ފުވައްމުލަކު ކައިރިން ފެނުނު ސޯމާލިއާގެ 3 މީހުން ފުލުހުންނާ ހަވާލުކޮށްފި

ފުވައްމުލަކާއި ދިމާލުން ކަނޑުމަތިން ފެނުނު ސޯމާލިއާގެ 3 މީހުން މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ފުލުހުންނާއި ހަވާލުކޮށްފިއެވެ.

މިއަދުގެ ހެނދުނުގެ ވަގުތެއްގައި މި 3 މީހުން ފެނިފައިވަނީ ފުވައްމުލަކުގެ ހުޅަނގު އުތުރުން 10 ވަރަކަށް މޭލު ބޭރުން ޑިންގީއެއްގައި ތިއްބާއެވެ. އެމްއެންޑީއެފްގެ ސަދަން އޭރިއާ ކޮމާންޑާއި ކޯސްޓްގާޑު ފޯތު ސްކޮޑްރަންގެ ހާބަރ ޕެޓްރޯލުން އެ ސަރަހައްދަށް ގޮސް، އެ ޑިންގީ ކޯސްޓްގާޑުގެ ބެލުމުގެ ދަށަށް ގެނެސްފައިވަނީ ހެނދުނުގެ ވަގުތެއްގައެވެ.

އެމްއެންޑީއެފުން ވިދާޅުވެފައިވަނީ، ފެނުނު ސޯމާލިއާގެ 3 މީހުން ކޯސްޓްގާޑުގެ ބެލުމުގެ ދަށުން ފުވައްމުލަކު ސިޓީ ބަނދަރަށް ވައްދައި، ފުލުހުންގެ ޚިދުމަތާ ހަވާލުކޮށްފައިވާ ކަމަށެވެ. އަދި އެ މީހުން ތިބި އުޅަނދަކީ ސޯމާލިއާގެ މީހުން ބޭނުންކުރާ ވައްތަރުގެ "ސްކިފް" އެއްކަމަށް އެމްއެންޑީއެފްއިން ފާހަގަކުރެއްވިއެވެ.

މީގެކުރިންވެސް ރާއްޖޭގެ ސަރަހައްދުން ސޯމާލިޔާއަށް ނިސްބަތްވާ މީހުން ޑިންގީތަކުގައި ފެނިފައިވާކަން ފާހަގަކުރެވެއެވެ. ނަމަވެސް މިހާތަނަށް މިފަދަ ހާދިސާއެއްގައި އެއްވެސް ނުރައްކާތެރިކަމެއް ހިނގާފައެއް ނުވެއެވެ.