ޚަބަރު
އެޗްޑީސީގެ 5 ލެޕްޓޮޕް ވަގަށްނަގައިފި
އެޗްޑީސީ ފޮޓޯ: އެޑިޝަން
ހުޅުމާލޭގައި ހުންނަ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ އޮފީހަކުން 5 ލެޕްޓޮޕް ވަގަށްނެގި މައްސަލައެއް މޯލްޑިވްސް ޕޮލިސް ސަރވިސްއިން ތަޙުޤީޤުކުރަން ފަށައިފިއެވެ.
ފުލުހުން މިއަދު ވިދާޅުވި ގޮތުގައި، އެޗްޑީސީގެ 5 ލެޕްޓޮޕް ވަގަށް ނަގާފައިވާ މައްސަލައެއް މިއަދު ހުށަހެޅިފައިވެއެވެ. އަދި މި މައްސަލަ މިހާރު ވަނީ ތަޙުޤީޤުގެ މަރުޙަލާގައި ކަމަށް ފުލުހުން ވިދާޅުވިއެވެ. ނަމަވެސް، މި މައްސަލައާ ގުޅޭ އިތުރު ތަފްސީލެއް ފުލުހުން ހާމަކުރައްވާފައެއް ނުވެއެވެ.
މައުލޫމާތު ލިބިފައިވާ ގޮތުގައި، މި ލެޕްޓޮޕްތައް ވަގަށް ނަގާފައިވަނީ ހުޅުމާލޭ ދެވަނަ ފިޔަވަހީގައި ހުންނަ ފަރުކޮޅުފުށީގައި ޤާއިމުކޮށްފައިވާ އެޗްޑީސީގެ އޮފީހަކުންނެވެ. މި ހާދިސާ ހިނގި ސަރަހައްދުގައި ފުލުހުން ތަޙުޤީޤު ކުރިއަށް ގެންދަވާކަމަށް ބެލެވެއެވެ.
