ދުނިޔެ
ޣައްޒާގައި އިސްރާއީލުގެ ހަމަލާތައް ހަރުކަށިކޮށްފި: ހޮސްޕިޓަލަކަށް ހަމަލާދީ އެހީގެ ޤާފިލާއެއް ގޮއްވާލައިފި

ހަމަލާދީފައިވާ އެހީގެ ޓްރަކެއް ފޮޓޯ:އަލްޖަޒީރާ
ޣައްޒާގެ އުތުރުގައި ހުރި ކަމާލް އަދުވާން ހޮސްޕިޓަލަށް އިސްރާއީލުގެ ސިފައިން ދެމުންދާ ހަމަލާތައް ހުއްޓުމެއް ނެތި ކުރިއަށްދާ ކަމަށް ވަނީ ރިޕޯޓުކޮށްފައެވެ. މި ހަމަލާތަކުގައި ރިމޯޓް ކޮންޓްރޯލް ވެހިކަލްތައް ބޭނުންކޮށްގެން ގޮއްވާލުމުގެ ސަބަބުން މަދުވެގެން 20 ބަލިމީހުންނާއި މެޑިކަލް މުވައްޒަފުންނަށް އަނިޔާވެފައިވާ ކަމަށް ބުނެއެވެ.
ހަމައެހެންމެ، ޣައްޒާގެ މެދުތެރޭގައި އޮންނަ އަލް-ބަލަހުގައި، ބަނޑުހައިހޫނުކަމުގައި ތިބި ފަލަސްޠީނު ރައްޔިތުންނަށް އެހީ ގެންދިޔަ ޤާފިލާއަކަށް އިސްރާއީލުގެ ޑްރޯން އެއް މެދުވެރިކޮށް ހަމަލާދީފައިވެއެވެ. މި ހަމަލާގައި ސެކިއުރިޓީ ބަލަހައްޓަމުން ދިޔަ 4 މީހުން މަރުވެފައިވާ ކަމަށް ބުނެއެވެ. މިއާއެކު ވޭތުވެދިޔަ 24 ގަޑިއިރުގެ ތެރޭގައި މަރުވި މީހުންގެ އަދަދު 26 އަށް އަރާފައިވެއެވެ.
އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ވަނީ ޕާލަމެންޓުގައި ދައްކާ ވާހަކައެއްގައި، ހުއްޓުމެއް ގެނެސް ޣައްޒާގައި ހިފެހެއްޓިފައިވާ މީހުން ދޫކޮށްލުމަށް އެއްބަސްވުމެއް ހޯދުމަށް ކުރިއެރުންތަކެއް ލިބިފައިވާ ކަމަށް ބުނެފައެވެ. ނަމަވެސް މިކަމަށް ވަކި މުއްދަތެއް ކަނޑައަޅާފައެއް ނުވެއެވެ.
އިސްރާއީލުން ޣައްޒާއަށް ދެމުންދާ ހަމަލާތަކުގައި 2023 އޮކްޓޯބަރު 7 އިން ފެށިގެން މިހާތަނަށް މަދުވެގެން 45,317 ފަލަސްޠީނުން މަރުވެ، 107,713 މީހުންނަށް އަނިޔާވެފައިވެއެވެ. އަދި އޮކްޓޯބަރު 7 ގައި ހަމާސްގެ ހަމަލާގައި އިސްރާއީލުގެ 1,139 މީހުން މަރުވެ، 200 އަށްވުރެ ގިނަ މީހުން ޣައްޒާއަށް ގެންގޮސްފައިވެއެވެ.
ވަފާ ނިއުސް އޭޖެންސީން ރިޕޯޓުކޮށްފައިވާ ގޮތުގައި، ޣައްޒާ ސިޓީގައި ހުންނަ އަލް ސަމްރާ ހިސްޓޯރިކަލް ބާތްހައުސް ކައިރީގައި ހުރި ސިޔާމް ޢާއިލާގެ ގެއަކަށް އިސްރާއީލުން ދިން ހަމަލާއެއްގައި ދެ އަންހެނުންނާއި ކުޑަކުއްޖަކު ހިމެނޭ ގޮތަށް 4 މީހުން މަރުވެފައިވެއެވެ.