އެޗްޑީސީން ގެއްލުނު ލެޕްޓޮޕްތައް ހޯދައިފި

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަގަށް ނެގި ފަސް ލެޕްޓޮޕް ހޯދައިފިކަމަށް ފުލުހުން ބުނެފިއެވެ. މި މަޢުލޫމާތު ފުލުހުން ހާމަކުރީ ރޭ މީޑިއާތަކާ ހިއްސާކުރި މެސެޖެއްގައެވެ.

ފުލުހުން ބުނިގޮތުގައި ލެޕްޓޮޕްތައް ވަގަށް ނަގާފައިވަނީ ފަރުކޮޅުފަޅުގައި ހުރި އެޗްޑީސީގެ ޕްރޮޖެކްޓް އޮފީހުންނެވެ. އަދި މި މައްސަލައިގައި ތުހުމަތުކުރެވޭ މީހާ މިވަގުތު ހުރީ މަސްތުވާތަކެތީގެ މައްސަލައެއްގައި ހައްޔަރުގައިކަމަށް ވެސް ފުލުހުން ފާހަގަކުރިއެވެ. މި މައްސަލަ ފުލުހުން ދަނީ ތަޙްޤީޤުކުރަމުންނެވެ.

އިއްޔެ ބައެއް މީޑިއާތަކުން ރިޕޯޓުކޮށްފައިވަނީ އެޗްޑީސީގެ ފައިނޭންސް ޑިޕާޓްމަންޓުން ލެޕްޓޮޕްތަކެއް ގެއްލިފައިވާ ކަމަށެވެ. ނަމަވެސް އެޗްޑީސީން އެކަން ދޮގުކޮށް ބުނެފައިވަނީ ލެޕްޓޮޕްތައް ވަގަށް ނަގާފައިވަނީ އެހެން ޑިޕާޓްމަންޓަކުން ކަމަށެވެ.

މި ހާދިސާ ހިނގާފައިވަނީ މާލޭގެ ރަށްވެހިންނަށް ބޯހިޔާވަހިކަން ފޯރުކޮށްދިނުމަށް ކުރިއަށްގެންދާ "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް ގޯތި ލިބުނު ކަމުގެ ދޮގު ލިޔުންތަކެއް ތައްޔާރުކޮށް ގޯތިތަކެއް ދިން ކަމަށް ތުހުމަތުކުރެވޭ މައްސަލައެއް ފެންމަތިވެފައިވާ ދަނޑިވަޅެއްގައެވެ.

މި މައްސަލައިގައި އެންމެ ބޮޑު ތުހުމަތެއް ކުރެވެނީ އެޗްޑީސީގެ ކުރީގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދަށެވެ. މި މައްސަލައާ ގުޅިގެން އެޗްޑީސީގެ ގިނަ މުވައްޒަފުންތަކެއް ސަސްޕެންޑްކޮށްފައިވާއިރު، ފަޒުލް ވަނީ މަޤާމުން އިސްތިއުފާ ދީފައެވެ. އޭނާ ބުނެފައިވަނީ ތުހުމަތުތަކަށް އިންކާރުކުރާ ކަމަށާއި، ތަޙްޤީޤަށް ފުރުސަތު ދިނުމަށްޓަކައި އިސްތިއުފާ ދިން ކަމަށެވެ.

މިހާރު އެޗްޑީސީގެ މެނޭޖިންގ ޑިރެކްޓަރުގެ މަޤާމަށް ކުރީގެ ކޮންސްޓްރަކްޝަން މިނިސްޓަރު މުޙައްމަދު މައުރޫފް ޖަމީލު ވަނީ އައްޔަންކޮށްފައެވެ.