ޚަބަރު
ފެނަކަ ކޯޕަރޭޝަނުގެ އެމްޑީ މުޢާޒު އިސްތިއުފާ ދެއްވައިފި
މުޢާޒް މުޙައްމަދު ރަޝީދު ފޮޓޯ:އެޑިޝަން
ފެނަކަ ކޯޕަރޭޝަނުގެ މެނޭޖިންގ ޑިރެކްޓަރު މުޢާޒް މުޙައްމަދު ރަޝީދު އިއްޔެ އިސްތިއުފާ ދެއްވައިފިއެވެ. މުޢާޒް އިސްތިއުފާ ދެއްވިކަން އަންގަވާފައިވަނީ އޭނާގެ އަމިއްލަ ސޯޝަލް މީޑިއާ އެކައުންޓުގައި ޕޯސްޓެއް ކުރައްވައިގެންނެވެ.
މުޢާޒް އިސްތިއުފާ ދެއްވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ފޮނުއްވި ސިޓީގައި ވިދާޅުވެފައިވަނީ، މެނޭޖިންގ ޑިރެކްޓަރުގެ މަޤާމަށް އައްޔަންކުރެއްވި ދުވަހުން ފެށިގެން އެއް އަހަރު ދުވަހުގެ ތެރޭގައި، ތަފާތު ގޮންޖެހުންތަކާ ކުރިމަތިލާންޖެހުނު ނަމަވެސް، ފެނަކައިން ރައްޔިތުންނަށް ފޯރުކޮށްދޭ ޚިދުމަތްތައް މެދުނުކެނޑި ފޯރުކޮށްދިނުމުގައި އެދެވޭ ނަތީޖާއެއް ހާސިލުކުރެވިފައިވާ ކަމަށެވެ.
ފެނަކަ ކޯޕަރޭޝަންގެ މެނޭޖިންގ ޑައިރެކްޓަރގެ މަގާމުން އިސްތިއުފާ ދީފިން. pic.twitter.com/TmadBgkvqw
— Muaz Mohamed Rasheed (@muazmr) December 23, 2024
އެހެންނަމަވެސް، ކުންފުނީގެ މާލީ ހާލަތު ދަށްވުމުގެ ސަބަބުން ކުންފުނި ހިންގުމުގައި ދަތިތަކާ ކުރިމަތިވެފައިވާ ކަމަށް މުޢާޒް ފާހަގަކުރައްވާފައިވެއެވެ. އޭނާ ވިދާޅުވިގޮތުގައި، ކުންފުންޏާ ހަވާލުވިއިރު 4.3 ބިލިއަން ރުފިޔާގެ ދަރަންޏެއް އޮތުމާއެކު، ކުންފުންޏަށް އެކަށީގެންވާވަރަށްވުރެ ގިނައިން ވަޒީފާ ހަމަޖައްސަން ޖެހުމާއި، މުވައްޒަފުންގެ އަދަދު މަދުކުރުމަށް ކަމާ ގުޅުންހުރި އިދާރާތަކުން އެކަށީގެންވާ އެއްބާރުލުން ނުލިބޭކަން ފާހަގަކުރެއްވިއެވެ.
މި ގޮންޖެހުންތަކާއެކުވެސް، ފާއިތުވި އެއް އަހަރު ދުވަހު ކުންފުނީގެ ހިންގުން ހަރުދަނާކޮށް ޚަރަދު ކުޑަކުރުމަށް ގިނަ މަސައްކަތްތަކެއް ކުރެވި، މިއަހަރުގެ އޮކްޓޯބަރު މަހުގެ ނިޔަލަށް 160 މިލިއަން ރުފިޔާއަށްވުރެ ބޮޑު އަދަދެއް ހިންގުމުގެ ޚަރަދުން ސަލާމަތްކުރެވިފައިވާކަން މުޢާޒް ފާހަގަކުރެއްވިއެވެ.
ނަމަވެސް، މުޢާޒް ވިދާޅުވީ ހިންގުމުގެ ޚަރަދު ސަލާމަތްކޮށްގެންވެސް މިހާރު އެ ކުންފުނި ވެއްޓިފައިވާ މާލީ ހާލަތުން ސަލާމަތް ނުކުރެވޭނެ ކަމަށެވެ. އަދި މެނޭޖިންގ ޑިރެކްޓަރުގެ މަޤާމުގައި ހުންނަވައިގެން ކުންފުނީގެ ކަންކަން އިތުރަށް ރަނގަޅު ކުރެވޭނެ އަލިމަގެއް ނުފެންނާތީ އިސްތިއުފާ ދެއްވަން ނިންމެވި ކަމަށް މުޢާޒް ރައީސުލްޖުމްހޫރިއްޔާއަށް ފޮނުއްވި ސިޓީގައި ބަޔާންކުރައްވާފައިވެއެވެ.
