ކެމިކަލް ގެ ބަދަލުގައި ގުދުރަތީ އުސޫލްތައް ބޭނުންކޮށްގެން ގަހުގައި އަޅާ ސޫފާސޫފި ނައްތާލުން

ގަސްއިންދުމަކީ ހިތްހަމަޖެހުން ލިބޭ ހިތްގައިމު މަސައްކަތެކެވެ. ނަމަވެސް ގަހަށް ހަމަލާދޭ ސޫފާސޫފީގެ އުނދަގުލަކީ ދިމާވެދާނެ ކަމެކެވެ. އޯގަނިކް އުސޫލްތަކަކީ ސޫފާސޫފި ކޮންޓްރޯލްކޮށް ގަސްތައް ރައްކާތެރިކުރުމަށް ޤުދުރަތީ ގޮތެކެވެ. މިގޮތުން ގެއްލުންދެނިވި ކެމިކަލްތައް ބޭނުންނުކޮށް، ތިމާވެއްޓާއި އިންސާނުންނަށް ރައްކާތެރި ގޮތެއްގައި ގަސްތައް ބެލެހެއްޓޭނެއެވެ. 

އޯގަނިކް  އުސޫލްތަކުން ސޫފާސޫފި ކޮންޓްރޯލްކުރުމުގައި ބޭނުންކުރަނީ ޤުދުރަތީ ގޮތްތަކެވެ. މިގޮތުން އަމާޒުކުރަނީ ސޫފާސޫފި ދުރުކުރަން ތިމާވެއްޓާ ރައްޓެހި ހައްލުތައް ބޭނުންކުރުމަށެވެ. މި އުސޫލުގެ ސަބަބުން ގަސްތަކުގެ ވެށީގެ ނިޒާމުގެ ވަޒަން ހިފެހެއްޓެއެވެ. އަދި ގަސްތަކަށް ފައިދާހުރި ސޫފާސޫއްޕަށް ގެއްލުން ނުލިބޭކަންވެސް ކަށަވަރުކުރެވެއެވެ.

އާންމުކޮށް އުޅޭ ސޫފާސޫފި ދެނެގަތުމަކީ އޯގަނިކް ގޮތުގައި ސޫފާސޫފި ކޮންޓްރޯލްކުރުމުގެ ފުރަތަމަ ފިޔަވަޅެވެ. އޭފިޑްސް، ކޮކާފަނި، އަދި ފިނިހަކަ އަކީ ގަސްތަކުގައި އާންމުކޮށް އުޅޭ ސޫފާސޫތްޕެވެ. ކޮންމެ ބާވަތެއްގެ ސޫފާސޫތްޕަކުންވެސް ގަސްތަކަށް ގެއްލުންދެނީ އެ ބާވަތަކަށް ޚާއްޞަ ގޮތަކަށެވެ. މި ކަންކަން ދެނެގަތުމުން ރަނގަޅު ކޮންޓްރޯލް ގޮތެއް ޚިޔާރުކުރުމަށް ފަސޭހަވާނެއެވެ.

ޤުދުރަތީ ޝިކާރަވެރިން: ޤުދުރަތީ ޝިކާރަވެރިން އިތުރުކުރުމަކީ ސޫފާސޫފި ކޮންޓްރޯލްކުރުމުގެ ހަރުދަނާ ގޮތެކެވެ. ލޭޑީބާޑްސް ފަދަ ސޫތްޕަކީ އޭފިޑްސް ކާ އެއްޗެކެވެ. އަދި ދޫންޏަކީ ކޮކާފަނި ކޮންޓްރޯލްކުރުމަށް އެހީތެރިވެދޭ އެއްޗެކެވެ. މި ޝިކާރަވެރިންނަށް އުޅެވޭނެ މާޙައުލެއް އުފެއްދުމުން ޤުދުރަތީގޮތުން ސޫފާސޫފި މަދުކުރެވޭނެއެވެ. މެރިގޯލްޑް ފަދަ މާގަސްތައް އިންދުމުން ފައިދާހުރި ސޫފާސޫފި ގަސްތައްކައިރިއަށް ގެނެވޭނެއެވެ.

އެކިބާވަތުގެ ގުޅޭ ގަސްތައް އިންދުން: އެކިބާތުގެ ގަސްތައް އެއްތަނެއްގައި އިންދުމަކީ ސޫފާސޫފި ދުރުކުރެވިދާނެ އުސޫލެކެވެ. މިސާލަކަށް، ބޭސިލް ގަސް ޓޮމާޓޯ ގަހާ އެކުގައި އިންދުމުން މެހި އަދި މަދިރި ދުރުކުރެވެއެވެ. މި ގޮތުން ހަމައެކަނި ސޫފާސޫފި ކޮންޓްރޯލްކުރުމުގެ އިތުރުން ގަސްތައް ހެދުމަށާއި ރަހަ ރަނގަޅުކުރުމަށްވެސް އެހީތެރިވެދެއެވެ.

ގޭގައި ތައްޔާރުކުރެވޭ ޙައްލުތައް: ގޭގައި ތައްޔާރުކުރެވޭ ޙައްލުތަކަކީ ފަސޭހަ އަދި އަގުހެޔޮ ގޮތްތަކެކެވެ. ފެނާއި ސައިބޯނި އެއްކޮށްގެން އޭފިޑްސް ދުރުކުރެވިދާނެއެވެ. ލޮނުމެދު ސްޕްރޭއަކީވެސް ގިނަ ސޫފާސޫފި ދުރުކުރެވޭނެ އެއްޗެކެވެ. މި ޙައްލުތައް ތައްޔާރުކުރަން ފަސޭހަވުމުގެ އިތުރުން ގަސްތަކަށް ރައްކާތެރިވެސް މެއެވެ.

މާއްދީ ހުރަސްތައް: ދާ ނުވަތަ ނަރު ފަދަ މާއްދީ ހުރަސްތަކުން ގަސްތައް ސޫފާސޫފިން ރައްކާތެރިކުރެވިދާނެއެވެ. މި ހުރަސްތަކުން ސޫފާސޫފި ގަސްތަކާ ހަމައަށް އައުން ހުއްޓުވާލެވޭއިރު، އަވި އަދި ވާރޭ ފެން ލިބުމުގެ ފުރުޞަތު ބޮޑެވެ. މި ގޮތްތަކަކީ ޚާއްޞަކޮށް ކުދި ގަސްތައް ރައްކާތެރިކުރުމަށް ބޭނުންތެރި ގޮތްތަކެކެވެ.

ރަނގަޅު ފަސް ބޭނުންކުރުން: ދިރުންހުރި ރަނގަޅު ފަހަކީ ދުޅަހެޔޮ ގަސްތަކެއް އިންދުމުގެ މައިގަނޑު  ތަނބެވެ. ރަނގަޅު ފަހުގައި ގަސް އިންދުމުން ސޫފާސޫފިން ދިފާޢުވުމަށް އެހީތެރިވެދެއެވެ. ކާދު އެޅުމުން ފަސް މުއްސަނދިވެ، ގިނަދުވަސް ވަންދެން  ފަހުގެ ފެންވަރު ރަނގަޅުކޮށްދެއެވެ. އަދި މަދުމަދުން ފަސްގަނޑު ޖެހުމުން ސޫފާސޫފީގެ ދައުރު ހުއްޓުވާލެވެއެވެ.

ސަގާފީ އާދަތައް: ސަގާފީ އާދަތަކަކީ ސޫފާސޫފި މަދުކުރުމަށްޓަކައި ގަސްތައް ބަހައްޓާތަން ބަދަލުކުރުމެވެ. ގަސްތައް ދައުރުކުރުމުން އެއް ސަރަޙައްދެއްގައި ސޫފާސޫފި އާލާވުން ހުއްޓުވާލެވެއެވެ. ގަސްތަކުގެ ވަށައިގެން ހުންނަ ކުނިބުނި ނެގުމުން ސޫފާސޫފި ފިލާތިބޭނެ ތަންތަން މަދުވެގެންދެއެވެ. މި އާދަތަކުން ދުޅަހެޔޮ ގަސްތަކެއްގެ މާޙައުލެއް ދެމެހެއްޓުމަށް އެހީތެރިވެދެއެވެ.

އޯގަނިކް ޕެސްޓިސައިޑް ބޭނުންކުރުން: އެހެން ގޮތްތަކުން ޙައްލު ނުވާނަމަ، އެންމެ ފަހު ގޮތެއްގެ ގޮތުން އޯގަނިކް ޕެސްޓިސައިޑް ބޭނުންކުރެވިދާނެއެވެ. ނީމް ނުވަތަ ހިތިފަތު ތެލަކީ ގިނަ ސޫފާސޫފި ކޮންޓްރޯލްކުރުމަށް މަޤްބޫލު އެއްޗެކެވެ. މިއިން ގަހަށް ފައިދާހުރި ސޫފާސޫފި ނުމަރައެވެ. އަބަދުވެސް ރައްކާތެރިކަމާއި ނަތީޖާ ނެރުމަށްޓަކައި އިރުޝާދުތަކަށް ފަރުވާތެރިކަމާއެކު ޢަމަލުކުރަންވާނެއެވެ.

ބެލެހެއްޓުމާއި މޮނިޓަރކުރުން: ގަވާއިދުން މޮނިޓަރކުރުމަކީ ސޫފާސޫފި ކޮންޓްރޯލްކުރުމުގެ މުހިންމު ބައެކެވެ. ގަސްތަކަށް ގެއްލުން ލިބިފައިވޭތޯ ނުވަތަ ސޫފާސޫފި އާލާވެފައިވޭތޯ އަވަސްއަވަހަށް ބަލަމުން ގެންދަންވާނެއެވެ. އަވަހަށް ފާހަގަކުރެވުމުން މައްސަލަ ބޮޑުވުމުގެ ކުރިން އަވަސް ފިޔަވަޅު އެޅޭނެއެވެ. އަބަދުވެސް ބަލަހައްޓަމުން ގެންދިއުމުން ގަސްތައް ދުޅަހެޔޮކަމާއެކު ފޯދިގެންދާނެއެވެ.