އެފްއޭއެމް ޚިޔާނާތުގެ މައްސަލަ: މައްސަލާގައި އިތުރު ދައުވާތަކެއް ބައްސާމަށް އުފުލައިފި

ފުޓްބޯޅަ އެސޯސިއޭޝަން އޮފް މޯލްޑިވްސްގެ ކުރީގެ ރައީސް ބައްސާމް ޢަދީލް ޖަލީލަށް އެއެސޯސިއޭޝަންގެ ފައިސާއަށް ޚިޔާނާތްތެރިވި މައްސަލައާ ގުޅޭ އިތުރު ދައުވާތަކެއް އޭނާގެ މައްޗަށް މިއަދު އުފުލައިފިއެވެ.

ފީފާއިން އެފްއޭއެމްއަށް ފޮނުވި ފައިސާ އަށް ބައްސާމް ޚިޔާނަތްތެރިވި މައްސަލައާއި ގުޅިގެން ޕްރޮސިކިޔުޓާ ޖެނެރަލް އޮފީހުން ބުނެފައިވަނީ ބައްސާމުގެ މައްޗަށް އަމިން ކޮންސްޓްރަކްޝަންގެ އަމީން އެވެނިއު އިން އެޕާޓްމަންޓެއް ގަތުމަށް ފައިސާ ޖަމާކުރުމަށްޓަކައި އެފްއޭއެމްގެ 1.2 މިލިއަން ޑޮލަރަށް ޚިޔާނަތްތެރިވެފައިވާތީ ޚިޔާނަތްތެރިވުމުގެ ދައުވާ އުފުލާފައިވާ ކަމަށެވެ. 

އަދި އެ ދައުވާ ސާބިތުވެއްޖެނަމަ އެކަމުގެ އަދަބަކީ އެއް އަހަރާއި ހަތް މަހާއި ހަ ދުވަހުގެ މުއްދަތަކަށް ޖަލަށްލުމެވެ.

 ބައްސާމްގެ މައްޗަށް އުފުލާފައިވާ ދެވަނަ ދައުވާއަކީ މަނީ ލޯންޑްރިންގ ކުށުގެ ދައުވާއެވެ. މިދައުވާ އޭނާއަށް ކޮށްފައިވަނީ އަމީން އެވެނިއުގެ ބްލޮކް A ގެ 12 އަދި 13 ވަނަ ފަންގިފިލާގެ 8 ކޮޓަރިއާއި 10 ފާހަނައިގެ ނަންބަރު A1205 އާއި A1206 އެޕަރޓްމަންޓް ގަތުމަށް އެއްބަސްވުމެއްގައި ސޮއިކޮށް، އެ އެއްބަސްވުމުގެ ދަށުން، އަމީން ކޮންސްޓްރަކްޝަން ޕވޓ ލޓޑއަށް ޖީ.އެސް.ޓީ ހިމެނޭ ގޮތަށް ދައްކަންޖެހޭ ޖުމްލަ -/25,000,000 ރުފިޔާގެ ގެ ތެރެއިން ބުކިންގ ފީ އާއި ކޮމިޓްމަންޓް ފީ ހިމެނޭ ގޮތަށް އެތަނުގެ އަގަށްވާ ފައިސާގެ ގޮތުގައި އެފް.އޭ.އެމް.ގެ ޑޮލަރު އެކައުންޓުން އެކި އެކި ކުންފުނިތަކަށް ފައިސާ ފޮނުވައި، އެ ފައިސާ އަމީން ކޮންސްޓްރަކްޝަން ޕވޓ ލޓޑއަށް ދައްކާފައިވާތީއެވެ.

މިދައުވާ އޭނާގެ މައްޗަށް ސާބިތުވެއްޖެނަމަ 100,000 ރުފިޔާއާއި 1,000,000 ރުފިޔާއާއި ދެމެދުގެ އަދަދަކުން ޖޫރިމަނާ ކުރުމާއެކު 5 އަހަރާއި 15 އަހަރާއި ދެމެދުގެ މުއްދަތަކަށް ޖަލަށް ލުމަށް ޙުކުމް ކުރެވޭނެއެވެ. 

ޕީޖީ އޮފީހުން އިތުރަށް ބުނެފައިވަނީ މި ކަންކަމުގައި ބައިވެރިވީ އެފްއޭއެމްގެ މުވައްޒަފުންގެ މައްޗަށް ދަޢުވާކުކުރުމަށްޓަކައި މިހާރު ތައްޔާރުވަމުން ދާކަމަށެވެ. އަދި  މި މައްސަލައަކީ ދިވެހި ފުލުހުންގެ ޚިދުމަތުން ތަޙުޤީޤުކުރަމުންދާ މައްސަލައެއް ކަމަށްވާތީ  ތަޙުޤީޤަށް ކުރިއެރުން ލިބޭ ވަރަކުން، ހެއްކާއި ޤަރީނާ ވަޒަންކޮށް، މައްސަލާގައި އިތުރު ދަޢުވާތައް ކޯޓަށް ހުށަހަޅަމުން ގެންދާނެ ކަަމަށްވެސް އެއޮފީހުން ބުނެފައިވެއެވެ. 

 މި ޚިޔާނާތުގެ ސަބަބުން އެފް.އޭ.އެމްއަށް ލިބުނު ގެއްލުމުގެ ބަދަލުގެ ގޮތުގައި ޖުމްލަ އެއް މިލިއަން ދެލައްކަ އެމެރިކާ ޑޮލަރު ބައްސާމު ގެ އަތުން ނަގައިދިނުމަށް އެދި ޕީޖީ އޮފީހުން ކޯޓުގައި އެދިފައިވެއެވެ. އަދި 

 ލޯންޑާ ކޮށްފައިވާ ފައިސާ ބޭނުންކޮށްގެން ބައްސާމު ހޯދައި ލިބިގަނެ ބޭނުންކުރަމުން ގެންދިޔަ އަމީން ކޮންސްޓްރަކްޝަން ޕވޓ ލޓޑގެ އަމީން އެވެނިއު އެޕަރޓްމަންޓް A1205 އަދި A1206 ދައުލަތަށް ނަގައިދިނުމަށްވެސް ކޯޓުގައި ޕީޖީ އޮފީހުން މީގެކުރިން އެދިފައިވެއެވެ. 

އޮކްޓޯބަރު މަހުގެ ތެރޭގައި އެ ދެ އެޕާޓްމެންޓް ފުލުހުންނާއި ހަވާލުކުރުމަށް ބައްސާމުގެ މައްޗަށް ކޯޓުން އަމުރުކޮށް އެދެތަން ދައުލަތަށް މިހާރު ވަނީ ނަގައިފައެވެ.