ޚަބަރު
ރާއްޖޭގައި މަސްވެރިކަމުގެ ދާއިރާގައި ހުރި ފުރުސަތުތައް ޗައިނާގެ އިންވެސްޓަރުންނާއި ޚިއްސާކޮށްފި

މަސްވެރިކަމުގެ ވުޒާރާގެ އިސްބޭފުޅުންނާއި ޗައިނާގެ ވިޔަފާރިވެރިން ބައްދަލުކުރެއްވުން
ރާއްޖޭގައި މަސްވެރިކަމުގެ ދާއިރާގައި އިންވެސްޓް ކުރުމަށް ހުރި ފުރުސަތުތައް ޗައިނާގެ އިންވެސްޓަރުންނާއި މަސްވެރިކަމާ ކަނޑުގެ ވަސީލަތްތަކާ ބެހޭ ވުޒާރާއިން ޚިއްސާކޮށްފިއެވެ.
މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާގައި ބޭއްވި ބައްދަލުވުމެއްގައި ޗައިނާގެ ވިޔަފާރިވެރިންނާ ޚިއްސާކުރެއްވީ މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙުމަދު ޝިޔާމު އަދި އެވުޒާރާގެ އިސްވެރިން ކަމަށް މަސްވެރިކަމާ ބެހޭ ވުޒާރާއިން ބުނެފައިވެއެވެ.
ޗައިނާގެ ވިޔަފާރިވެރިންތަކެއް ރާއްޖޭގައި ހުރި އިންވެސްޓުމަންޓުތަކުގެ ފުރުސަަތުތަކާއި ގުޅޭ މަޢުލޫމާތު ހޯދުމަށް ކުރަމުންދާ ދަތުރުގައި ވަޒީރު ޝިޔާމު ވަނީ ރާއްޖޭގެ މަސްވެރިކަމުގެ ސިނާއަތުގައި، މެރިކަލްޗަރ އަދި ބްލޫ އިކޮނޮމީ ދާއިރާއިން ހުރި ފުރުސަތުތަކުގެ މަޢުލޫމާތު ހިއްްސާކޮށްފައިކަމަށް އެވުޒާރައިން ބުނެއެވެ.
ވަޒީރު ވަނީ ސަރުކާރުން މިދާއިރާ ކުރިއެރުވުމަށްކުރަމުންދާ މަސައްކަތްތުގެ މަޢުލޫމާތުވެސް ޚިއްސާކޮށްފައިކަމަށް އެވުޒާރާއިން ބުނެއެވެ.
އެގޮތުން ސްޕޯޓްސް ފިޝިން ބަނދަރުތައް ތަރައްޤީކުރުމުގެ މަސައްކަތާއި، މެރިކަލްޗަރ ސިނާއަތުގެ ދާއިރާއިން މަސައްކަތްތައް ކުރެވެމުންދާކަމަށް ވަޒީރު ވިދާޅުވިއެވެ.