ކުޅިވަރު
ރާއްޖޭގެ އަންހެން ގައުމީ ފުޓުބޯޅަ ޓީމުން އެކުވެރިކަމުގެ ދެ މެޗެއް ކުޅުމަށް ތަމްރީނު ފަށައިފި

އަންހެން ގައުމީ ޓީމުގެ މަރިޔަމް މިރުފަތު

ފަރުދުން
23 ޑިސެމްބަރު 2024، 09:50
23 ޑިސެމްބަރު 2024، 09:50
ހުލާސާ
ރާއްޖޭގެ ގައުމީ ޓީމުން އެންމެ ފަހުން މެޗެއް ކުޅެފައިވަނީ މި އަހަރު އޮތް އަންހެނުންގެ ސާފް ޗެމްޕިއަންޝިޕް މުބާރާތުގައި.
ރާއްޖޭގެ އަންހެން ގައުމީ ޓީމުން އެކުވެރިކަމުގެ ފުޓުބޯޅަ ދެ މެޗު ކުޅުމަށް ތަމްރީނުތައް ފަށައިފިއެވެ.
އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް) އިން އިއުލާނުކޮށްފައިވާ ގޮތުގައި މި ދެ މެޗު ކުޅުމަށް ހަމަޖެހިފައިވަނީ އިންޑިއާގެ ބެންގަލޫރުގައެވެ.
މި ދެ މެޗުގެ ތެރއިން ފުރަތަމަ މެޗު މި އަހަރުގެ ފަހު ހަފްތާގައި ކުޅޭ އިރު، ދެވަނަ މެޗު ކުޅޭނީ އަންނަ އަހަރުގެ ފުރަތަމަ ހަފްތާގައެވެ. އެގޮތުން މި ދެ މެޗު ކުޅުމަށް ތާވަލުކޮށްފައިވަނީ 28 ޑިސެމްބަރު 2024 އާއި 2 ޖެނުއަރީ 2025 ވާ ދެ ދުވަހެވެ.
ރާއްޖޭގެ ގައުމީ ޓީމުން އެންމެ ފަހުން މެޗެއް ކުޅެފައިވަނީ މި އަހަރު އޮތް އަންހެނުންގެ ސާފް ޗެމްޕިއަންޝިޕް މުބާރާތުގައެވެ.
އަންހެން ފުޓުބޯޅައިގައި ރާއްޖެ ރޭންކް ކޮށްފައިވަނީ ދުނިޔޭގެ 163 ވަނައިގައެވެ. އަދި އިންޑިއާއަކީ ރާއްޖެއަށް ވުރެން މާ ކުރީގައި، ދުނިޔޭގެ 69 ވަނައިގައި ރޭންކު ކޮށްފައި އޮތް ގައުމެކެވެ.
ރާއްޖޭގެ ގައުމީ ޓީމުން ތަމްރީނުތައް ފަށާފައިވަނީ ޓީމުގެ ކޯޗު، މުހައްމަދު ނިޒާމް (ނިޒާމްބެ)ގެ އިރުޝާދުގެ ދަށުންނެވެ.
މިހާތަނަށް ރާއްޖޭގެ އަންހެން ގައުމީ ފުޓުބޯޅަ ޓީމުން އިންޑީއާއާ ހަ ފަހަރެއްގެ މަތިން ބައްދަލު ކޮށްފައިވެއެވެ. އޭގެ ތެރެއިން ފަސް މެޗު ކާމިޔާބުކުރީ އިންޑިއާއެވެ. އަދި ރާއްޖެ އެއްވެސް މެޗަކުން މޮޅުވެފައި ނުވާއިރު، 2016 ވަނަ އަހަރުގެ ސައުތު އޭޝިއަން ގޭމްސްގައި މި ދެ ޓީމު ބައްދަލުކުރި މެޗު ވަނީ 0-0 އިން އެއްވަރުވެފައެވެ.
އިންޑިއާގެ ގައުމީ ޓީމުން އެންމެ ބޮޑު ތަފާތަކުން ރާއްޖެ ބަލިކޮށްފައިވަނީ 2014 ވަނަ އަހަރުގެ އޭޝިއަން ގޭމްސްގައެވެ. އެ މެޗުގައި އެ ޓީމުން ރާއްޖެ ކޮޅަށް 15 ގޯލު ޖެހިއިރު، ރާއްޖެ ޓީމަށް އެއްވެސް ގޯލެއް ކާމިޔާބު ކުރެވިފައެއް ނުވެއެވެ.