ރާއްޖޭގައި މީހުން ދިރިއުޅޭ ހުރިހާ ރަށަކުން ކުނި ބޭރުކުރުމުގެ މަޝްރޫޢު  ވެމްކޯއިން ފަށަނީ

ރާއްޖޭގެ މީހުން ދިރިއުޅޭ ހުރިހާ ރަށަކުން ކުނި ބޭރުކުރުމުގެ ބޮޑު މަޝްރޫޢެއް އަންނަ މަހު ފެށުމަށް، ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ތައްޔާރުވެއްޖެއެވެ. މި މަޝްރޫޢަކީ ގިނަ ރަށްރަށުގައި ކުނި މެނޭޖުކުރެވޭނެ ރަނގަޅު ނިޒާމެއް ނެތުމާއެކު، ކުނި ބޭރުކުރުން މާލީ ގޮތުން ބޮޑު ބުރައަކަށް ވެފައިވާތީ ފަށާ މަޝްރޫޢެކެވެ.

ވެމްކޯގެ ބިޒްނަސް ޑިވެލޮޕްމަންޓް އެންޑް މާކެޓިންގެ މެނޭޖަރ ޢަބްދުﷲ ސިނާން  ވިދާޅުވި ގޮތުގައި، މީގެ ކުރިން ރަށްރަށުން ކުނި ބޭރުކުރުމަކީ އެއްވެސް ވަރެއްގެ ދިރާސާއެއް ކުރެވި، ރަނގަޅަށް ބެލިގެން ކުރަމުން އައި ކަމެއް ނޫނެވެ. އެހެންކަމުން، އެއީ މާލީ ގެއްލުމާއެކު ދެމެހެއްޓެނިވި ގޮތެއްގައި ކުރެވޭނެ ކަމެއް ނޫނެވެ.

އަޅުގަނޑުމެން މިހާރުވާނީ ފީސިބިލިޓީ ސްޓަޑީއެއް ހަދާފައި. މިއާއެކު އަންނަ ޖެނުއަރީ މަހުން ފެށިގެން މިޚިދުމަތް ދޭނީ ވެމްކޯއަށްވެސް މާލީ ގެއްލުން ނުވާނެހެން، ކައުންސިލްތަކަށްވެސް މާބުރަ ބޮޑު ނުވާނެހެން

ސިނާން ވިދާޅުވިއެވެ.

ވެމްކޯއިން ފާހަގަކުރައްވާ ގޮތުގައި، ކޯވިޑްގެ ކުރިން 11 ރަށަކުން އަދި ކޯވިޑަށްފަހު 19 ރަށަކުން އެތައް ހާސްޓަނެއްގެ ކުނި ބޭރުކޮށްފައިވެއެވެ. އަދި މިވަގުތު ކުނި މެނޭޖުކުރެވޭނެ ނިޒާމު ހުރީ ހަމައެކަނި ތިލަފުށީގައި ކަމަށްވުމާއެކު، އުތުރާއި ދެކުނުގެ ރަށްރަށުން ކުނި ތިލަފުއްޓަށް އުފުލުމަށް ބޮޑު ޚަރަދެއް ހިނގާކަން ވެމްކޯއިން ފާހަގަކުރައްވައެވެ.

ރައްކާތެރި ގޮތުގައި ކުނި މެނޭޖުކުރުމަށް ވެމްކޯއިން އަންނަނީ އެ ކުންފުނީގެ ޚިދުމަތް ފުޅާކުރަމުންނެވެ. މާލެއާއި އެހެނިހެން ސިޓީތަކުގެ އިތުރުން، މާލެ އަތޮޅު މާފުއްޓާއި ހިންމަފުށީގައި ކުނި އުކާލުމުގެ ޚިދުމަތް ވެމްކޯއިން ވަނީ ފަށާފައެވެ. އަދި މިހާރު އެ ޚިދުމަތް މާލެ އަތޮޅު ގުރައިދޫގައި ފެށުމަށްވެސް ވެމްކޯއިން އަންނަނީ ތައްޔާރުވަމުންނެވެ.

މި މަޝްރޫޢުގެ ސަބަބުން، ރާއްޖޭގެ ހުރިހާ ރަށެއްގައިވެސް ދެމެހެއްޓެނިވި ގޮތެއްގައި ކުނި މެނޭޖުކުރެވޭނެ ނިޒާމެއް ޤާއިމުކުރެވި، ކައުންސިލްތަކަށް ދިމާވެފައިވާ މާލީ ދަތިކަން ޙައްލުވެގެންދާނެ ކަމަށް އުންމީދުކުރެވެއެވެ.