ގޯލްޑް ކަޕް: ކާމިޔާބަށް އެދޭނަމަ އައްޑޫ ސިޓީގެ ސަޕޯޓަރުން ކުރަން ނުޖެހޭ މުހިންމު އެއް ކަމެއް އެބައޮތް

ގިނަ އަހަރުތަކަކަށްފަހު ގަލޮޅު ދަނޑުގެ ފަޅުކަން ފިލުވާލަދިން ނައިންޓީ ޕްލަސް ގޯލްޑް ކަޕްގެ ފައިނަލް މެޗު މިރޭ ކުޅުމަށް ހަމަޖެހިފައިވާއިރު، މުބާރާތުގެ މެޗުތަކުގައި ކުޅުންތެރިން ދައްކަމުންދާ ހުނަރާއި، ޓީމުތަކަށް ހިތްވަރު ދިނުމުގައި ސަޕޯޓަރުން ދައްކަމުންދާ ލާމަސީލު ނަމޫނާއަށް މިވަނީ ގާތްގަނޑަކަށް މުޅި ރާއްޖޭގެ ސަމާލުކަން ހުއްޓިފައެވެ. 

މިރޭގެ ފައިނަލަށް އޭދަފުއްޓާއި އައްޑޫ ސިޓީގެ ސަޕޯޓަރުން ކެތް މަދުވެފައިވާ މިންވަރު ހާމަކޮށްދިން އެއް ކަމަކީ، މެޗުގެ ޓިކެޓު ވިއްކާ ގަޑިއަށް ގަލޮޅު ދަނޑުގެ ކައިރީގައި ދަމާލި ކިއުތަކެވެ. ޓިކެޓުގެ ޑިމާންޑު ބޮޑު ނުވާނެކަމަށް ހިތާ ކިއުއަށް އަރަން ނުދެވުނު ބައެއް ފަރާތްތަކުން މިހާރު އަންނަނީ ޓިކެޓެއް ހޯދުމަށް ސޯޝަލް މީޑިއާ މެދުވެރިކޮށް އެދެމުންނެވެ.

މި ފޯރީގައި ގަލޮޅު ދަނޑަށް ވަދެ، ސަޕޯޓަރުންގެ އަޑުން މިރޭ މުޅި ގަލޮޅު ސަރަހައްދު ގުގުމާލާނެކަން ޔަގީނެވެ. ދުންމާރީގެ އަޑަކީ އާންމު ގޮތެއްގައި ބޮލަށް އުނދަގޫވާފަދަ ގަދަ އަޑަކަށް ވީ ނަމަވެސް، މިރޭ ފުމޭ ދުންމާރީގެ އަޑު ވާނީ ފުޓުބޯޅަ ސަޕޯޓަރުންގެ ހިތަށް ލިބޭ ފިނިކަމަކަށެވެ. ސަބަބަކީ އެ އަޑުތަކުގެ ފަހަތުގައި ކުޅިވަރުގެ ރޫހު އެކުލެވިފައިވުމެވެ. އެއީ ގަލޮޅު ދަނޑުން ގެއްލުނުތާ އަހަރުތަކެއް ވެފައިވާ ރޫހެކެވެ. 

ނަމަވެސް މިރޭގެ މެޗަށް ނިކުންނައިރު އައްޑޫ ސިޓީގެ ސަޕޯޓަރުން ސަމާލުވާންޖެހޭ އެއް ކަމެއް އެބައޮތެވެ. މިކަމަށް ސަމާލުނުވެއްޖެނަމަ، އެއީ ފަހަރުގާ އެ ޓީމުގެ ކާމިޔާބާ ދެމެދަށް ވެވޭ ހުރަހަކަށް ވުންވެސް އެކަށީގެންވެއެވެ. 

އައްޑޫ ސިޓީގެ ސަޕޯޓަރުން ވިސްނަންވީ، ބަތްޕެނާއި އަޅުވާ އޭދަފުށީގެ ޓީމާ ނުބެހުމެވެ. މިކަމުގެ ނުރައްކާ އޮތް މިންވަރު މީގެ ކުރިން ވެސް އޭދަފުށި ޓީމުން ވަނީ އަންގާދީފައެވެ. ނަމަވެސް ތަފާތަކީ މިއަދަކީ ހޮނިހިރު ދުވަހަކަށް ނުވުމެވެ. މި ދައްކަން އުޅެނީ އޭދަފުށީގެ ހޮނިހިރު ބަތްޕެނާއި އެ ރަށުގެ ފުޓުބޯޅަ ޓީމާ ހުރި ގުޅުމުގެ ވާހަކައެވެ. ކުރިން 'ހޮނިހިރު ބަތްޕެން' މިއީ އެ ޓީމާ ދިމާކުރަން ބޭނުންކުރި ލަފްޒުތަކެކެވެ. ނަމަވެސް މިހާރު އެއީ އެ ޓީމަށް ހިތްވަރު ލިބޭ ލަފްޒުތަކެކޭ ބުނުމުގެ ފުރުސަތު ވެސް އެބައޮތެވެ.

ރާއްޖޭގެ ރަށްތައް ރަމްޒުކޮށްދޭ ގޮތަށް ޓީމު ހަދައިގެން ކުޅެމުން އަންނަ ގޯލްޑަން ފުޓްސަލް ޗެލެންޖުގެ އެންމެ ފަހު މުބާރާތުގެ ޗެމްޕިއަންކަން ލ. ގަމާ ވާދަކޮށް އޭދަފުށިން ހޯދިއިރު، އެ ޓީމުން މެޗުގެ ލީޑު ނެގި ހިސާބުން މުޅި ސަރަހައްދު ގުގުމާލީ އޭދަފުށީގެ ސަޕޯޓަރުން އެއް ރާގަކަށް “ހޮނިހިރު ބަތްޕެން” މިހެން ގޮވަމުން ދިޔަ އަޑުންނެވެ. އޭދަފުށީގެ ސަޕޯޓަރުން އެރޭ އެ ލަފްޒުތައް ބޭނުންކުރީ ފަހުރުވެރި ވަމުންނެވެ.

މިކަން ފެށުނީ މައިކަލް ޑިސިލްވާގެ ވާދައިގެ ތައްޓަށް ރާއްޖޭގައި ކުޅެވެމުން އައި ޤައުމީ ފުޓުބޯޅަ މުބާރާތުގެ ތެރެއިން 1964 ވަނަ އަހަރުއެވެ. އެ ފަހަރުގެ މުބާރާތަށް ރާނީ ކުލަބު ނިކުތީ ތަށި މިލްކު ކުރުމަށެވެ. 

އެ މުބާރާތުގެ ފައިނަލުގައި އަނެއްކޮޅުން އޮތީ، ފުރަތަމަ ފަހަރަށް މުބާރާތުގައި ބައިވެރިވި އޭދަފުށީގެ ބަހިއްޔާ ސާދާ މުސްކުޅި ދަރިވަރުންގެ ޖަމިއްޔާއެވެ. އެއީ މީގެ 60 އަހަރު ކުރި ކަމުން، މާލޭގައި އޭދަފުށީގެ މާ ގިނަ ބަޔަކު ދިރިއުޅެމުންނެއް ނުދާނެތާއެވެ. އަދި ރަށުން ފުރައިގެން މެޗަށް އަންނާނެ ބައެއް ވެސް ނުތިބޭނެތާއެވެ. އެހެންކަމުން މުޅި ދަނޑުގެ ވަށައިގެން އޮތީ ރާނީ ކްލަބުގެ ސަޕޯޓަރުންނެވެ. 

ދަނޑަށް އެއްވެފައި ތިބި ރާނީ ކްލަބުގެ ސަޕޯޓަރުން ހޮނިހިރު ބަތްޕެން، ހުތް ބަތްޕެން، ފިނި ބަތްޕެން، މިހެންގޮސް އެކި ޒާތްޒާތުގެ ބަތްޕެނުގެ ނަން ބޭނުންކޮށްގެން އޭދަފުށީގެ ކުޅުންތެރިން ރޭރުކޮށްލުމަށާއި ހިތްވަރު ބަލިކޮށްލުމަށް މަސައްކަތްކުރިއެވެ. ނަތީޖާއަކަށްވީ އެކަމުން ހިތްވަރު ހޯދައި، ރާނީ ކްލަބު އެ ފައިނަލުން 1-0 އިން ބަލިކޮށް، ތަށި މިލްކު ކުރުމުގެ ފުރުސަތު އެ ޓީމަށް ގެއްލުވާލުމެވެ. އެ ކާމިޔާބަކީ ހޮނިހިރު ދުވަހު އެ ޓީމުން ހޯދި ކާމިޔާބެކެވެ. އެ ހިސާބުން ހޮނިހިރު ބަތްޕެނާއި އޭދަފުށީގެ ފުޓުބޯޅަ ޓީމާ ގުޅުވާލިއެވެ. އަދި އެ ވާހަކަ މުޅި ރާއްޖެއަށް އާންމުވިއެވެ. 

އޭދަފުށީގައި ކުރިން ފެން ބަތްޕެނަކީ ހޮނިހިރު ދުވަހުގެ ހާއްސަ ކެއުމެކެވެ. އެގޮތުން ހޮނިހިރު ދުވަހު ކެއުމަށްޓަކައި ބުރާސްފަތި ދުވަހުގެ ހަވީރު ކޮންމެ ގެއަކުހެން ފެންބަތްޕެން ކައްކައެވެ. އަދި ހުކުރުވިލޭރޭ އާއި ހުކުރުދުވަހު ރައްކާތެރިކޮށް ފިނިކަންމަތީ ބެހެއްޓުމަށްފަހު، ހޮނިހިރުވިލޭރޭ އާއި ހޮނިހިރުދުވަހުގެ ޢާއްމު ކެއުމަކީ ފިނިބަތްޕެނެވެ. 

ރާނީ ކްލަބާ ދެކޮޅަށް މައިކަލް ޑިސިލްވާގެ ވާދައިގެ ތައްޓަށް ކުޅުނު މެޗުގެ ހަނދާންތައް އާ ކުރަމުން އޭދަފުށި ޓީމުގެ ސެންޓަ ފޯވާޑެއްގެ ރޯލު އަދާކޮށްފައިވާ އިބްރާހީމް އަހުމަދު، އޭދަފުށި ޓައިމްސްއަށް ދިން އިންޓަވިއުއެއްގައި ބުނެފައިވަނީ، އެ ދުވަހު ކުޅިބަލަން އެއްވެފައި ތިބި ގިނަ ބަޔަކު ބަތްޕެނޭ ކިޔައިގެން އޭދަފުށި ޓީމާއި ދިމާކުރިކަމަށެވެ. 

އެ މުބާރާތަށްފަހު 1985 ގެ ދެވަނަ ޑިވިޝަން ފުޓުބޯޅަ މުބާރާތް އޭދަފުށިން ކާމިޔާބުކުރި އިރުވެސް މި ކަމަކަށް ބަދަލެއް ނާދެއެވެ. އެ މުބާރާތުގެ ތަށި އޭދަފުށިން ހޯދިއިރު ޓީމުގެ ކެޕްޓަނެއްގެ ގޮތުގައި ހުރި އަބްދުލްމަޖީދު ހަސަން ބުނެފައިވާކަމަށް އޭދަފުށި ޓައިމްސްގައި ރިޕޯޓުކޮށްފައިވަނީ، އޭރު ވެސް ބަތްޕެނޭ ކިޔައިގެން ދިމާކުރާ ކަމަށާއި، އެކަމުން މުޅި ޓީމަށް ލިބުނީ ހިތްވަރު ކަމުގައެވެ.

މިކަމަށް އަލިއަޅުވާލައި، ރާއްޖޭގެ ގައުމީ ޓީމަށް ކުޅުނު އޭދަފުށީގެ ފުރަތަމަ ކުޅުންތެރިޔާ އަބްދުލްވާހިދު ހުސައިން ބުނެފައިވަނީ، މުބާރާތް ކުޅޭ ދުވަސްވަރު ދަނޑު ބޭރުންވެސް ބަތްޕެނޭ ކިޔައިގެން ދިމާކޮށް ހަދާކަމަށެވެ. އެގޮތުން ސައި ހޮޓަލަކުން ފެނުނަސް އެކަމާ ދިމާކޮށް ހަދާކަމަށް އޭނާ ބުނެފައިވެއެވެ.  

ކަން މިހެން އޮތް އިރު، ހޮނިހިރު ދުވަހު އޭދަފުށި ފުޓުބޯޅަ ޓީމުން ހޯދާފައިވާ ކާމިޔާބީތައްވެސް ނިސްބަތުން ގިނައެވެ. އެގޮތުން އޭދަފުށީގެ ޓީމު އެއްވަނަ ޑިވިޝަނަށް ޕްރޮމޯޓްވުމަށްފަހު އޭރު ދިވެހި ފުޓްބޯޅައިގެ ރަސްގެފާނުންގެ ގޮތުގައި ބެލެވުނު ވިކްޓަރީ ސްޕޯޓްސް ކްލަބާ ވާދަކުރި ފުރަތަމަ މެޗު އޭދަފުށިން ކާމިޔާބުކުރި ދުވަހަކީ ހޮނިހިރު ދުވަހެކެވެ. 

މީގެ އިތުރުން އެއްވަނަ ޑިވިޝަންގައި އޭދަފުށީގެ ފުޓްބޯޅަ ޓީމު ވާދަކުރިއިރު، ހަތް ހޮނިހިރެއްގައި ކުޅުނު މެޗުތަކުން އެ ޓީމު މޮޅުވެފައިވެއެވެ. އަދި މުޅި ރާއްޖެއަށް ހުޅުވާލައިގެން ބާއްވަމުން އައި މިނިވަން ޗެމްޕިއަންޝިޕް ފުޓްބޯޅަ މުބާރާތުގެ ތަށި 2016 ވަނަ އަހަރު އޭދަފުށިން އުފުލާލީ އެ އަހަރުގެ ނޮވެމްބަރު މަހުގެ 12 ވީ ހޮނިހިރު ދުވަހުގެ ރެއެވެ.

އެހެންކަމުން، ގޯލްޑް ކަޕްގެ ފައިނަލަށް އޭދަފުށިން ނިކުންނައިރު މިއަދަކީ ހޮނިހިރު ދުވަހަކަށް ނުވިނަމަވެސް، ބަތްޕެނާ ގުޅުވައިގެން ކިޔޭ އެއްޗެއްސަކީ އެ ޓީމަށް އިތުރު ހިތްވަރެއް ލިބޭ ކަމެއްކަމަށް، އެ ޓީމަށް ކުރިން ކުޅެފައިވާ ކުޅުންތެރިން މިވަނީ ބުނެފައެވެ. މިއަދު އެ ޓީމުގައި އެމީހުންގެ ދަރިންނާއި، ދަރިންގެ ދަރިން ހިމެނޭއިރު، މިކަން ވަކި މިހާރު ބަދަލުވެފައި އޮންނާނެ ހެއްޔެވެ؟ 

މަސްދަރު: ޒީ ޓައިމްސް، އޭދަފުށި ޓައިމްސް