ޚަބަރު
ވިއްސާރައިގައި ގެއްލުންވި 57 ގެއެއްގެ އެސެސްމަންޓް ނިމިއްޖެ

އެނޑީއެމްއޭއިން އެސެސްމަންޓް މަސައްކަތް ކުރަނީ ފޮޓޯ: އެންޑީއެމްއޭ
މިދިޔަ ހަފްތާގައި ރާއްޖެއަށް ކުރި ވިއްސާރައިގައި ގެއްލުންވި 57 ގެއެއްގެ އެސެސްމަންޓް ހަދާ ނިމިފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ހާމަކޮށްފިއެވެ.
އެންޑީއެމްއޭ އިން ބުނި ގޮތުގައި، މިދިޔަ ހޮނިހިރު ދުވަހު ރާއްޖެއަށް ކުރި ވިއްސާރައިގައި މާލެ ސަރަހައްދުގައި ފެން ބޮޑުވުމުގެ ސަބަބުން ދިވެހި ސިފައިންނާއި ދިވެހި ފުލުހުން އަދި ދިވެހި ރެޑްކްރެސެންޓްގެ ހޮޓްލައިންތަކަށް 98 ކޯލް ލިބިފައިވެއެވެ. މީގެ ތެރޭގައި ވެލިބަސްތާ ޖައްސާދިނުމަށް އެދި 70 ކޯލް، ގެއްލުންތައް ރިޕޯޓްކުރުމަށް 21 ކޯލް އަދި ސީދާ ޒަރޫރީ އެހީތެރިކަމަށް އެދި 7 ކޯލް ހިމެނެއެވެ.
އިއްޔެ މާލެއަށް ކުރި ވިއްސާރައިގައި ހިނގި ފެންބޮޑުވުމުގެ ހާދިސާ އާއި ގުޅިގެން އެސެސްމެންޓް ހަދަންޖެހޭ ކަމަށް ފާހަގަ ކުރެވުނު 30 ގޭގެ ޑެމޭޖް އެސެސްމެންޓް މި އޮތޯރިޓީއިން ވަނީ @maldivianrc ގެ އެހީތެރިކަމާއެކު ނިންމާފައި. pic.twitter.com/J4pTNlsMMX
— NDMA Maldives (@NDMAmv) December 22, 2024
އެންޑީއެމްއޭ އިން އިތުރަށް ހާމަކުރި ގޮތުގައި، ވިއްސާރައިގައި އަވަސް އެހީތެރިކަން ބޭނުންވާކަމަށް ފާހަގަކުރެވުނު 12 ގޭބިސީއެއްގެ ރެޕިޑް އެސެސްމަންޓް، ދިވެހި ރެޑްކްރެސެންޓްގެ އެހީތެރިކަމާއެކު ހަދާފައިވެއެވެ. މީގެ ތެރެއިން 8 ގޭބީސީއެއްގެ 32 މީހުންނަށް އެއް ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއިން ބުއިމުގެ ކަންކަން ހަމަޖައްސައިދެވިފައިވެއެވެ. މިހާރު އެ ފަރާތްތަކުގެ ދިރިއުޅުން އާންމު ހާލަތަކަށް ރުޖޫއަވެފައިވާ ކަމަށްވެސް އެ އޮތޯރިޓީން ބުންޏެވެ.
މި ހާދިސާއާ ގުޅިގެން މާލެއިން އެސެސްމަންޓް ހަދަންޖެހޭކަމަށް ފާހަގަކުރެވުނު 30 ގެއެއްގެ ޑެމޭޖް އެސެސްމަންޓް ހަދާފައިވާ ކަމަށް އެންޑީއެމްއޭ އިން ބުންޏެވެ. މި ގެތަކަށް ލިބުނު ގެއްލުންތަކުގެ ތެރޭގައި ގިނައިން ފާހަގަކުރެވިފައިވަނީ ހިފާ ގެންގުޅޭ ތަކެއްޗަށް ލިބުނު ގެއްލުންތަކާއި އިމާރާތުގެ ސީލިންގއަށް ލިބިފައިވާ ގެއްލުންތަކެވެ.
އަތޮޅުތެރޭގައި، ޑިސެމްބަރ 17 ވަނަ ދުވަހު ކުރި ވިއްސާރައިގައި 3 ރަށަކުން ފެން ބޮޑުވެގެން ރިޕޯޓްކޮށްފައިވާ ކަމަށް އެންޑީއެމްއޭ އިން ބުންޏެވެ. އެއީ ނ. ހެނބަދޫ، ނ. ކެނދިކޮޅުދޫ އަދި ޅ. ކުރެންދޫއެވެ. މީގެ ތެރެއިން ގޭގެއަށް ފެން ވަދެގެން ގެއްލުން ލިބިގެން ރިޕޯޓްކޮށްފައިވަނީ ނ. ހެނބަދޫއިންނެވެ. އެ ރަށުން 80 ވަރަކަށް ގެއަށް ފެން ވަދެގެން ރިޕޯޓްކޮށްފައިވާ ކަމަށާއި، ނަމަވެސް މި ހާދިސާގައި އެއްވެސް ގެއަކުން މީހަކު ބަދަލުކުރަން ނުޖެހޭ ކަމަށްވެސް އެ އޮތޯރިޓީން ބުންޏެވެ.
ނ. ހެނބަދޫއިން ފެންވަދެ ގެއްލުން ލިބުނު ގެތަކުގެ ޑެމޭޖް އެސެސްމަންޓް ހެދުމަށްފަހު 27 ގެއެއްގެ ފޯމް އެ އޮތޯރިޓީއަށް ލިބިފައިވާ ކަމަށާއި އެ ފޯމްތައް ޕްރޮސެސްކުރުމުގެ މަސައްކަތް ކުރަމުންދާ ކަމަށް އެންޑީއެމްއޭ އިން ބުންޏެވެ. އަދި މާލެއިން އެސެސްމަންޓް ހެދި ގެތަކުގެ ފޯމްތައްވެސް ޕްރޮސެސްކުރުމުގެ މަސައްކަތް ކުރަމުންދާ ކަމަށްވެސް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީއިން ހާމަކުރިއެވެ.