ކުޅިވަރު

މުޅިން އަލަށް ލީގު ތައްޓަށް ވާދަކުރަމުން އަންނަ އެޓަލާންޓާއިން އެމްޕޮލީ ބަލިކޮށް ލީގުގެ އެއްވަނައަށް

މުޅިން އަލަށް ލީގު ތައްޓަށް ވާދަކުރަމުން އަންނަ އެޓަލާންޓާއިން އެމްޕޮލީ ބަލިކޮށް ލީގުގެ އެއްވަނައަށް

އެޓަލާންޓާގެ ކެޓަލާރާ ވަނީ މި މެޗުގައި ދެ ގޯލު ކާމިޔާބުކޮށްފައި---

މިފްތާޙް މުޙައްމަދު

މިފްތާޙް މުޙައްމަދު

23 ޑިސެމްބަރު 2024، 09:51

23 ޑިސެމްބަރު 2024، 09:51

ހުލާސާ

އެޓަލާންޓާގެ ތާރީހުގައި އަދި މިހާތަނަށް ލީގު ކާމިޔާބުކޮށްފައި ނުވާއިރު، އެ ޓީމަށް ހަމައެކަނި ލިބިފައިވަނީ 1963 ވަނަ އަހަރު ހޯދި ކޮޕާ އިޓާލިއާ އާއި މި އަހަރު ކާމިޔާބުކުރި ޔޫރޮޕާ ލީގު.

އިޓާލިއަން ސީރިއާގައި މުޅިން އަލަށް ލީގު ތައްޓާއި ވާދަކުރަމުން އަންނަ އެޓަލާންޓާ އިން އެމްޕޮލީ 3-2 އިން ބަލިކޮށް، ލީގުގެ އެއްވަނައަށް ކުރިއަށް ޖެހިލައިފިއެވެ. 

އެޓަލާންޓާގެ ގެވިސް ސްޓޭޑިއަމްގައި ކުޅުނު މި މެޗުގައި ފުރަތަމަ ލީޑު ނެގީ، ލީގުގެ އެގާރަ ވަނައިގައި އޮތް އެމްޕޮލީއިންނެވެ. މެޗުގެ 13 ވަނަ މިނެޓުގައި ސްކޮޓް ލިއާމް ހެންޑަސަން ހުރަސްކޮށްދިން ބޯޅަ ގޯލަށް ފޮނުވާލުމަށްފަހު އެ ޓީމަށް ލީޑު ނަގައިދިނީ ލޮރެންޒޯ ކޮލޮމްބޯއެވެ. 

އެޓަލާންޓާއިން މެޗުގެ ނަތީޖާ ހަމަހަމަ ކުރީ 34 ވަނަ މިނެޓުގައި، ޒަޕަކޯސްޓާ ވާތް ފަރާތުން ހުރަސްކޮށްދިން ބޯޅައެއް، ޗާލްސް ޑި ކެޓަލާރާ ފުއްމާލުމަށްފަހު ބޮލުން ކާމިޔާބުކުރި ގޯލަކުންނެވެ. 

އަދި އެޓަލާންޓާ އިން ވަނީ ހާފު ނިމުމުގެ ކުރިން ލީޑު ނަގާފައެވެ. އެ ޓީމަށް ލީޑު ނަގައިދިނީ ފުރަތަމަ ހާފުގެ އިތުރު ވަގުތުގައި އަޑެމޯލާ ލުކްމަންއެވެ. މިއީ ވެސް އެ ޓީމުގެ ވާތް ފަރާތުން އުފެއްދި ހަމަލާއެކެވެ. ވާތް ފަރާތުން ގޯލުގެ ކުރިމައްޗަށް ބޯޅަ ހުރަސްކޮށްލުމުން، ގޯލު އޭރިޔާ ކައިރީގައި ހުރީ ޒަނިއޯލޯ ބޮލުން ޖައްސާލީ ލުކްމާންއަށެވެ. އޭނާ އެ ބޯޅަ މެއިން ކޮންޓްރޯލް ކޮށްލުމަށްފަހު ވަނީ ދުރުކަނަށް ފޮނުވާލައި އެޓަލާންޓާއަށް ލީޑު ނަގައިދީފައެވެ.

ނަމަވެސް އެމްޕޮލީއިން ދެވަނަ ހާފުގައި މެޗުގެ ނަތީޖާ ހަމަހަމަ ކުރިއެވެ. އެ ޓީމަށް ލިބުނު ޕެނަލްޓީއަކުން މި ގޯލު ކާމިޔާބުކުރީ ސެބަސްޓިއާނޯ އެސްޕޮސީޓޯއެވެ. 

ލީގު ތައްޓަށް ވާދަކުރަމުން އަންނަ އެޓަލާންޓާއިން މިގޮތަށް ފަރުޖައްސާކަށް ބޭނުމެއް ނުވިއެވެ. އެގޮތުން މެޗު ނިމެން ހަތަރު މިނެޓަށް ވެފައި ވަނިކޮށް ކެޓަލާރާ އިތުރު ގޯލެއް ކާމިޔާބުކޮށް، މެޗުން ތިން ޕޮއިންޓު ޔަގީންކުރިއެވެ. އޭނާ ވަނީ ހަފްތާގެ މެދުތެރޭގައި ކުޅުނު ކޮޕާ އިޓާލިއާ މެޗުގައި ވެސް ދެ ގޯލު ކާމިޔާބުކޮށްފައެވެ.

މި ނަތީޖާއާއެކު، ލީގުގައި ޖެހިޖެހިގެން މިހާރު 11 މެޗު ކާމިޔާބުކޮށްފައިވާ އެޓަލާންޓާއިން ވަނީ ދެވަނައިގައި އޮތް ނަޕޯލީއަށް ވުރެން އިތުރަށް ދެ ޕޮއިންޓު ހޯދާފައެވެ. 

އެޓަލާންޓާގެ ތާރީހުގައި އަދި މިހާތަނަށް ލީގު ކާމިޔާބުކޮށްފައި ނުވާއިރު، އެ ޓީމަށް ހަމައެކަނި ލިބިފައިވަނީ 1963 ވަނަ އަހަރު ހޯދި ކޮޕާ އިޓާލިއާ އާއި މި އަހަރު ކާމިޔާބުކުރި ޔޫރޮޕާ ލީގެވެ. 

މި ލިޔުން ކިޔާލުމުން

Ads by MSS