ރާއްޖޭގައި ބިދޭސީ އަންހެނަކު މަރާލިކަމަށް ދެކެވޭ ވާހަކަތައް ހޯމް މިނިސްޓަރު ދޮގުކުރައްވައިފި

ރާއްޖޭގައި އިންޑޮނޭޝިއާގެ އަންހެނަކު ރޭޕްކޮށް މަރާލާފައިވާ ކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަތައް ހޯމްލޭންޑް އެންޑް ސެކިއުރިޓީ މިނިސްޓަރު އަލީ އިހުސާން ދޮގުކުރައްވައިފިއެވެ.

މިފަދަ ވާހަކަތަކެއް ފެތުރެމުންދާތީ، މިނިސްޓަރު އިހުސާން ވަނީ މީޑިއާއަށް މެސެޖެއް ފޮނުއްވާފައެވެ. އެ މެސެޖުގައި މިނިސްޓަރު ވިދާޅުވެފައިވަނީ، މި ވާހަކަތަކަކީ 2021 ވަނަ އަހަރުގެ މޭ މަހު ބަންގްލަދޭޝްގެ ނޫހަކުން ރިޕޯޓުކޮށްފައިވާ ހާދިސާއަކާ ގުޅޭ ވީޑިއޯއެއް ކަމަށެވެ. އަދި މިނިސްޓަރު ވަނީ އެ އާޓިކަލްގެ ލިންކުވެސް މީޑިއާއަށް ފޮނުއްވި މެސެޖުގައި ހިއްސާކުރައްވާފައެވެ.

މީގެ އިތުރުން، ދިވެހި ފުލުހުންގެ ޚިދުމަތުންވެސް ވަނީ މި މައްސަލައާ ގުޅޭގޮތުން ބަޔާނެއް ނެރެ، މި ވާހަކަތަކުގެ ޞައްޙަކަން ދޮގުކުރައްވާފައެވެ. ފުލުހުން ވިދާޅުވެފައިވަނީ، މި ވާހަކަތަކަކީ ޙަޤީޤަތާ ޚިލާފު، އަދި ރާއްޖޭގައި ހިނގާފައިވާ ކަމެއް ނޫން ކަމަށެވެ.

Social media gai raajjeygai bidheysee anhenaku rapekoh maraalaafaivaa kamah bune video akah havaalaadhee dhekvey vaahaka akee May 2021 vana aharu Bangladesh ge noohehgai reportkohffaivaa haadisaa akai gulhey video eh kamah dhannavan.https://t.co/THSXD5euUa

— Minister of Homeland Security & Technology (@min_mohst) December 23, 2024

މި މައްސަލައާ ގުޅިގެން ރައްޔިތުންގެ މެދުގައި ކަންބޮޑުވުން އުފެދިފައިވާއިރު، ސަރުކާރުގެ ކަމާބެހޭ އިދާރާތަކުން ވަނީ މި ވާހަކަތަކަކީ ދޮގު މަޢުލޫމާތު ކަމަށް ކަށަވަރުކޮށްދީފައެވެ. އަދި މިފަދަ ދޮގު މަޢުލޫމާތު ފަތުރާ ފަރާތްތަކާމެދު ޤާނޫނީ ފިޔަވަޅު އެޅޭނެ ކަމަށްވެސް އިންޒާރުދީފައިވެއެވެ.