނެއެވެ. 

ސީބިޓް މޯލްޑިވްސް ޕްރޮޖެކްޓުގެ މަޤްޞަދަކީ ޕެރިސް އެއްބަސްވުމުގެ އެންހޭންސްޑް ޓްރާންސްޕޭރަންސީ ފްރޭމްވަރކް (އީޓީއެފް) އާ އެއްގޮތަށް ރާއްޖޭގެ ހާމަކަން ބޮޑުކުރުމުގެ މަސައްކަތްތައް ހަރުދަނާކުރުމެވެ.

 މި ގޮތުން، ދިގު މުއްދަތަކަށް ދެމިގެންދާނެ އިދާރީ އިންތިޒާމުތައް ވަރުގަދަކޮށް، ޑޭޓާ އެއްކުރުމާއި ޕްރޮސެސްކުރުން ނިޒާމުގެ ތެރެއަށް ވައްދައި، އިންޑިކޭޓަރުތަކާއި މެތަޑޮލޮޖީތައް ތަރައްޤީކުރުމަށް މަސައްކަތްކުރެވޭނެއެވެ.

މީގެ އިތުރުން، މި ޕްރޮޖެކްޓުގެ ދަށުން ޖީއެޗްޖީ އިންވެންޓްރީތަކާއި، މޫސުމަށް އަންނަ ބަދަލުތަކުގެ އަސަރު ކުޑަކުރުމާއި އެ ބަދަލުތަކަށް ހޭނުމުގެ ފިޔަވަޅުތައް ދެނެގަތުމާއި، މޫސުމަށް އަންނަ ބަދަލުތަކާ ގުޅޭ މާލީ ކަންކަމާ ބެހޭ ޑޭޓާގެ ފެންވަރު ރަނގަޅުކޮށް، އެ ޑޭޓާ މެނޭޖްކުރުމުގެ އުސޫލުތައް ހަރުދަނާކުރެވޭނެއެވެ. މި މަސައްކަތްތަކުގެ ސަބަބުން ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ޔޫއެންއެފްސީސީސީ) އަށް ގަވާއިދުން އަދި ހާމަކަން ބޮޑު ގޮތެއްގައި ރިޕޯޓުކުރެވޭނެ ކަމަށްވެސް އެވުޒާރާއިން ހާމަކޮށްފައިވެއެވެ. 

މި މަސައްކަތްތަކުން ޤައުމީ ފެންވަރުގައި ނިންމަންޖެހޭ ނިންމުންތައް ނިންމުމަށް މަގުފަހިވެ، މޫސުމަށް އަންނަ ބަދަލުތަކާ ގުޅިގެން ދިމާވާ ގޮންޖެހުންތައް އެދެވޭ ގޮތެއްގައި މެނޭޖްކުރުމަށް މަގުފަހިވެގެންދާނެއެވެ.

 

 

 

 

 

 

 

މި ލިޔުން ކިޔާލުމުން

Ads by MSS