ސެވިއްޔާ ބަލިކޮށް މެޑްރިޑުން ލީގުގެ ދެވަނައަށް ޖެހިލައިފި

ސްޕެނިޝް ލަލީގާގައި ރެއާލް މެޑްރިޑުން ސެވިއްޔާ 4-2 އިން ބަލިކޮށް، ބާސެލޯނާ އިތުރަށް ފަހަތަށް ޖައްސާލައި ލީގުގެ ދެވަނައަށް ކުރިޔަށް ޖެހިލައިފިއެވެ.

ފުރަތަމަ ހާފުގައި ކީލިއަން އެމްބައްޕޭ، ވަލްވާރޑޭ އަދި ރޮޑްރީގޯ ކާމިޔާބުކުރި ގޯލުތަކުން މުޅި މެޗުގެ ކޮންޓްރޯލް މެޑްރިޑުން ނެގިއިރު، ދެވަނަ ހާފުގައި ބްރާހިމް ދިއާޒް ކާމިޔާބުކުރި ރީތި ގޯލާއެކު އެ ޓީމުން ވަނީ މެޗުން ތިން ޕޮއިންޓު ޔަގީންކޮށްފައެވެ. 

މި މެޗަކީ އުމުރުން 39 އަހަރުގެ ޖީސުސް ނަވާޒް އޭނާގެ ކެރިއަރުގައި ކުޅުނު އެންމެ ފަހު ޕްރޮފެޝަނަލް މެޗު ވެސް މެއެވެ. އޭނާގެ ރިޓަޔާމެންޓް ސީޒަންގެ މެދުތެރެއާ ދިމާވީ، ލިބުނު އަނިޔާއަކާ ގުޅިގެނެވެ. އޭނާ ފަހު ހާފުގައި ކުޅެން އެރުމުން، މުޅި ސްޓޭޑިއަމުން ވަނީ އޭނާއަށް ހޫނު މަރުހަބާއެއް ކިޔާފައެވެ.

ނަވާޒްއަކީ ވޯލްޑް ކަޕާއި، ޔޫރަޕިއަން ޗެމްޕިއަންޝިޕާއި، ޔޫއެފާ ނޭޝަންސް ލީގު ކާމިޔާބުކޮށްފައިވާ ހަމައެކަނި ކުޅުންތެރިޔާއެވެ. އަދި އާދީއްތަ ދުވަހަށް އޭނާ މެޑްރިޑުގެ ދަނޑުގައި އަލަށް ކުޅުނުތާ 20 އަހަރު ފުރިފައިވާއިރު، މި މުއްދަތުގައި އޭނާވަނީ ސެވިއްޔާއަށް 705 މެޗު ކުޅެދީފައެވެ.

އެސްޓޭޑިއޯ ސެންތިއާގޯ ބާރނަބެއުގައި ކުޅުނު މިޗުގައި މެޑްރިޑުން ލީޑު ނެގީ މެޗުގެ 10 ވަނަ މިނެޓުގައެވެ. ގޯލާއި 25 ޔާޑު ދުރުން، ސެވިއްޔާގެ ގޯލްކީޕަރުގެ ބޯމަތިން ބޯޅަ ފޮނުވާލުމަށްފަހު މެޑްރިޑަށް ލީޑު ނަގައިދިނީ އެމްބައްޕޭއެވެ.

އޭގެ ދިހަ މިނެޓު ފަހުން މެޑްރިޑުން ވަނީ އެމީހުންގެ ލީޑު ފުޅާކޮށްފައެވެ. އެ ޓީމަށް ލިބުނު ކޯނަރަކުން ފަހިވި ފުރުސަތެއްގައި، ޕެނަލްޓީ އޭރިއާގެ ބޭރުން މި ގޯލު ކާމިޔާބުކުރީ ވަލްވާރޑޭއެވެ. ވަލްވާރޑޭ މި ސީޒަނުގައި ކާމިޔާބުކޮށްފައިވާ ހުރިހާ ގޯލަކީ ވެސް ޕެނަލްޓީ އޭރިޔާ ބޭރުން އޭނާ ކާމިޔާބު ކޮށްފައިވާ ގޯލުތަކެކެވެ.

އޭގެ ފަހުން މެޑްރިޑުން މެޗުގެ މުޅި ކޮންޓްރޯލް ނެގީ 34 ވަނަ މިނެޓުގައި ލޫކަސް ވަޒްކޭޒް ގޯލު ކުރިމައްޗަށް ކަނޑާލި ބޯޅައެއް، ރޮޑްރީގޯ ގޯލަށް ފޮނުވާލުމުންނެވެ. ނަމަވެސް ޖެހިގެން އައި މިނެޓުގައި ޖުއާންލޫ ސަންޗޭޒް މެޑްރިޑުގެ ގޯލު ކުރިމައްޗަށް ހުރަސްކޮށްލި ބޯޅައެއް ގޯލުގެ ތެރެއަށް ވައްދާލުމަށްފަހު، އިސާކް ރޮމޭރޯ ސެވިއްޔާއަށް އުއްމީދު ގެއްލުނަ ނުދީ ހިފަހައްޓާ ދިނެވެ.

ދެވަނަ ހާފުގެ 8 ވަނަ މިނެޓުގައި މެޑްރިޑުން އެމީހުންގެ 4 ވަނަ ގޯލު ކާމިޔާބުކުރިއެވެ. ސެވިއްޔާގެ ޑިފެންސް ލައިނުގެ ތެރެއިން އެމްބައެއްޕޭ ދުއްވާލި ތުރޫ ބޯޅައަކުން މި ގޯލު ކާމިޔާބުކުރީ ބްރާހިމް ދިއާޒްއެވެ.

މެޗު ނިމުމުގެ ކުރިން ސެވިއްޔާއިން އިތުރު ގޯލެއް ކާމިޔާބު ކުރިއެވެ. މެޗުގެ 85 ވަނަ މިނެޓުގައި މި ގޯލު ކާމިޔާބުކޮށްދިނީ ޑޮޑޯ ލުކެބާކިއޯއެވެ. 

އަދި ސެވިއްޔާއާ ދެކޮޅަށް އަމިއްލަ ދަނޑުގައި ކުޅުނު 20 މެޗުގެ ތެރެއިން 19 ވަނަ މެޗު ކާމިޔާބު ކުރުމަށްފަހު މެޑްރިޑުން މިވަނީ ބާސެލޯނާ ފަހަތަށް ޖައްސާލައި ލީގުގެ ދެވެނައަށް ކުރިޔަށް ޖެހިލާފައެވެ. އެގޮތުން، ބާސެލޯނާއަށް ވުރެން އެއް މެޗު މަދުން ކުޅެ ދެ ޕޮއިންޓުގެ ލީޑެއް ލިބިފައިވާއިރު، ލީގުގެ އެއްވަނައިގައި އޮތް އެތުލެޓިކޯ މެޑްރިޑާ އޮތީ އެއް ޕޮއިންޓުގެ ފަރަގެކެވެ.