ޚަބަރު
ފެނަކައިން ދައްކަން ޖެހޭ ލޯނުތަކުގެ 23 އިންސައްތަ ދައްކާ ޚަލާސްކޮށްފި
ފެނަކަ ކޯޕަރޭޝަންގެ އޮފީސް. ފޮޓޯ: އެޓޯލް ޓައިމްސް
ފެނަކައިން ދައްކަން ޖެހޭ ލޯނުތަކުގެ 23 އިންސައްތަ ދައްކާ ޚަލާސްކޮށްފި ކަމަށް އެކުންފުނިން ހާމަކޮށްފިއެވެ.
އެކުންފުނިން މިކަން ހާމަކޮށްފައިވަނީ އެކުންފުނީގެ އެއްއަހަރު ދުވަހުގެ މަސައްކަތްތައް ހާމަކޮށް ނެރެފައިވާ ފޮތުގައެވެ.
ފެނަކައިން ހާމަކޮށްފައިވާ ގޮތުގައި 2023ވަނަ އަހަރުގެ ނޮވެމްބަރު މަހުގެ ނިޔަލަށް އެކުންފުނިން ދައްކަންޖެހޭ ލޯނުގެ ޖުމްލަ ޢަދަދު 1300 މިލިއަނަށް އަރައިފައި އޮތް ކަމަށެވެ. އަދި މިއަހަރުގެ މިހާތަނަށް 300 މިލިއަނަށްވުރެ ގިނަ ރުފިޔާ ދައްކައި ޚަލާސްކުރެވިފައިވާ ކަމަށެވެ.
މީގެއިތުރުން މުދަލާއި ޚިދުމަތް ފޯރުކޮށްދީފައިވާ ފަރާތްތަކަށް 2023ވަނަ އަހަރުގެ ނޮވެންބަރު މަހުގެ ނިޔަލަށް 3400 މިލިއަން ރުފިޔާ ނުދައްކާ ހުރި ކަމަށާއި އެއީ 1094 ފަރާތެއްކަމަށް ފެނަކައިން ބުނެފައިވެއެވެ.
2024ވަނަ އަހަރުގެ ނޮވެންބަރު މަހުގެ ނިޔަަލަށް މުދަލާއި ޚިދުމަތް ފޯރުކޮށްދީފައިވާ ފަރާތްތަކަަށް 600 މިލިއަން ރުފިޔާ ދެއްކިފައިވާ ކަމަށާއި އެއީ 281 ފަރާތަކަށް ދައްކަން ޖެހިފައިވާ ފައިސާ ކަމަށްވެސް ފެނަކައިން ބުނެފައިވެއެވެ.
އަދި ދައްކަން ޖެހޭ ލޯނުތަކާއި އަދި ވެންޑަރުންނަށް ދައްކަން ޖެހޭ ފައިސާއާއެކު މުޅި ޖުމްލަ 900 މިލިޔަން ރުފިޔާގެ ދަރަނި އެކުންފުނިން ދައްކާ ޚަލާސްކޮށްފައިވާ ކަމަށް އެކުންފުނިން ބުނެފައިވެއެވެ. މިއާއެކުވެސް ދަރަނީގެ ބޮޑުބައެއް އަދި ނުދެއްކިވާއިރު، ފެނަކައިން ބުނެފައިވަނީ މިއަހަރު ލިބުނު ޖުމްލަ އާމްދަނީ 40 އިންސައްތަ ބޭނުންކޮށްފައިވަނީ ދަރަނިތައް ދެއްކުމަށް ކަމަށެވެ.
މިއަހަރު ކުންފުނީގެ ޚަރަދު ކުޑަކުރުމުގެ ގޮތުން އެކުންފުނިން ކުރި މަސައްކަތުން ހިންގުމުގެ ޚަރަދުން 160 މިލިއަން ރުފިޔާ ވަނީ ސަލާމަތްކޮށްފައެވެ.
މިހާރުގެ ސަރުކާރު ވެރިކަމާއި ހަވާލުވިއިރު ސަރުކާރުގެ ކުންފުނިތަކުގެ ތެރެއިން އެންމެ ބޮޑު ދަރަންޏެއް ވެފައި އޮތް ކުންފުންޏަކީ ފެނަކަކަން ފާހަގަކޮށްލަން ޖެހެއެވެ.
